Ekisodha 11

Gutiviswa mahungu nya gufe nya sanana nya matiwula

(Ekisodha 12:29-30)

1 Pfhumu Nungungulu a di embela Mosi, khuye: “Nyi nga na gu resa gambe tshanisa mweyo ga Faro ni ga vathu va Egipito. Khuwo tungu nya guhegise, hwane nya uwo, a na mi tshula mu duga omu. Gikhati a na mi tshulago, a na khu gu mi tutumisa. 2Olu embela vathu gukhuwe, vama vatshavbo ni vanyamayi vatshavbo moyo ni moyo a na lombe ga muakelane waye sombo nya parata ni ndralama.” 3Pfhumu Nungungulu a di gira gu va na Israyeli va mana wuhigo mahoni ga Vagipiti. Mosi abune a diri ni tshivba nya guthavisege tigoni ga Egipito, mahoni ga sithumi sa Faro ni ga vathu va tigoni.

4Mosi a di engedza gambe a ganela, khuye: “Pfhumu Nungungulu a ngu ganela kharati, khuye: Ni vbakari nya wutshigu nyi na vbindra khu vbakari ga Egipito.” 5Si nafa sanana satshavbo nya matiwula tigoni ga Egipito, gukhugela matiwula ya Faro, wule a na khalago vbagikhalotunu nya wufumu waye, kala matiwula ya githumi nya nyamayi gi tshindrago sivbila ni matiwula yatshavbo nya sirengo. 6Gu na bani guri gililo nya gikhongolo ngudzu tigoni gwatshavbo ga Egipito, egi nya gu gima gi di si gu manegi, ne kha gi na manega gambe. 7Aholu, ga sanana satshavbo sa Israyeli, kha gu na manega muthu mwendro gifuyo gi na huhudwago khu yimbwa, mufela gu dzitini gukhenu Pfhumu Nungungulu vegide mivbingano, a hambanisa litigo la Egipito ni Israyeli. 8Khavbo avbo, sithumi sago satshavbo si na relela si ta gwangu si ta nyi khidzimela, khiso: “Duga uwe ni vathu vago vatshavbo u va thangelago. Hwane nya ugo, nyi na duga.” Khavbo avbo, Mosi a di duga khu ga Faro na garadzegide ngudzu.

9 Pfhumu Nungungulu a di embela Mosi, khuye: “Faro kha na mi yingisa, gasi siliwugiso sangu si fela gu engedzelana tigoni momu ga Egipito.” 10Mosi ni Aroni va giride siliwugiso satshavbo sesi mahoni ga Faro, aholu Pfhumu Nungungulu a di bangisa monyo wa Faro, uye a di bomba gu tshula sanana sa Israyeli si duga tigoni gwaye.

Currently Selected:

Ekisodha 11: BGE2014

Highlight

Copy