Mithumo 24

Pawulo a ngu thethiswa khu Felisi

1Hwane nya livbandre matshigu, a di relela khongolo nya vaphasi nya mhamba, Ananiya, ni madhota nya gukari gumogo ni moyo nya muemeli nya gupwani khu Teritulo, vaya thela mahungu ya Pawulo ga mwamangulu. 2Na va ranide Pawulo, Teritulo a di phela gu sasamedzela mahungu, khuye: “Felisi nya guzundzege, gurula nya gukhongolo hi gu nago ha gu gu mana kotani yago ni satshavbo sigiro nya sadi si dugelelago tigoni gwathu si gu tsakisa vathu vatshavbo, sa gu girwa khu wugengeli wago. 3Ethu hi ngu siti satshavbo sesi, gambe hi ngu gu bonga khiso gikhati gyatshavbo ni malangani yatshavbo. 4Gasi hi si gu vbedzeli gikhati, nyi ngu lomba khu wuhindzi wago, u hi yingise gikhatinyana gidugwana. 5Hi wonide gukhethu oyu mwama vivbide. Khuye a wusago pfilupfilu ga Vajudha va mayigo yatshavbo. Khuye khongolo nya tsawa nya Vanazarenu. 6Gambe a di vbweta gu nyenyezisa Nyumba ya Nungungulu, hi na gu mu mola na hi gu pimisa gu mu lamula khu Nayo wathu. 7Aholu ndruna Lisiya a dita a ta mu wandra mandzani gwathu, 8khu tshivba a ruma gukhuye vale va gu na ni mahungu naye vate avbo gwago. Uwe wabune wa gu mu wudzisa, u na siti gwaye satshavbo esi hi mu girelago khiso mahungu.” 9Vajudha navo va di sekela magana yaye khavo khidzo kamwe a ganelago.

Magana ya Pawulo ga mwamangulu wa Roma

10Mwamangulu a di ningedza mahungu Pawulo, uye a hakha, khuye: “Khu gu dziti nya gukheni myaga nya gulaphe nuri mulamuli tigoni momu, nya gu dzipwa na nyi tshulegile gu dzi vhikela. 11Khedza gwadi: Eni nyi mwalo ambari likhumi na mavili matshigu na nyi gwede Jerusalema nyi ya khozela. 12Gima kha va nyi mana Nyumbani ga Nungungulu na nyi gu ganedzisana ni muthu, ambari gu kutsedzela pfilupfilu vathu dzinyumbani nya nombelo mwendro dhoropani. 13Kha va dzi kodzi gu tiyisa esi va nyi ningago khiso nandru. 14Ambari ulo, nyi ngu dzumela gukheni ha gu khedza khu Ndzila va yi ranago avo khavo tsawa, eni nya gu khozela Nungungulu wa vababe vangu, nyi khodwa ga satshavbo esi si yelanago ni Nayo, nesi si nga lowa khu vaprofeti. 15Nyi na ni gutumba ga Nungungulu nga avo navo va gu nago nya gukhethu gomo guwuga ga vale va fudego, va nya gululama ni va nya sighoho. 16Khu kharato, eni neni nyi ngu dzi garadza matshigu yatshavbo gu khala nyiri muthu nya monyo nya gululame mbeli gwa Nungungulu ni ga vathu vatshavbo. 17Khu hwane nya myaga, nyi dita tigoni gwangu nyi resa siningwa gumogo ni guta luva. 18Va nyi mane Nyumbani ga Nungungulu, na nyi gu thuma silo sesi, na nyi dzi agiside khu Nayo, gima kha nya tshanganisa gidzemo ambari gu wusa pfilupfilu. 19Va diromo Vajudha nya gute khu Aziya, a diri avo va nga fanela guta avbo gwago va ta thela mahungu nya nandru khu eni, nari gukhwatshi va di wone gilo gwangu. 20Avo ava, va na ganele gighoho va gi manego gwangu gikhati nyi nga lamudwa phathani khu madhota. 21#Wona gambe: Mith 23:6. Mwendro gi nga va gikhunguvanyiso khu kotani nya lito limwedo nyi nga ganelago vbakari gwawe, kheni: Khu kotani nya gutumbe guwuga ga vale va fudego, muhuno nyi ranidwe gu ta lamudwa vbakari gwanu.”

Pawulo a ngu khothedwa Sezareya

22Kha nga olu Felisi a nga bani a gu ma pima gwadi mahungu nya Ndzila nya Nayo yoyu, a di thindregisa mahungu, khuye: “A gu relela ndruna Lisiya, khavbo nyi na ta matigo mahungu yanu.” 23A di ruma muthangeli nya masotshwa gu sayisa gwadi Pawulo pasoni, a si himbedzeli valongo vaye guta mu thumela. 24Khu hwane nya matshigu, a dita Felisi ni mwangadzi waye Dhrurusila a nga bani ari Mujudha. A di ranisa Pawulo gasi gu mupwa na gu ganela khu gukhodwa ga Jesu Kristo. 25Kha nga ulo a nga ganela ngudzu khu gululama, ni, gu dzi vegisa ni gulamudwa gu natago, Felisi a di tala khu hwanga, a hakha, khuye: “Olu indra. Nya gu guvbweta gambe nyi na gu rana.” 26A di gu hingigedza gu ningwa dzitsapawu khu Pawulo, khu guralo a di mu rana dzinyondro nya dzingi a ta bhula naye. 27Hwane nya myaga mivili, Felisi a di tshikedzwa khu Porisiyo Festo. Felisi, khu gu vbweta gu tsakisa Vajudha a di diga Pawulo pasoni.

Currently Selected:

Mithumo 24: BGE2014

Highlight

Copy