Mithumo 13

Liendro nya guhegule la Bharinabha ni Sawule

1Umo nya libandla nya vakhodwa va Antiyokiya, va diromo vaprofeti ni vahevbudzi: Bharinabha ni Simoni a nga bani a gu ranwa pwani Nigeri, ni Lusiyu wa Sirene, ni Manaheme a nga dandra gumogo ni mufumeli Herodhi, ni Sawule. 2Vari vbakari nya nombelo wa Pfhumu ni guhala, Liphuvbo nya Guage li di ganela, khilo: “Nyi kaseleni Bharinabha ni Sawule gasi va phara thumo nyi va ranedego uwo.” 3Khavbo avbo, va di hala, va gira milombelo, va gu va handzega mandza, va va vbangana va hongola.

Bharinabha ni Sawule va ngu tivisa Mahungu ya Nungungulu tigoni ga Kipre

4Na va gu rumwa khu Liphuvbo nya Guage, va di relela Selewusiya, Khiyo va nga ya khilela ngalava va hongola Kipre. 5Na va vbohide gidwane gya Salamina, va di tivisa Mahungu ya Nungungulu mudzinyumbani nya nombelo nya Vajudha, gumogo ni Johane kha nga muphasedzeli wawe. 6Va di dzuwulugela gidwa gyatshavbo kala va gu vboha dhoropani ga Pafosi, iyo va nga ya manago Mujudha moyo nya gupwani khu Bharijesu a nga bani a gu thumisa wun'yanga ni wuprofeti nya malipha. 7Uye a di gu khala ni pfhumwana nya gukari nya gupwani khu Serijiyo Pawulo, mwama nya mapimo. Uye, na raniside Bharinabha ni Sawule, a di vbweta gupwa mahungu ya Nungungulu. 8Aholu, Elimasi, lina li tshamuselago pwani nya wun'yanga a di va wugela, na gufela gu ndreyisa mufumeli wule ndzilani nya wukhodwa. 9Aholu, Sawule, a ranwago gambe khu lina la Pawulo, na tade khu Liphuvbo nya Guage, a di mu khedzisa gwadi mahoni a mu embela, khuye: 10“Uwe u gyanana gya Sathane, u tadego khu malipha ni guvivba gwatshavbo, nala nya silo satshavbo nya gululame, u na hegisa lini gu tshunganisela dzindzila nya gululame dza Pfhumu? 11U ngu wona, Pfhumu a na khusa gyandza gyaye a gu veta. U na khala gikhumu ndrani nya gikhatinyana, nyamba wona safa nya lidambo.” Khu gikhati gyogyo gu di phuma, gu manega gidema mahoni gwaye. A di gimbila khu gu phuphuthela a vbweta muthu nya gu mu phare kunga. 12Khavbo avbo, mufumeli, na wonide esi si nga dugelela a di khodwa na gu liwuga sihevbudzo sa Pfhumu.

Bharinabha ni Pawulo va ngu tivisa Ivhangeli Antiyokiya ga Pisidiya

13Na va khugide khu Pafosi, iyo va nga ya khilela ngalava, Pawulo ni vangana vaye va di hongola Periga, talala wa Panfiliya gasi Johane a di va diga a gu bwelela Jerusalema. 14Avo va di khuga khu Perga, va gimbila, va gu hongola mbeli kala va gu vboha tigoni ga Antiyokiya ga Pisidiya. Khu litshigu nya Sabhadho, va di bela nyumbani nya nombelo va gu khala vbavbatshi. 15Na va hevbude lidangalila nya Nayo ni eli nya vaprofeti, vathangeli nya nyumba nya nombelo va di va embela, khavo: “Vandruye, mwa gu bani muri ni mahungu nya gulose khayo libandla, ganelani.” 16Khavbo avbo, Pawulo, na khugide a ema, a di khusedza mandza a va embela, khuye: “Madhota ya na Israyeli ni enu mu gu ni githawo ga Nungungulu, yingisani: 17Nungungulu wa Israyeli, hathide vababe vathu, a gu dandrisa vathu vaye gikhati va nga ya khala Egipito. Khu hwane nya gikhati a di va dusa khu Egipito, khu tshivba nya libogo Laye. 18Gipimo nya magumana myaga a di va sayisa khu lihaladzo mugiwulani. 19Khu hwane nya gikhati a di fuvisa livbandre na mavili mahundzu ya tigoni ga Khanani, a gu li ningela ga vababe vathu, 20gipimo nya mazana mana ni livbandre magumi myaga. Khu hwane nya myaga yoyo a di va ninga valamuli kala gikhati gya muprofeti Samuweli 21Khavbo avbo, va di lomba mufumeli, Nungungulu a di va ninga Sawule, mwamana wa Khisi, nya lihundzu la Bhejami, a nga va fumela gipimo nya magumana myaga. 22Nungungulu, na duside Sawule vbagikhalotunu nya wufumu, a di va tulela gu hatha Dhavhidhe kha nga mufumeli wawe. Khuye a nga mu thulago, khuye: ‘Nyi mane Dhavhidhe, mwamana wa Jese, mwamana a tsakisago monyo wangu, a nga londrowodzago guhaladza gwangu gwatshavbo.’ 23Ndrani nya livelego la Dhavhidhe, kha nga gutumbisa ga Nungungulu, velegidwe Muvbanyisi wa na Israyeli, a gu uye Jesu. 24Na si gu vbohi Jesu, Johane a di ganela khu gu bhapatiswa nya guvbindrugedze ga vathu vatshavbo va na Israyeli. 25Nari vbafuvbi nya guvbedze thumo waye, Johane a di khuye: ‘Eni khandreni wule mu mu alakanyelago, aholu a nguta khu hwane gwangu wule nyi si faneligo gu tshula silato nya migondro yaye.’

26“Vandruye, mu gu sanana nya melego wa Abrahama, ni ava va guromo vbakari gwanu, va ningago githawo Nungungulu, mahungu yaya nya guvbanyise ma gu rumedwa avbo gwathu. 27Vathu va Jerusalema ni vafumeli vawe, khu gumba muti Jesu, va di mu mola, va tadzisela kharato magana ya vaprofeti ma hevbudwago khu dzisabhadho dzatshavbo. 28Ambari va nga hamuga nandru nya gu mu songe va di lomba ga Pilato a mu songa. 29Na gu tadzisegide khu mandza yawe satshavbo esi si nga lowa khu mahungu yaye, va di mu tshisa khu vbagihambanotunu, va mu vega thowoni. 30Aholu, Nungungulu a mu wuside khu ga vafudego. 31Matshigu nya mangi a dzi wonegiside ga vale va nga gwelago Naye gukhugela Galileya kala Jerusalema; Avovo khavo va khadego dzifakazi dzaye vbakari nya vathu. 32Ethu hi ngu mi tivisa mahungu nya yadi. 33Nungungulu tadziside ga ethu, sanana, gitumbiso a nga gira ga vababe vathu, khu gu wusa Jesu. Kha nga gu lovidwego umo nya Dzindzimo, gupwani: ‘Uwe u Mwamana wangu nyi gu velegidego muhuno.’ 34Edzi nya gupwani Nungungulu a na mu wusa, ni gupwani gima kha na nga wona guhina, khiso si nga ganedwa umo nya milowo, yi gu, khiyo: ‘Nyi na tadzisela avbo gwanu situmbiso nya guage nyi na gira ga Dhavhidhe.’ 35Gu ngu ganedwa gambe ga yimbe Ndzimu gupwani: ‘Khu na nga dzumedzisa gukhuwe gihathwa gyago gi wone guhina.’ 36Wonani, Dhavhidhe fude hwane nya gu na enedzile matshigu nya thumo waye, na gu landrisa guhaladza gwa Nungungulu. Na dzingidwe, a di ya lala ni vababe vaye a gu hina. 37Aholu, oyu Nungungulu a nga mu wusago, kha wona guhina. 38Khalani na mu gu dziti, vandruye, gukhenu gutsetseledwa nya sighoho gwa gu tiviswa khu lina laye. 39Gu sayedwa gululama nya guvbelele, gule mu ngamba gu mana khu Nayo wa Mosi, gu ngu manwa khu muthu watshavbo a khodwago ga Jesu. 40Dzi woneleni, gasi si si dugeleli gwanu iso si nga ganedwa khu vaprofeti, nya gupwani:

41Wonani, enu vayeyisi;

liwugani mu mwalalega!

Khaguva nyi na wusa matshiguni yanu thumo moyo

nya gu, mwa sa khodwa, nari pwani mu diya khu gu embedwa.”

42Pawulo ni Bharinabha, na va dugide khu nyumbani nya nombelo, vathu va di ta va lomba, guta ganela gambe mahungu yaya khu Sabhadho yi landrelago. 43Na vbede tshangano, Vajudha nya vangi, ni vathu nya githawo ni gu khozela Nungungulu va di landrela Pawulo ni Bharinabha. Avo va di va khongotela va simama gu khala na va tumbegile wuhigoni ga Nungungulu. 44Khu Sabhadho yi nga landrelago, vathu vatshavbo va dhoropani va di tombana gu tapwa mahungu ya Nungungulu. 45Vajudha na va wone gutala nya vathu va di tala khu lidiwo, va gu ganedza ni gu poyila magana ya Pawulo. 46Aholu, Pawulo ni Bharinabha va di ganela khu gutiya, khavo: A diri fanelo gu hegula khenu gu embedwa mahungu ya Nungungulu. Aholu, kha nga mu ma bombago, ni olu mu dzi lamulago mwabune gukhenu kha mu fanedwi khu guvbanya nya gupindruge, khu kharalo, ethu hi na thendregedza hi ya ma ningela ga va nya mayigo. 47Kholu Pfhumu a hi rumide, khuye:

Eni nyi gu vegide kha nga wenengedzo nya mayigo

gasi u khale ndzila nya guvbanyiswe gwawe

kala mahegiso nya litigo.

48Va nya mayigo, na va pwide magana yaya, va di nengela, va gu rungudza mahungu ya Pfhumu; vatshavbo va nga bani va emisedwe gu hakha guvbanya nya gupindruge, va di khodwa. 49Mahungu ya Pfhumu ma di phalalega ni litigo latshavbo. 50Aholu Vajudha va di kutsedzela vanyamayi nya vakhodwa nya guthavisege, ni vama nya sitetema va dhoropani mule va wugela Pawulo ni Bharinabha kala va va tutumisa tigoni gwawe. 51Aholu, vapostoli va di phuphutha kudzudzwane migondroni gwawe, gu yeyedza guhambana navo, va phara ndzila va hongola dhoropani ga Ikoniya. 52Aholu, vapizane va di tala khu gunengela ni Liphuvbo nya Guage.

Currently Selected:

Mithumo 13: BGE2014

Highlight

Copy