Marko 3

Jesu a ngu vbanyisa muthu nya gugulimale libogo khu litshigu nya Sabhadho

(Matewu 12:9-14; Luka 6:6-11)

1Jesu a di bela nyaluphye nyumbani nya nombelo. A diromo umo muthu nya gulimale libogo. 2Vatshavbo va di khusa maho va mu khedza, gasi gu mu wona mwendro a na mu hawulugisa khu litshigu nya Sabhadho, vafela gu mu rwega nandru. 3Khavbo avbo, Jesu a di embela mwama nya gulimale libogo, khuye: “Delu u ta ema vbakari vbavba.” 4A di va wudzisa, khuye: “Ina gu ngu dzumedziswa khu litshigu nya Sabhadho gu gira silo nya sadi mwendro nya guvivbe, gani? Gu vbanyisa muthu, mwendro gu mu songa?” Aholu avo va di degula, basi. 5Jesu a di khedza vatshavbo va nga bani va mu randrede na gu garadzega khu gu wona guvivba nya myonyo yawe, a di embela mudwali, khuye: “Thawuludza libogo lago.” Uye a di li thawuludza, li hawuluga. 6Vafarisi va di duga vaya tshangana ni avo nya tsawa wa Herodhi va gu luga mano nya gu mu gusonge khayo.

7Jesu a di khuga a gu hongola siwoni ni vapizane vaye, a di landrwa khu gidzemo nya gingi gya Galileya, Judheya, 8ni Jerusalema, ni Idhumeya, Khisikheyi nya tsongo wa Joridhani, ni wubambe nya madhoropa ya Tiro ni Sidhoni. Gidzemo nya gingi, na gi pwide ndruma nya siliwugiso a nga gira Jesu, gi dita gwaye. 9Khavbo avbo, uye a di embela vapizane vaye va mu dongisela gingalavana gasi a si gundrwi khu vathu. 10Kha nga olu a nga bani a gu hawulugisa nya vangi dzingumbe dzawe nya dzingi, vathu vatshavbo va nga bani vari ni madwali va di hidzimela gwaye vafela gu mu kuha. 11Maphuvbo nya guvivbe nayo, ma gu mu wona, ma di khidzima mbeli gwaye ma gu ganela, khayo: “Uwe khuwe Mwamana wa Nungungulu.” 12Aholu, uye a di ma degudza a gu ma laya ma si embeli muthu.

Jesu a ngu hatha vapostoli

(Matewu 10:1-4; Luka 6:12-16)

13Khavbo avbo, Jesu a di gwela gigomoni, a gu rana avo a nga va gola. Avo va di hongola gwaye. 14A di emisa likhumi na vavili gasi va khala naye, ni gu va ruma gu gimbila va hevbudza Ivhangeli. 15A di va ninga tshivba nya gu hawulugise madwali ni gu gututumisa maphuvbo nya guvivbe.

16Malina yawe khaya: Simoni a nga mu thangisago lina la Pedro; 17Jakobe ni ndriyaye Johane, sanana sa Zebhedhewu, a nga va thangisago lina la Bhowanerige, gu tshamusago pwani: “Sanana nya Libara.” 18Andreya, Filipi, Bharitolomewu, Matewu, Tomasi, Jakobe, mwamana wa Alifewu, Tadhewu, Simoni, Mwama Mukhanani, 19ni Judha Sikarioti, a gu uye a nga mu ningelago.

Vahevbudzi nya nayo va ngu vala Jesu

(Matewu 12:22-32; Luka 11:14-23; 12:10)

20Khavbo avbo, a di hongola gaya ni vapizane vaye. Gidzemo gi di tombana nyaluphye nyamba mu ninga ni gikhati gidugwana nya gumane gu hodza. 21Valongo vaye, na va pwide esi, va dita gasi guta mu dzega, kholu va di pimisa nya gukhavo a di handruga.

22 # Wona gambe: Mat 9:34; 10:25. Ni vahevbudzi nya Nayo va nga bani va dzude khu Jerusalema va di khavo: “Uye a gu fumwa khu Bhelizebhu, khongolo nya maphuvbo nya guvivbe, gambe a gu tutumisa maphuvbo nya guvivbe khu tshivba ya Bhelizebhu.”

23Khavbo avbo, Jesu a di va rana a va wudzisa khu sipimaniso, khuye: “Gu ngu kodzega kharini Sathane a tutumisa Sathane? 24Mufumo wu dzi kabanisago khu mitsawa yi wugelanago khu gyawe, mufumo wowo kha wuyi danga. 25Ndranga yi dzi kabanisago yabune, ndranga yoyo kha yi na pindruga. 26Kharati nugo, Sathane a gu dzi kabanisa ni gu dzi wugela abune, kha na pindruga, a na mbembisa guralo. 27Mwalo a dzi kodzago gu bela nyumbani nya ndrena gasi gu yi phanga nyamba phela khu gu yi hunga. Hwane nya isoso, khavbo a dzi kodzago gu yi phanga. 28Khu lisine nyi ngu mi embelani gukheni: Muthu watshavbo a ngu kodza gu tsetseledwa sighoho ni guvivba gwatshavbo a ganelago nya guvale Nungungulu. 29#Wona gambe: Mat 12:32; Luk 1:10. Aholu uye a valago Liphuvbo nya Guage, kha na tsetseledwa, a na simama ni giwono gyaye kala gupindruga.” 30A di ganela kharato khu kotani va nga khavo a na ni liphuvbo nya guvivbe.

Mayi ni vandruye va Jesu

(Matewu 12:46-50; Luka 8:19-21)

31Khavbo avbo, a di vboha mayi waye ni vandriyaye, va ta ema khu vbavbandze va mu ranisa. 32Gidzemo gi di khade gi mu randrela, va mu embela, khavo: “U ngu vbwetwa khu mayi wago ni vandriyago, vbavbandze.” 33Aholu Uye a di va hakha, khuye: “Khu mani mayi wangu ni vandriyangu?” 34Na khusedzide maho a khedza vatshavbo va nga bani va khade va mu randrela, a di khuye: “Mayi wangu ni vandriyangu khavo ava. 35Kholu muthu watshavbo a girago gugola gwa Nungungulu khuye a gu ndriyangu nya mwama, nuye nya nyamayi ni mayi wangu.”

Currently Selected:

Marko 3: BGG2014

Highlight

Copy