Matewu 24

Jesu a gu tivisa gu pfhungumudwa nya Nyumba ya Nungungulu

(Marko 13:1-2; Luka 21:5-6)

1Jesu, na gu duga khu Nyumbani ga Nungungulu, vapizane vaye va di hidzimela gwaye gasi va mu yeyedza mavbahelo nya Nyumba ya Nungungulu. 2Aholu a di va hakha, khuye: “Mu ngu si wona satshavbo sesi? Khu lisine nyi ngu mi embeleni nya gukheni kha gi na tshala giwindri vbatshani nya giwindri gikwawe satshavbo si na pfhungumudwa.”

Guphela nya sisaniso

(Marko 13:3-13; Luka 21:7-19)

3Na khade mugigomoni nya Miolivha, va di hidzimela vapizane vaye, vaya mu wudzisa, nari avo venga, khavo: “Hi embele, lini si na gu dugelelago satshavbo soso? Giwonegiso muni gi na gu tivisago guta gwago ni guhegisa nya litigo?” 4Jesu a di va phindrula, khuye: “Dzi woneleni, gasi mu si kanganyiswi khu muthu. 5Kholu va nata nya vangi khu lina langu, vata, khavo: ‘Eni kheni Kristo.’ Va na pengisa nya vangi. 6Mu napwa na gu ganedwa khu dzinyimbi, ni ligwaha nya dzinyimbi, mu nga thurugini, kholu si na ni fanelo nya guphele khiso si girega, aholu khandri guhegisa. 7Mayigo ma na wugelana; ni mifumo yakone yi na wugelana niyo; dzi na manega dzindzala, mitungu ni sirevareva malangani nya gutale. 8Aholu satshavbo sesi a na bani ari guphela nya sitshaniso. 9Khavbo avbo, va na mi yisa gusaniswani, va na mi songa; mu na zondrwa khu mayigo yatshavbo, khu kotani nya lina langu. 10Avbovbo nya vangi va na thega, va zondrana ni gu ningelana khu gyawe. 11Va na tumbuluga vaprofeti nya vangi nya malipha, va na gu pengisago va nya gutala. 12Lihaladzo la va nya gutala li na dzidzila khu kotani nya guandre nya wulala; 13aholu uye a na gu tsaramago kala mahegiso a na vbanyiswa. 14Mahungu nya Yadi yaya nya Mufumo wa Nungungulu ma na huweledwa tigoni gwatshavbo gasi gu ninga wufakazi mayigoni gwatshavbo. Khu hwane nya ugo khavbo gu no tago guhegisa.

Tshanisa nya yikhongolo

(Marko 13:14-23; Luka 21:20-24)

15 # Wona gambe: Dhan 9:27; 11:31; 12:11. “Khu kharato, mwa gu wona manyala nya guthavise, ma thudwago khu muprofeti Dhaniyeli na ma romo vbawulangatunu nya gukatege, uye a hevbulago a na si pimise gwadi, 16avo va na gu bani varomo Judheya va na thavele sigomoni; 17uye a na gu bani a romo vbatshani nya nyumba a nga tshigi gasi guta dzega gilogyo nyumbani gwaye; 18uye a na gu bani a romo thembweni a nga bweleli hwane gasi guta dzega mwendra. 19Gu na bani ari tshanisa ga va nya dzimimba ni va nya gumamisa khu matshigu yoyo! 20Lombelelani gasi gu thava gwanu gu si dugeleli vbagirametunu, mwendro khu litshigu nya Sabhadho, 21#Wona gambe: Dhan 12:1; Gutu 7:14. kholu matshigu yoyo yi na manega tshanisa nya yikhongolo nya gu gima yi si gu manegi, gukhugela Nungungulu na vangide litigo kala matshigu ya muhuno. Gima kha yi na manega gambe. 22Nari pwani kha nga rodzisa matshigu yoyo, mwalo a nga vbweta gu vbanyiswa. Aholu, khu kotani nya sihathwa saye, a na ma rodzisa. 23Khu kharato, va guta mi embelani, khavo: ‘Kha mu mu woni Oyu Kristo’, mwendro sawe, khavo: ‘Kha mu mu woni Wule’, mu nga khodwi, 24kholu va na dugelela Vakristo ni vaprofeti nya malipha, va na gu girago siliwugiso nya sikhongolo, gule nya gu, samba gwadi, ambari sihathwa si na pengiswa niso. 25Nya gu mi embelani matshigu na ma nga romo. 26Khu kharato, va gu mi embelani, khavo: ‘Womo giwulani’ mu ngayi; va gukhavo: ‘Womo nyumbani’, mu nga khodwi. 27Kholu, kha nga ndzadzi yi lasago, yi wenengedza litigo latshavbo, gukhugela Khugadambo kala Pfoladambo, kharato nugo gu na girega gikhati a na tago Mwamana wa Muthu. 28#Wona gambe: Luk 17:37. Kholu avbo gi na gu manegago girumbi, khavbo ma na talago makoti.

Siyeyedzo nya guwuye gwa Mwamana wa Muthu

(Marko 13:24-27; Luka 21:25-28)

29 # Wona gambe: Isa 13:10; Ezek 32:7; Joy 2:31; Gutu 6:12-13. “Aholu hwane nya tshanisa yoyo, lidambo li na sivbala, ni ngima kha na wenengedza; dzinyeledzi dzi na thegela khu Ndzadzini, ni dzitshivba nya ndzadzi dzi na dzudzwa. 30#Wona gambe: Dhan 7:13; Gutu 1:7. Khavbo avbo, gu na wonega Ndzadzini giyeyedzo gya Mwamana wa Muthu, giyeyedzo gi na gu girago vathu vatshavbo nya mafu va lila khu gu wona Mwamana wa Muthu na guta vbakari nya lipfhi, na tade khu tshivba nya yikhongolo ni gidhumo. 31A na rumela dzingilozi dza Nungungulu gu womba pundru nya gudzume ngudzu, gasi gu tombanisa sihathwa sa maphuvbo yatshavbo ya mana, gukhugela mahegiso kala mahegiso nya mafu.

Gihevbudzo nya nguyu

(Marko 13:28-31; Luka 21:29-33)

32“Hevbulani khu gipimaniso nya nguyu: Wa gu thela matamo nya matenvura ni nyenvu, mu ngu dziti nya gukhenu yi ngu vboha nango nya maronga. 33Kharati nugo, mwa gu wona satshavbo soso, dzitini nya gukhenu uye womo vbafuvbi ni gu vboha vbamwanyatunu. 34Khu lisine nyi ngu mi embelani, kheni: Kha na vbindra mela yoyu na si si gu dugeleli satshavbo soso. 35Yi na vbindra ndzadzi ni mafu, aholu mahungu yangu gima kha ma na vbindra.

Khalani na mu dongide

(Marko 13:32-37; Luka 17:26-30,34-36)

36“Gasi litshigu ni gikhati, mwalo a si tigo, ambari dzingilozi dza Ndzadzini, ambari Mwamana; vbavbandze ga Babe basi. 37#Wona gambe: Gen 6:5-8. Kha nga idzo gu nga giregago khidzo matshiguni ya Nowa, kharato nugo gu na girega litshigu a na tago Mwamana wa Muthu. 38Na wu si gu dugi talo nya mati, vathu va di gu hodza ni gu sela; vama va di gu dzega, vanyamayi va di gu dzegwa, kala litshigu Nowa a nga belago litaroni. 39#Wona gambe: Gen 7:6-24. Kha va nga tugula gilo, kala gu vboha talo nya mati wu ngata va mwaladza vatshavbo. Kharato nugo gu na girega litshigu a na tago Mwamana wa Muthu. 40Litshigu lolo, va nata manwa vathu vavili thembweni: A na dzegwa moyo a gu tshidwa mumbe; 41vanyamayi vavili va nata manwa na va gu tshindra: A na dzegwa moyo a gu tshidwa mumbe. 42Khu kharato, khalani na mu dongide, kholu kha mu li ti litshigu yi tago Pfhumu yanu. 43Khalani na mu dziti nya gukhenu: Nari pwani mune ndranga a ngu giti gikhati yi na gu tago khigyo mbafa vbakari nya wutshigu a na gu ghadha, gasi a si phangedwi nyumba yaye. 44Khu kharato, enu nenu khalani na mu dongide, kholu Mwamana wa Muthu anata gikhati mu na gumba gi lindrela.

Sithumi nya guthembege niso nyamba thembega

(Luka 12:41-48)

45“Khu gevbini githumi nya guthembege, nya gugengele, gile gi na gu vegwago mbeli nya sithumi sikwawe khu pfhumu, gasi gu si ninga guhodza khu gikhati gi vbwetegago? 46Gi kategide githumi gile gi na guta manwago khu pfhumu yaye na gi nga gu vbanyisa guralo. 47Khu lisine nyi ngu mi embelani nya gukheni a na gi vega kha nga muthangeli nya silo saye satshavbo. 48Aholu, githumi gile gya gu bani giri ni monyo nya guvivbe, gi pimisa monyoni gwaye, kharati: ‘Pfhumu yangu yi ngu hwela,’ 49gi gu phela gu vetelela vangana vaye, gi hodza, gi sela ni dzibewudzi. 50Pfhumu yaye yi na wuya litshigu ni gikhati gi si si lindreligo. 51Githumi gile gi nata tsayiswa khu tshivba, bwelo khavbo, gi valedwa kha nga muthu nyamba tumbega; avbovbo gi na lila ni gu ketsa magwaha.

Currently Selected:

Matewu 24: BGG2014

Highlight

Copy