Matewu 19

Liendro nya guhegise la Jesu na guya Jerusalema

1Na vbedzide gu ganela esi, Jesu a di khuga khu Galileya a hongola Judheya, Khisikheyi nya tsongo wa Joridhani. 2A di landrwa khu sidzemo nya singi; uye vbale a di hawulugisa vatshavbo.

Lipango kha li dzi kodzi gu tshudwa

(Marko 10:1-12; Luka 16:18)

3Va dita avbo gwaye Vafarisi va ngata mu wudzisa, gasi gu mu linga, khavo: “Ina gu ngu kodzega gu mwama a hula mwangadzi waye khu gigaradzo nya gukari, gani?” 4#Wona gambe: Gen 1:27; 5:2. Jesu a di va hakha, khuye: “Ina mu si gu hevbulini nya gupwani: Gukhugela guhegulani, Nungungulu a di vanga mwama ni nyamayi, gani? 5#Wona gambe: Gen 2:24. Bwelo khavbo a ganela, khuye: Khu kharato, mwama a na diga babe ni mayi aya patana ni mwangadzi waye, va gu khala va vavili nyama mweyo, gani? 6Khu kharato, khandri vavili gambe, aholu nyama mweyo basi. Nari kharato, muthu kha dzi kodzi gu tshula egi gi hungidwego khu Nungungulu.” 7#Wona gambe: Dhet 24:1-4; Mat 5:31. Va di wudzisa, khavo: “Khu ginani Mosi a nga rumago gukhuye nyamayi a ningwe lidangalila nya musi gasi gu mu hula?” 8Jesu a di phindrula, khuye: “Mosi, a di mi dzumedzisani gu hula vagadzi vanu, khu kotani nya guvivbe nya myonyo yanu; aholu guhegulani khandri kharato. 9#Wona gambe: Mat 5:32; 1 Kor 7:10-11. Eni nyi ngu mi embelani, kheni: Uye a hulago mwangadzi waye, vbavbandze nya dzegano nya guloledziswe, a gu dzega wa walo, a ngu bhaya, uye a dzegwago khuye a nuye a ngu bhaya.” 10Vapizane va di mu embela, khavo: “A gu bani ari isoso siguruvedzo nya mwama ni mwangadzi waye, gwadi khu gumba dzega!” 11Jesu a di va hakha, khuye: “Khandri vatshavbo va ma hakhago gwadi mahungu yaya; ma gu hakhwa basi khu vale va gu ni giningwa gyogyo. 12Vomo va nga velegwa na va thenidwe, navo va nga ya khu gu thenwa khu vathu vakwawe, navo va nga dzi thenago vabune khu gufela Mufumo wa Ndzadzini. Uye a dzi kodzago gu ma pwisisa, a na ma pwisise!”

Jesu ni sanana

(Marko 10:13-16; Luka 18:15-17)

13Khavbo avbo, va di mu yisela sanana, gasi a si handzege mandza ni gu si lombelela. Aholu vapizane va di si himbedzela. 14Jesu a di va embela, khuye: “Digani sanana soso, mu nga si himbedzeli guta eno gwangu, kholu khwawe Mufumo wa Ndzadzini.” 15Na si handzegide mandza, a di phara ndzila yaye a gu hongola.

Lidzaha nya gitetema

(Marko 10:17-31; Luka 18:18-30)

16A di yedwa khu lidzaha limwedo li nga ya mu wudzisa, khilo: “Muhevbudzi nya wadi, ginani nya gyadi nyi fanedego gu gira gasi gu mana guvbanya nya gupindruge?” 17Jesu a di mu hakha, khuye: “Khu ginani u nyi ranago gukhuwe nyi wadi? Moyo basi a gu wadi khu Nungungulu. Aholu wa guvbweta gu mana guvbanya nya gupindruge, landrisa milayo.” 18#Wona gambe: Eks 20:14; Dhet 5:18; Eks 20:15; Dhet 5:19; Eks 20:16; Dhet 5:20. Lidzaha li di mu wudzisa, khilo: “Yevbini?” Jesu a di li hakha, khuye: “U nga songi muthu, u nga bhayi; u nga bi; u nga khali fakazi nya malipha; 19#Wona gambe: Eks 20:12-16; Levh 19:18. rungudza babe ni mayi; gola muthu kwanu kha nga idzo u dzi golago khidzo.” 20Lidzaha li di mu embela, khilo: “Nyi ngu landrisa satshavbo soso gukhugela wananani gwangu; ginani gi nga tshadego?” 21Jesu a di mu embela, khuye: “Wa guvbweta gu khala muthu a vbeledego, indra u ya rengisa satshavbo u gu naso, u ninga sisiwana, gasi u mane thomba ya Ndzadzini. Hwane nya isoso, delu uta nyi landrela.” 22Na li pwide mahungu yaya, lidzaha lile li di hongola na li gutshaniseka monyoni, kholu li diri ni dzithomba nya dzingi. 23Khavbo avbo, Jesu a di embela vapizane vaye, khuye: “Khu lisine nyi ngu mi embelani, gukheni: Gu na garadza ngudzu ga muthu nya gitetema gu bela Mufumoni wa Ndzadzini. 24Nyi ngu engedza gambe, kheni: Gu vbevbugide guvbindra ngameriya khu vbahogotunu nya tshingano guvbindra gu dzega gitetema gi bela Mufumo wa Ndzadzini.” 25Na va pwide esi, vapizane va di liwuga, khavo: “Kharati, khu mani a na gu vbulugago?” 26Jesu a di khedzisa gwadi vatshavbo, a va embela, khuye: “Ga vathu kha si kodzegi, aholu ga Nungungulu satshavbo si ngu kodzega.”

27Pedro a di khusa lito a mu embela, khuye: “Ethu hi digide silo sathu satshavbo hi gu landra. Libhaso muni hi na gu li manago?” 28Jesu a di va hakha, khuye: “Khu lisine nyi ngu mi embelani: Mufumoni wa Nungungulu, gikhati Mwamana wa Muthu a na khalago vbagikhalotunu gwaye nya gutale khu gidhumo, enu mu na nyi landrela, mu na khalani vbasikhalotunu, gasi gu lamulani mahundzu yatshavbo nya likhumi na mavili ya Israyeli. 29Gasi watshavbo wule a nga digago ndranga, vandruye, nya vama ni vanyamayi, babe, mayi, mwangadzi, sanana ni sipeto khu kotani nya lina langu, a na si mana na si engedzedwe lizana dzinyondro, bwelo khavbo a mana guvbanya nya gupindruge. 30#Wona gambe: Mat 20:16; Luk 13:30. Nya vangi va nya guphela va na bani vari mahegisela; gasi nya vangi va gu mahegisela va na bani vari va gu phela.

Currently Selected:

Matewu 19: BGG2014

Highlight

Copy