Matewu 13

Gipimaniso nya muyali

(Marko 4:1-9; Luka 8:4-8)

1Litshigu lile, Jesu a di khuga khu ndrangani a hongola siwoni aya khala. 2#Wona gambe: Luk 5:1-3. A di ya randredwa khu vathu nya vangi ngudzu, gu nga mu girago a bela ngalavani a khala, gidzemo gi ema khu funguni. 3Khu vbale, a di va hevbudza silo nya singi khu sipimaniso, a va embela, khuye: “Nga wonani, muyali a di duga gasi guya yala mbewu yaye. 4Na gu swaya, yimbe mbewu, yi di thegela bambe nya ndzila; si dita sinyoni sita yi rothela. 5Yimbe yi di thegela musiwindrini, umo ma nga bani mari mwalo mafu nya mangi; mbewu yi di vbiredzela gu buga, kholu mafu yakone kha ma nga bani ma etide ngudzu. 6Aholu, na li vbiside lihani, yi divbya. Kholu yi nga bani yiri mwalo mikhamba, yi di banga. 7Yimbe yi di thegela mibani; miba yi di dandra yi midza mbewu yile. 8Gasi khu guhegisa, yimbe yi thegela wulimeni nya wadi, yi di thela mihandro: Dzomo dzi nga thela lizana; dzimbe, livbandre na limwedo magumi; dzimbe, magumararu dzimbewu. 9Uye a gu ni dzindzeve nya guyingise, a napwe!”

Khu ginani a ganelago khu sipimaniso

(Marko 4:10-12; Luka 8:9-10)

10Khavbo avbo, vapizane va di mu yela vaya mu wudzisa, khavo: “Khu ginani u ganelago navo khu sipimaniso?” 11A di va hakha, khuye: “Kholu enu, mu ningidwe guti misihalo nya Mufumo wa Ndzadzini, gasi avo va mwalo giningwa gyogyo. 12#Wona gambe: Mat 25:29; Mark 4:25; Luk 8:18; 19:26. Kholu uye a gu naso a na engedzedwa, a gu mana nya singi; gasi uye a gu mwalo gilo ambari iso a gu naso, a na dzegedwa. 13Khiso isoso si nyi girago gu eni nyi ganela navo khu sipimaniso, kholu va ngu ronoga nyamba wona gilo; ni gu yingisa nyamba pwisisa. 14Ma ngu tadzisega gwawe mahungu ya muprofeti Isaya, ma gukhayo:

‘Gupwa mu na pwa, aholu kha mu na pima gilo;

na mu khedzide, mu na ronoga, aholu kha mu na wona gilo.

15 # Wona gambe: Isa 6:9-10. Kholu myonyo ya vathu vava yi bangide,

va segide dzindzeve ni maho yawe,

gasi va si woni khu maho,

va si yingisi khu dzindzeve,

ni gu mana gwadi tshamuselo wakone,

va vbindrugedze mavbanyelo,

gasi eni nyi va vbanyise.’

16“Gasi enu sanu, ma kategide maho yanu, kholu ma ngu wona; ni dzindzeve dzanu, kholu dzi ngupwa. 17#Wona gambe: Luk 10:23-24. Khu lisine nyi ngu mi embelani nya gukheni: Vaprofeti nya vangi ni va nya ndruda va vbwetide gu wona iso mu si wonago, aholu kha va si wona; ni gupwa iso mu si pwago, aholu kha va si pwa gilo.

Tshamuselo nya gipimaniso

(Marko 4:13-20; Luka 8:11-15)

18“Yingisani, nyi mi embele tshamuselo nya gipimaniso nya muyali. 19Muthu a gupwa mahungu nya Mufumo a si ma pimi ma gu thula ginani, a nata Sathane ata fugula iso si nga bani na si yadwe monyoni gwaye. Egi khu gipimaniso nya mbewu nya guthegele bambe nya ndzila. 20Mbewu yi nga thegela musiwindrini, khu wule apwago mahungu, a ma hakha khu gunengela gikhatinyana gyogyo. 21Kha nga ulo a gu mwalo mikhamba, kha tiya: Sa gu vboha sigaradzo ni sisaniseko khu kotani nya mahungu, a gu dzegela gu ma diga. 22Mbewu yi nga thegela mibani, khu wule a pwago mahungu; aholu sigaradzo nya guvbanye ni dzithomba nya mafu si midza mahungu, ma hegisago khu gumba thela gilo. 23Aholu mbewu yi nga yadwago wulimeni nya wadi, khu wule a pwago mahungu a ma ti ma gu thula ginani: Oyu a ngu thela mihandro nya yingi: Lizana, livbandre na limwedo magumi, magumararu.”

Gipimaniso nya nyasavare

24Jesu a di va ninga gimbe gipimaniso, khuye: “Mufumo wa Ndzadzini wu ngu fanana ni muthu a nga yalago mbewu nya yadi thembweni gwaye. 25Ni wutshigu, vathu na va lade, a di ta nala waye a ta yala nyasavare vbakari nya mavbila, a gu hongola. 26Na ma dandride mavbila, ma thela mihandro, wu di manega nuwo nyasavare. 27Sithumi sakone si diya ga mune ndranga si ya, khiso: ‘Pfhumu, khandri u di yala basi mbewu nya yadi thembweni gwago, gani? Nyasavare wa guta khu hayi?’ 28A di va hakha, khuye: ‘Nala wangu khuye a giridego isoso.’ Sithumi si di mu wudzisa, khiso: ‘U ngu dzina gukhuwe hi ya wu kulela, gani?’ 29A di va hakha, khuye: Ahihi, kholu mu nga phazamani avbo mu kulago nyasavare, mu kula gumogo ni mavbila. 30Si digeni si dandre satshavbo kala gu vboha nango nya guvbwere; gikhati gyogyo nyi na embela vavbweri, kheni: Dusani guphela nyasavare, mu wu hunga khu dzinyandra mu vbisa; gasi mavbila, ma pileni, mu ma thela gisangalani gwangu.”

Mbewu nya ginapi

(Marko 4:30-32; Luka 13:18-19)

31Jesu a di va ninga gimbe gipimaniso, khuye: “Mufumo wa Ndzadzini wu ngu fanana ni mbewu nya ginapi, muthu a nga yi dzegago a yala thembweni gwaye. 32Iyo yi dugwana guvbindra dzimbewu dzatshavbo, aholu, na yi dandride, yi ngu vbindra mitongwe yatshavbo ya thembweni, yi gu khala simbo nya khongolo, wu thela matamo, sinyoni sa damboni si tago sita vbahela umo sihaga sawe.”

33Jesu a di va ninga gambe gimbe gipimaniso, khuye: “Mufumo wa Ndzadzini wu ngu fanana ni mela wu nga dzegwago khu nyamayi moyo a wu pfanga ni ndrengo tharu nya wuguvbi, kala wu gugumugisa wuguvbi watshavbo.”

Jesu a ngu thumisa sipimaniso

(Marko 4:33-34)

34Jesu a di ganela satshavbo sesi khu sipimaniso vbakari nya gidzemo; gimwalo a nga ganela vbakari gwawe nyamba va embela khu sipimaniso. 35#Wona gambe: Dzind 78:2. Gasi gutadzisega kharati, magana ya muprofeti, a nga khuye:

“Nyi na ganela khu sipimaniso,

gasi gu tivisa silo si nga bani si sihalegide gukhugela guvangwa nya litigo.”

Tshamuselo nya gipimaniso nya nyasavare

36Khavbo avbo, a di diga gidzemo a gu hongola gaya; vapizane va di mu yela vaya, khavo: “Hi tshamusele gipimaniso nya nyasavare thembweni.” 37Uye a di va hakha, khuye: “Wule a yalago mbewu nya yadi, khu Mwamana wa Muthu. 38Lithembwe khu litigo; mbewu nya yadi khu sanana nya Mufumo; nyasavare khu sanana sa Sathane; 39nala a nga yalago nyasavare khu Sathane. Gu vbwera khu guhegisa nya litigo; vavbweri khu dzingilozi. 40Khu kharato, kha nga nyasavare wu kokedwago wu vbiswa niloni, kharato nugo gu na girega guhegisani nya litigo: 41Mwamana wa Muthu a na rumela dzingilozi dzaye dzi dusela Mufumoni gwaye satshavbo sikhunguvanyiso ni ava va girago guvivba, 42si va rinya niloni, umo va na guya lilago ni gu ketsa magwaha. 43Gasi va nya ndruda va na ngangamela kha nga lidambo, mufumoni wa Babe wawe. Uye a gu ni dzindzeve a na yingise.

Gipimaniso nya thomba ni ndralama

44“Mufumo wa Ndzadzini wu ngu fanana ni thomba yi nga sihwago mahangeni yi gu tugudwa khu muthu, a yi fulusa a yi siha wumbe wulanga. Na tade khu gunengela, a di ya rengisa satshavbo a nga bani ari naso, gasi gu renga mahange yale. 45Mufumo wa Ndzadzini wu ngu fanana gambe ni muthu nya wugwewo, a vbwetago dzindralama nya dzadi. 46Na mane ndralama mweyo nya gurengwe khu dzitsapawu nya dzingi, a di hongola aya rengisa satshavbo a gu naso, gasi gu renga ndralama yile.

Gipimaniso nya dzikhoga

47“Mufumo wa Ndzadzini wu ngu fanana gambe ni dzikhoga dzi theswago matini dzi mola mafumbu yatshavbo nya dzindzandzi. 48Na dzi tade, dzi ngu ndrindredwa dzi duswa funguni, avbo vagogi va hathelago dzindzandzi, idzo nya dzadi va thela lisengweni, idzo nyamba dzadi va dzi dzudzuga. 49Khidzo kharati gu na giregago guhegisani nya litigo: Dzi na duga dzingilozi dzi ta hambanisa avo nyamba vadi vbakari nya va nya ndruda, 50dzi va rinya niloni, umo va na gu lilago ni gu khukhurusa magwaha.

Silo nya siphya niso sa gale

51“Mu si mane satshavbo sesi nyi mi embedego, gani?” Va di hakha, khavo: “Ina.” 52Khavbo avbo, a di va embela, khuye: “Khu kharato, muhevbudzi watshavbo nya Nayo a hevbudego iso si lumbago Mufumo wa Ndzadzini a ngu fanana ni mune ndranga a dusago khumo nya thomba yaye silo nya siphya niso sa gale.” 53Hwane nya gu na vbedzide gu va ninga sipimaniso sesi, Jesu a di khuga khu vbale.

Jesu kha hakhwi tigoni gwa Nazareta

54Na vbohide tigoni gwawe, a di va hevbudza nyumbani nya nombelo. Vatshavbo va di tala khu guliwuga, va gu wudzisana, khavo: “A gu gu mana hayi guti gogu ni tshivba nya gugire siliwugiso? 55Ina khandruye oyu mwamana wa muvati, gani? Ina mayi waye khandri Mariya? Vandriyaye khandri Jakobe, ni Josefe, ni Simoni ni Judha? 56Vandriyaye nya vanyamayi khandravo hi vbanyago navo tigoni momu? A gu si mana hayi satshavbo sesi?” 57Khu kharato, va di hiwa khuye. Aholu, Jesu a di va embela, khuye: “Muprofeti a gu nyenywa basi tigoni ni ndrangani gwawe.” 58#Wona gambe: Joh 4:44. Kha dzi kodza gu gira vbale siliwugiso nya singi khu kotani nya gumba khodwa nya vathu vale.

Currently Selected:

Matewu 13: BGG2014

Highlight

Copy