Luka 16

Muthangeli nyamba tumbega

1Jesu a di embela gambe vapizane, khuye: “A diromo mwama moyo nya gitetema a nga bani ari ni muthangeli nya silo saye. Va diya mu lemba ga mune ndranga, khavo: ‘A ngu phalalegisela thomba yago.’ 2Mune ndranga a di rana muthangeli a mu wudzisa, khuye: ‘Nyi ngupwa vathu nya vangi na va gu regera khuwe. Gasi mahungu muni? Nyi yeyedze mithumo u giridego, kholu nya guvbweta gu gu dusa thumoni.’ 3Muthangeli wule a di hingigedza, kharati: ‘Nyi na rini, olu, mune ndranga a nyi tutumisago? Gu lima, kha nyi kodzi; gu lomba zomola, nyi na ni dzitshoni. 4Nyi ngu giti igyo nyi na girago, gasi nya gu tutumiswa nyi mane uye nya guhakhwe khuye.’ 5A di rana va nya mangava khu moyo ni moyo. A ta wudzisa uye nya guphele, khuye: ‘Mangava muni u gu nawo ga pfhumu yangu?’ 6Uye a di khuye: ‘Lizana mipimo nya mafura.’ Muthangeli wule a di khuye: ‘Khala vbavbatshi khu guvbiredza u lova vbagibhukwanatunu gwago, khuwe: Livbandre magumi.’ 7Khavbo avbo, a di wudzisa mumbe, khuye: ‘Ahati uwe, mangava muni u gu nawo?’ A di khuye: ‘Lizana dzindrengo nya mavbila.’ A di mu embela, khuye: ‘Dzega gibhukwana gyago u lova, khuwe livbandre na mararu magumi.’ 8Pfhumu yi di zundza muthangeli wule nyamba tumbega khu wugengeli waye. Khu lisine, vathangeli nya silo nya mafu va gengede guvbindra vathangeli nya silo sa Nungungulu umo nya wugwewo wawe ni vathu vakwawe. 9Eni neni nyi ngu mi embelani, kheni: Thangani wupari khu dzithomba dza tigoni momu, gasi na dzi vbede, mu ya hakhwe khu dzipari dzodzo Ndzadzini.

10“Uye a tumbegago avbo nya silo nya sidugwana, a na tumbega gambe avbo nya singi; gasi uye a si tumbegigo avba nya sidugwana, kha na tumbega gambe avba nya singi. 11Kholu, mwa gu bani mwa sa tumbega vbadzitsapawutunu, a gu gilo nyamba phasa, khu mani a na gu mi tumbago avba nya silo nya sadi nya lisine? 12Mwa gu bani mwa sa tumbega mu siloni sa vane, khu mani a na gu mu ningago iso si gu sanu? 13#Wona gambe: Mat 6:24. Mwalo a dzi kodzago gu thumela dzipfhumu dzimbili. Kholu a na zondra mweyo a gola yimbe; mwendro saye gu girela ndruda mweyo, a nyenya yimbe. Kha mu dzi kodzi gu thumela Nungungulu ni dzitsapawu.”

Nayo wa gale nuwo nya wuphya

(Matewu 11:12-13; 5:31-32; Marko 10:11-12)

14Vafarisi, kha nga ulo va nga bani vari vathu nya ligungo, na va pwide magana ya Jesu, va di mu hembulula. 15Jesu a di khuye: “Enu mwa guvbweta gu zundzwa kha nga vathu nya ndruda, vbakari nya vathu, aholu Nungungulu a ngu wona myonyo yanu. Kholu iso si khusegidego mahoni nya vathu si nyenyezide mahoni ga Nungungulu. 16Nayo ni sihevbudzo nya vaprofeti si thumide kala matshiguni ya Johane. Gukhugela avbo gu ngu hevbudwa Mahungu nya Yadi nya Mufumo wa Nungungulu. Muthu ni muthu a gu zama gu bela khu tshivba. 17Gu ngu vbevbuga ngudzu gu mwalalega ndzadzi ni mafu, guvbindra gu futega tseneno wudugwana vbanayotunu.

18 # Wona gambe: Mat 5:32; 1 Kor 7:10-11. “Muthu watshavbo a hulago mwangadzi waye, a dzega mumbe, a ngu bhaya; oyu nuye a dzegago nyamayi nya guhudwe, a ngu bhaya.”

Gipimaniso nya gitetema nya ligungo

19A diromo mwama moyo nya gitetema a nga bani a gu ambala dzingandzu nya wuzundzo ni gu hodza gwadi matshigu yatshavbo. 20Gi diromo nigyo gisiwana nya gupwani khu Lazaro, gi nga bani gi tade khu silondra. Gi di ya khala nyangwani ya gitetema, 21na gi gu pimisa khigyo mwendro gi na botedzela dzitsheta dzi nga bani dzi gu thega khu vbamezatunu gwaye. Gu di dzega ni dzimbwa dzi ta mu dandzela silondra.

22“Tshigu mwedo gi difa gisiwana gile, gi dzegwa khu dzingilozi dza Nungungulu gi yiswa vbafuvbi ga Abrahama. Mwama nya gitetema a difa nuye, aya dzingwa.” 23Na romo phalani nya nilo vbakari nya tshanisa, a di khusa maho a gu wona Abrahama nari hwindzo ni Lazaro mawogoni gwaye. 24Khavbo avbo, a di khuye: Baba Abrahama, nyi pwele wusiwana u nyi rumela Lazaro ni simatyana khu nyala ata nyi dzidzidza lidimi, kholu nyi ngu dagarela vbakari nya nilo yoyu. 25Abrahama a di hakha, khuye: Mwanangu, dundruga nya gukhuwe u hakhide thomba yago u nga gu vbanya, gasi Lazaro a di mana basi sisaniseko. Olu uye a ngu tangadziswa, gasi uwe u ngu saniseka. 26Gu diga nya isoso, vbakari gwathu ni enu womo nondrwa nya guthise nya khongolo kamwe ngudzu, nya gu ambari na hi dzinide guta iyo gwanu, kha hi dzi kodzi, kha nga enu nenu mu si dzi kodzigo, guta eno gwathu. 27Gitetema gi di simama, khigyo: Nyi ngu gu lomba, ama baba, rumela Lazaro ndrangani gwathu, 28kholu nyi na ni livbandre vandruye, gasi aya va laya va siti navo wulangani wowu nya gusaniseke. 29Abrahama a di mu hakha, khuye: “Va na ni Mosi ni vaprofeti; va na va yingise!” 30Gasi gitetema gi di, khigyo: “Ahihi, baba Abrahama, nari pwani mufi moyo a nguya va tivisa, na va gu vbindrugedza mavbanyelo.” 31Abrahama a di hakha, khuye: Va gumba yingisa Mosi ni vaprofeti, ambari na wugide mufi, kha va na mu thela kota.

Currently Selected:

Luka 16: BGG2014

Highlight

Copy