Luka 12

Gu dzi wonela ga Vafarisi

(Matewu 10:26-27)

1 # Wona gambe: Mat 16:6; Mark 8:15. Kha nga ulo ma nga bani ma romo mazana nya vathu va nga bani va gu gundrana khu gu tala, Jesu a di phela khu gu embela vapizane vaye, khuye: “Gwadigwadi ni mela nya Vafarisi, a gu malipha. 2#Wona gambe: Mark 4:22; Luk 8:17. Gi mwalo gi nga sihwa gi na gumba tugudwa; kha nga gambe, mwalo sihalo wu na gumba tidwa. 3Khu kharato, iso mu nga si ganela mugidemani si na pwala muguwonegelani; niso mu ngaya khu gu lemba, na mu sihade makhuvini, si na laledzwa khu vbatshani nya sikoli nya dzinyumba.”

Uye a fanedego gu thawa

(Matewu 10:28-31)

4Jesu a di engedza, khuye: “Nyi ngu mi embelani, enu dzipari dzangu: Mu nga thavi ava va songago givili, na va si dzi kodzi gu gira gimbe gilo. 5Nyi na mi yeyedza uye mu fanelago gu mu thava: Thavani wule a gu ni tshivba nya gusonge ni gu rinya phalani nya nilo. Oyu khuye nya gufanele gu mu thava. 6Ina kha si rengwi livbandre sinyoni khu kinyeta mbili, gani? Ambari ulo, gimwalo ni gimwegyo gi si thedwigo kota khu Nungungulu. 7Ambari khu ndzudzu wanu watshavbo wu sayedwe. Mu nga thavi; enu mu na ni giphaso ngudzu guvbindra sinyoni nya singi.

Gufakaza Jesu vbakari nya vathu

(Matewu 10:32-33; 12:32; 10:19-20)

8“Nyi ngu mi embelani, kheni: Uye a nyi dzumelago vbakari nya vathu, Mwamana wa Muthu nuye, a na mu dzumela vbakari nya dzingilozi dza Nungungulu. 9Gasi uye a na nyi dangago vbakari nya vathu, a na dangwa nuye vbakari nya dzingilozi dza Nungungulu. 10#Wona gambe: Mat 12:31-32; Mark 3:28-29. Muthu watshavbo a hembululago Mwamana wa Muthu, a na tsetseledwa; aholu, uye a hembululago Liphuvbo nya Guage, gima kha na nga tsetseledwa. 11Mwa gu yiswa dzinyumbani nya milombelo ni ga vafumeli, nya mayigo, mu nga garadzegi khu phindrulo mu na guya dzi vhikelago khiyo, 12kholu Liphuvbo nya Guage li na mi hevbudza phindrulo mu na va ningago.”

Gwadigwadi ni wufu

13Vbakari nya gidzemo a di duga mwama moyo a nga khuye: “Muhevbudzi, embela ndriyangu a nyi kabanisa neni thomba.” 14Aholu Jesu a di hakha, khuye: “Ama sawu, khu mani a nga nyi gira mulamuli mwendro mukabanisi nya dzithomba dzanu?” 15A di simama gu ganela, khuye: “Mu ngu pwani, dzi woneleni ni wudogodogo watshavbo, kholu guvbanya nya muthu kha gu valedwi khu thomba yaye, ambari na yi tade nya guwani.”

16Khavbo avbo, a di va embela gipimaniso gegi: “Gi diromo gitetema nya gukari gi nga fumago dzimbewu nya dzingi. 17Gi di alakanya monyoni gwaye, kharati: ‘Nyi na gira kharini nya nga olu nyi gu mwalo wulanga nya guvegedzele dzimbewu dzangu?’ 18Na pimiside gwadi a di tugula mano, khuye: ‘Nyi ngu giti igyo nyi na girago. Nyi na pfhungumula sisangala sangu, nyi vbaha nya sikhongolo, gasi gu vega umo dzimbewu dzangu ni silo sangu satshavbo. 19Khavbo avbo, nyi na embela hefemulo wangu, kheni: Hefemulo wangu, u nga saniseki; hodza, sela, tangala, kholu u fumide thomba u na hodzago myaga nya mingi.’ 20Aholu Nungungulu a di mu embela, khuye: ‘Gipumbu gikhongolowe! Wutshigu wa muhuno va na gu dzegela hefemulo wago. Esi u nga vegedzelago si na tshalela mani?’ 21Khidzo kharati gu na giregago ga wule a dwanelago gu fuma thomba nya yingi, aholu nasiri gitetema ga Nungungulu.”

Nungungulu kha divaledwi khu vathu vaye

(Matewu 6:25-34)

22Khavbo avbo, Jesu a di embela vapizane vaye, khuye: “Khidzo kharato nyi mi embelago, kheni: Mu nga garadzegi khu guvbanya gwanu, na mu pimisa, khenu: Ginani hi na hodzago? Mwendro sanu khu givili gyanu, na mu pimisa, khenu: Ginani hi na gu ambalago? 23Kholu guvbanya gu ngu vbindra guhodza; ni givili gi ngu vbindra guambala. 24Nga wonani vamahigonganye. Kha va yali, kha va vbweri, va mwalo githunga, mwendro saye gisangala, ambari ulo, Nungungulu a ngu va hodzisa. Ina uye Nungungulu a na divaledwa khu enu mu gu ni giphaso guvbindra sinyoni, gani? 25Khu mani, vbakari gwanu, a dzi kodzago gu laphisa matshigu nya guvbanye gwaye khu kotani nya gu dzi garadze gwaye? 26Olu mu tandrwago khu gu gira silo nya sidugwana mwa gu dzi garadzela ginani khu simbe. 27#Wona gambe: 2 Dzipf 10:4-7; 2 Dzik 9:3-6. Nga wonani senge, idzo si dandrago khidzo! Kha si thumi gambe kha si lugi dzitshalu. Aholu nyi ngu mi embelani nya gukheni: Ambari Solomoni, gufumani gwaye gwatshavbo, kha ambala kha nga gimwegyo gyakone. 28Ambari nya gukhenu mwasi, nya gu muhuno womo thembweni, mindru wu gu rinywa niloni, wu ambagiswago kharati khu Nungungulu, guwani enu, vathu nya gukhodwe vbadugwanana? 29Mu nga garadzegi khu gilo mu na hodzago nigyo mu na selago; mu nga vbwetini gu siti soso. 30Kholu va nya mayigo khavo va dwanelago silo sesi satshavbo. Gasi enu mu na ni Babe wanu a sitigo satshavbo iso mu si vbwetago. 31Guphela, dwanelani Mufumo wa Nungungulu satshavbo simbe mu na ningwani kha nga libhaso.”

Thomba ya Ndzadzini

(Matewu 6:19-21)

32Jesu a di engedza, khuye: “Mu nga thavi, tshambi dugwana, kholu Babe wanu dzinide gu mi ninga mufumo waye. 33Rengisani dzithomba dzanu, mu kabanisela sisiwana. Sonani sikhwama nyamba hagala, mu wungedzela Ndzadzini thomba nyamba vbela, iyo yi si dzi kodzigo gu phangwa khu dzimbafa ni gu hodzwa khu muhwa, 34kholu avbo yi na bani yiromo thomba yanu, khavbo yi na manegago myonyo yanu.

Khalani na mu dongide

35“Khalani na mu hungide siwunu sanu, na mu khondriside myenge yanu. 36Kha nga sithumi si lindrelago pfhumu yawe, gu a wuye khu gulowolatunu, gasi guta mu tulela lidimba. Gikhati a na vbohago ata khokhotha. 37Si kategide sithumi sile si na ta manwago khu pfhumu yawe na si lindrede. Khu lisine nyi ngu mi embelani nya gukheni: A na sumela mwendra mu giwununi, a gu si khadzisa vbavbatshi, gasi gu si phamela. 38A guta khu gikhati nya wuvili ni gikhati nya wuraru, ata si mana na si nga gu lindrela, si na bani si kategide sithumi soso. 39Yingisani gwadi: Nari pwani mune ndranga a di gi tide gikhati yi nga vbweta guta mbafa, na sa diga ndranga yaye yi phangwa. 40Enu nenu, khalani na mu dongide, kholu Mwamana wa Muthu a na vboha gikhati mu na gumba gi pimisa.”

Sithumi nya gutumbege niso nyamba tumbega

(Matewu 24:45-51)

41Pedro a di mu wudzisa, khuye: “Pfhumu, khu gipimaniso gyogyo wa gu thula basi ethu mwendro wa gu thula vathu vatshavbo?” 42Pfhumu a di phindrula, khuye: “Khu gevbini githumi nya guthembege, nya gugengele, gile gi na vegwago mbeli nya sithumi sikwawe khu mune ndranga, gasi gu ninga guhodza sithumi sikwawe khu gikhati gi vbwetegago? 43Gi kategide githumi gi nata manwago khu pfhumu yaye na gi nga gu vbanya kharato. 44Khu lisine nyi ngu mi embelani nya gukheni a na gi vega kha nga muthangeli nya silo saye satshavbo. 45Aholu githumi gile gya gu pimisa, kharati: ‘Pfhumu yangu a ngu hwela gu vboha’, gi gu phela gu vetelela sithumi, gi hodza, gi sela, gi leva, 46gikhati a na wuyago mune ndranga gi nata manwa na gi pfhade, nyamba lindrela litshigu, mwendro gikhati. Khu kharato, gi na duswa vbawulangatunu vbale, gi gu saywa kha nga moyo nya vale nyamba tumbega. 47Githumi gile gi na gumba dzi dongisela ni gu gira gugola ga pfhumu yaye nya gigwenye, gi na tsayiswa khu dzimboma nya dzingi. 48Gasi gile gi na girago, khu wuhangi, silo si fanelago dzimboma, gi na kwapwa vbadugwanana. Kholu, ga wule a nga ningwa nya singi a na hengudwa ngudzu; wule a nga thembwago ngudzu a na lombwa ngudzu.”

Vathu va na wugelana khu kotani ya Jesu

(Matewu 10:34-36)

49“Eni nyi dzude nyita rotha luvbya tigoni. Khu gugola gwangu nyi di guvbweta gukheni nilo wowu wu dzure khu tshivba. 50Gu ngu vbwetega gu eni nyi hakhe gubhapatiswa nya gukari. Nyi ngu saniseka ngudzu kala gu esi si girege. 51Mwa gu hingigedza nya gukhenu nyi di resa gurula mafuni momu, gani? Nyi ngu mi embelani, kheni: Ahihi. Nyi di resa guhambanelana. 52Kholu, gukhugela muhuno va na bani va romo livbandre vathu ndranga mweyo na va kaseganide: Vararu va na wugela vavili, vavili va wugela vararu. 53Babe a na wugela mwanaye, mwamana a na wugela babe; mayi a na wugela mwanaye, nyamahegyane a na wugela mayi; ni mayinasale a na wugela ngadzamwane, ngadzamwane a na wugela mayinasale.”

Giyeyedzo nya dzinango

(Matewu 16:2-3)

54A di embela gambe gidzemo, khuye: “Mwa gu wonani lipfhi na li khuga khu Muhwadambo, mwa gu dzegela gukhenu: ‘Yi nguta ndzadzi.’ Gu gu khala idzo kamwe. 55Ya gu furugedza phuvbo khu Marandzi, mwa gu ganela, khenu: ‘Li na manega lithonga.’ Li gu manega kamwe. 56#Wona gambe: Mat 12:38-42; Luk 11:29-32. Vapembinu, mu kodzago gu tshamusela siyeyedzo sa mafuni ni Ndzadzini, khu ginani mu hangwago khu gu tshamusela gikhati gegi? 57Khu ginani mu si tuguligo mwabune, esi si lulamidego?

58“Khu kharato, wa gu hongola ni nala wago ga vafumeli, zama gu mu khongotela na mu ngari ndzilani, a ngaya gu ningela ga mulamuli, mulamuli a gu ningela ga ndruna, ndruna yi ya gu khothela pasoni. 59Nyi ngu gu embela, khu lisine, nya gukheni: Khu na duga khu mule nu si gu livbi mangava yatshavbo.”

Currently Selected:

Luka 12: BGG2014

Highlight

Copy