Genesi 2
2
Muthu hungo nya sivangwa satshavbo
1Wu di vbela kharati thumo watshavbo nya guvange ndzadzi ni mafu ni satshavbo si guromo umo.
2 # Wona gambe: Eks 20:11; Hebh 4:4,10. Khu litshigu nya livbandre na mavili, Nungungulu, na vbedzide thumo waye watshavbo a wu giridego, a di hefemula. 3Nungungulu a di kategisa litshigu lolo nya livbandre na mavili, li khala litshigu nya guphasedwe Uye, kholu khilo litshigu a nga hefemula migaralo nya thumo watshavbo nya guvange, owu Nungungulu a nga wu thumago.
Guvangwa nya muthu
4Owu khuwo sasamedzo nya matimo nya guvangwe ndzadzi ni mafu, gikhati Pfhumu Nungungulu a giridego ndzadzi ni mafu. 5Gu di ngari mwalo misimbo mafuni, ni mwasi wu di si gu bugi, kholu Pfhumu Nungungulu a di si gu wisi ndzadzi mafuni, gambe gu diri mwalo muthu nya gulime mafu. 6Khu guralo, mafuni gu di gu buga gifefe nya mati ma nga bani ma gu naganisa gwatshavbo. 7#Wona gambe: 1 Kor 15:45. Khu guralo, Pfhumu Nungungulu a di wumba muthu khu kudzudzwane nya mafu a gu mu furugedza dzithonvuni, a mu thela liphuvbo nya guvbanye. Muthu a di khala givangwa nya guvbanye.
8 Pfhumu Nungungulu a di yala lithembwe Edheni, khu phuvbo ga Khugadambo a gu vega umo muthu a nga mu wumbago. 9#Wona gambe: Gutu 2:7; 22:2,14. Pfhumu Nungungulu a di bugisa tigoni mafumbu yatshavbo nya misimbo nya mihandro nya gutsakise gu yi wona, ni gutshamba gu yi hodza. Vbakari nya lithembwe a di vega simbo nya womi, ni simbo nya guti gu hambanisa iso nya sadi niso nyamba sadi.
10Wu di buga tsongo Edheni wu naganisa lithembwe, wu di kabanega khu mitsongo mina. 11Lina nya owu nya guphele khu Pisoni; khuwo wu dzuwulugelago litigo la Havhila, li gu na ni ndralama nya yingi. 12Ndralama ya tigoni momo khyadi ngudzu, vbale gambe momo mafura nya gunungele gwadi, ni siwindri nya lisima.
13Lina nya tsongo nya wuvili wa gu ranwa pwani Giyoni wu dzuwulugelago litigo latshavbo la Kusi.
14Lina nya owu nya wuraru gupwani Tigre, wa guvbindra khu phuvbo ga Khugadambo ga litigo la Asiriya; tsongo nya wu na gupwani Ewufrate.
15 Pfhumu Nungungulu a di vega muthu thembweni ga Edheni, gasi a li lima ni gu li sayisa.
16 Pfhumu Nungungulu a di mu ninga milayo yeyi, khuye: “U na hodza mihandro nya misimbo yatshavbo nu tshulegide, 17aholu handro nya simbo nya guti gu hambanisa silo nya sadi niso nyamba sadi, u nga wu hodzi. Kholu litshigu u na gu wu hodzago u nafa.”
Guwumbwa ga nyamayi
18 Pfhumu Nungungulu a di engedza gambe, khuye: “Khandri gwadi mwama gu khala ekha. Nyi na mu girela mubangaladzi nya idzosaye ni uye.”
19Khu guralo, Pfhumu Nungungulu na wumbide khu mafu talo nya mafumbu nya sirengo sa khabini ni sinyoni sa damboni a di si bikela ga muthu gasi gu wona malina muni a na si ningago. Lina a nga ningago ga gimwegyo ni gimwegyo nya sivangwa soso nya guvbanye, khilo gi tidwago khilo.
20Muthu a di riya malina nya sifuyo satshavbo sa ndrangani, sinyoni sa damboni ni sirengo nya likhabi, aholu kha nga mana muphasedzeli nya gu mu yele.
21Khavbo avbo, Pfhumu Nungungulu a di thela ligovbe nya likhongolo muthu a gu lala. Na modwe khu ligovbe, Nungungulu a di mu dusa limbambo limwedo a gu bugisa tshonge wulanga waye. 22Khu limbambo a nga dusago khu ga mwama, Pfhumu Nungungulu a di gira nyamayi a gu mu bikela ga mwama.
23Mwama a di nengela, khuye:
“Ina na, khu woni, olu,
aya marambo nya marambo yangu
ni nyama nya nyama yangu.
A na ranwa gupwani nyamayi;
kholu dusidwe khu ga mwama.”
24 # Wona gambe: Mat 19:5; Mark 10:7-8; 1 Kor 6:16; Efes 5:31. Khu gighelo gyogyo, mwama a na diga ndranga ya babe ni mayi waye aya patana ni mwangadzi waye, va vavili va gu khala muthu moyo basi.
25Mwama ni nyamayi va di khala wumbwiri, aholu va vavili va di si dzipwi dzitshoni khu isoso.
Currently Selected:
Genesi 2: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
