Genesi 13

Loti a ngu hambana ni Abrama

1Abrama a di duga tigoni ga Egipito a gu bela khu ndzila nya guhongole Negebhi gumogo ni mwangadzi waye ni silo saye satshavbo. Loti a diri gumogo naye. 2Abrama a di fumide ngudzu mitshambi, parata ni ndralama.

3A di wuya khu Negebhi a ta Bheteli, wulanga a nga tsitsa avbo mitshatsha yaye guphela, vbakari ni vbakari nya gu eno khu Bheteli, eno khu Hayi, 4wulanga wule a nga vbahago avbo giluvelo nya guphele. Khavbo vbale a nga gira miphaso a gu rana lina la Pfhumu Nungungulu.

5Loti a nga bani a gu gimbila gumogo ni Abrama a diri nuye ni mitshambi, dzimombe ni mitshatsha nya yingi. 6Khu guralo, gu di si dzumelegi gu khala dangamwedo kholu wulanga wu di khala wudugwanana, nyamba enela gu vega umo thomba ya muthu ni muthu. 7Gu di phela gu wuga siregera ga vahavisi va Abrama ni ava va Loti. Khu matshigu yoyo Vakhanani ni Vaperezi va di gu vbanya navo tigoni mule.

8Khavbo avbo, Abrama a di embela Loti, khuye: “Khandri gwadi gu manega siregera ni guhambana vbakari gwathu mwendro ga vahavisi vathu, kholu hi va ndranga mweyo. 9U na ni litigo latshavbo mbeli gwago. U ngu dzi kodza gu hatha umo u gunago. Nya gu gu lomba gukheni hi hambanelane malanga. Wa gu hongola nyambade, eni nyi na hongola nyamudye, wa gu hatha nyamudye, eni nyi na hongola nyambade.”

10 # Wona gambe: Gen 2:10. Loti a di khedzisa lipani latshavbo nya tsongo wa Joridhani. Lithembwe li di theledzedwe gwadi mati, gufanane ni Egipito, li anama kala gu vboha tigoni gwa Zowari. Esi satshavbo si giregide Pfhumu Nungungulu na si gu khungumuli Sodhoma ni Ghomora. 11Loti a di hatha kova wa Joridhani, a gu dzega ndzila nya gukhedze Khugadambo. Va di hambana kharati Abrama ni Loti. 12Abrama a di vbanya tigoni gwa Khanani, aholu Loti a di ya vbanya madhoropani ya kovani wa Joridhani, a gu vbaha mitshatsha yaye vbafuvbi ni lidhoropa la Sodhoma. 13Vathu va Sodhoma va di vivbide ngudzu myonyo yawe, va di gira iso si hambanago ni gugola gwa Nungungulu. 14Hwane nya gu Loti na bede khu yaye ndzila, Pfhumu Nungungulu a di embela Abrama, khuye: “Gukhugela wulanga wowu u guromo avbo, khusa maho yago u khedzisa Wuronga ni Marandzi, Khugadambo ni Muhwadambo! 15#Wona gambe: Mith 7:5. Kholu litigo latshavbo u li wonago, nyi na gu ninga uwe ni sanana sago kala gupindruga. 16Nyi na gira sanana sago si tala ngudzu kha nga mafu. Mwalo muthu a dzi kodzago gu saya dzitshota nya mafu. Khidzo gambe kharato, mwalo muthu a na gu dzi kodzago gu saya sanana nya livelego lago. 17Olu dzuwulugela u wona litigo leli khu maphuvbo yatshavbo, kholu nyi na gu ninga li khala lago.”

18Abrama a di sigulela mitshatsha yaye a gu hongola aya vbanya misimboni nya yikhongolo ya Mambre, tigoni gwa Hebroni. A di vbaha avbo giluvelo, a gira phaso nya mhamba ga Pfhumu Nungungulu.

Currently Selected:

Genesi 13: BGG2014

Highlight

Copy