Mateo 11

1Chunka ishkay discïpulunkunata yachatsir ushaskirnam Galileapa marka marka Tayta Diospa willakuyninta willakur Jesús purirqan.

Discïpulunkunata Bautizaq Juan Jesúsman mandanqan

Lucas 7.18-35

2Carcelchö kaykarmi Bautizaq Juan musyarqan Jesucristo imata ruranqantapis. Tsaymi [ishkay] discïpulunkunata Jesús kaqman mandarqan 3tapur niyänanpä: <<¿Qamkush kanki Tayta Dios mandamunqan Cristo o juktaräkush shuyäyäshä?>>

4Jesúsnam nirqan: <<Kutir wiyayanqaykikunata y rikayanqaykikunata Juanta willayay. 5Qaprakunapis rikayannam. Puriyta mana puëdiqkunapis puriyannam. Leprawan qeshyaqkunapis allïyashqanam. Mana wiyaqkunapis wiyayannam.#Isa. 35.5-6. Wanushqakunapis kawayämushqanam. Pobrikunapis Tayta Diospa alli willakuynintam wiyayan.#Isa. 61.1. 6Yarpäyanqannö mana ruraptïpis mana ajayaypa noqaman yärakamuq runaqa kushishqam kawanqa>>.

7Juanpa discïpulunkuna kutiskiyaptinnam runakunata Jesús nirqan: <<¿Ima rikaqtä desiertuman aywayarqayki? ¿Carrïzuta vientu kuyutsiqta rikayänaykipäku? 8Sinöqa ¿ima rikaqtä aywayarqayki? ¿Alli röpashqa runata rikaqku? Musyayanqaykinöpis alli röpashqa runakunaqa reypa wayinchömi kayan. 9Tsayöraqa ¿ima rikaqtä aywayarqayki? ¿Profëta rikaqku? ¡Awmi! Noqam nï: Paynöqa manam mayqan profëtapis kashqatsu. 10Juanta mandamunanpämi kaynö qellqashqa kaykan: <Nänita pitsaqnö runakuna alistakuyänanpämi willakuqnïta puntaykita mandashä>.#Mal. 3.1.

11<<Rasunpam nï: Llapan profëtakunapitapis Bautizaq Juanqa mas tantiyakuqmi. Tsaynö kaptinpis Tayta Diospa mandakuyninman tsayrä yaykuqkunam Juanpitapis mas tantiyayan.

12<<Bautizaq Juan willakur qallanqanpitam Tayta Diospa mandakuyninman atskaq runakuna yaykuyan. Tsaynö kaykaptinpis wakin runakunaqa manam munayantsu tsay willakuyta willakuyänanta, sinöqa imaykanöpam tsapata churayan. 13Juan manarä willakuptinmi Moiséspis y profëtakunapis tsaynö kananpä kanqanta willakuyarqan.#Luc. 16.16. 14Paykuna willakuyanqanta mana criyiyaptikipis <Elías shamunqam> nir profëta willakunqantaqa Juanmi cumplishqa.#Mal. 4.5; Mat. 17.10-13; Mar. 9.11-13. 15Rinriyuq kaqkunaqa ninqäkunata wiyakuyätsun.

16<<Kanan tiempu runakunata ¿imamanrä iwalatsïman? Paykunaqa pläzachö pukllaq wamrakunanöllam kayan. 17Tsay wamrakunam qayayar niyan: <Pinkulluta tukayaptïpis manam tushuyankitsu. Llakinaypa cantayaptïpis manam waqayankitsu>. Tsay wamrakunanöllam kanan tiempu runakunapis kayan. 18Juan tantata mana mikuptin y vïnuta mana upuptinmi niyan: <¡Payqa supaypa poderninchömi kaykan!> 19Runapa Tsurin mikuptin y upuptinmi niyan: <¡Kay runaqa mikur y upullarmi purikun! ¡Impuestu cobraqkunapa y jutsasapakunapapis amïgunmi!> Tsaynö niyaptinpis discïpulükuna Tayta Dios munanqannö kawayaptinmi Juanta y noqata Tayta Dios mandayämanqan musyakan>>.

Jutsa ruraqkunata juzgananpä Jesús ninqan

Lucas 10.13-15

20Atska milagrukunata Jesús ruranqanta rikarpis jutsa ruraytaqa manam dëjayarqantsu. Tsaymi Jesús nirqan: 21<<¡Allaw, Corazín runakuna! ¡Allaw, Betsaida runakuna! Markaykikunachö milagrukunata ruranqänö Tiro y Sidón markakunachö#Isa. 23.1-18; Eze. 26.1—28.26; Joel 3.4-8; Amós 1.9-10; Zac. 9.2-4. rurashqa kaptïqa maynam jutsankunata dëjar lütu röpata jatikurkur uchpa jananchö jamaräyanman karqan. 22Noqam nï: Tiro y Sidón runakunata castiganqanpitapis mas peormi juiciu finalchö Tayta Dios castigayäshunki.

23<<Capernaúm runakuna, ¿ciëluman chäyänaykipä kanqantaku yarpäyanki? ¡Qamkunaqa Hadesman qaykushqam kayanki! Qamkunachö ruranqä milagrukunata Sodomachö#Gén. 19.24-28. rurashqa kaptïqa jutsankunata dëjayaptin tsay marka kananyaqmi kaykanman karqan. 24Noqam nï: Sodoma runakunata castiganqanpitapis mas peormi juiciu finalchö Tayta Dios castigayäshunki>>.#Mat. 10.15; Luc. 10.12.

Tayta Diosta Jesús mañakunqan

Lucas 10.21-22

25Tsaychömi Tayta Diosta mañakur Jesús nirqan: <<Ciëluchö y kay patsachö poderyuq Papä, qamtam alabä. Manam yachaq tukuqkunatatsu yarpaykanqaykikunata musyatsirquyki, sinöqa wamranö kaqkunallatam. 26Papä, tsaynö kanantam munarquyki>>.

27Tsaypitanam tsaychö kaykaq runakunata nirqan: <<Papänïmi llapantapis podernïman churamushqa.#Juan 3.35. Tsurin kaptïmi paylla noqata reqiman. Tsaynöllam Papänï kaptin noqalla payta reqï. Tsaymi noqa tantiyatsinqä kaqkunalla Papänïta reqiyan>>.#Juan 1.18; 10.15.

28<<Llapayki ajyashqa y llakishqa kaqkuna, noqaman shayämuy. Noqam jamatsiyäshayki. 29Noqapa yügüta apayay.#11.29 Noqapa yügüta apayay ninanqa discïpulü kayay ninanmi. Kuyapäkuq y alli shonqu kanqäta rikar noqapita yachakuyay. Noqapita yachakurmi jamayta tariyanki.#Éxo. 33.14; Jer. 6.16. 30Noqapa yügüqa ankashllam. Manam aja apaytsu>>.

Currently Selected:

Mateo 11: qxo

Highlight

Copy