Juan 6

Pitsqa waranqa runakuna mikuyanqan

Mateo 14.13-21; Marcos 6.30-44; Lucas 9.10-17

1Tsaypitanam Galilea qochapa wak tsimpanman Jesús päsarqan. Tsay qochallatam Tiberias niyanpis. 2Qeshyaqkunata allïtsinqanta rikarmi atskaq runakuna Jesúspa qepanta aywayarqan. 3Qocha tsimpanchönam jirkanninman aywaykur discïpulunkunawan jamaskiyarqan. 4Israel runakunapa Pascua fiestankunapämi pöcullana faltaykarqan. 5Paykuna kayanqanman atskaq runakuna chäyanqanta rikarmi Felipita Jesús nirqan: <<Kaytsika runakunapä ¿maypitatä mikuyta rantimushun?>>

6Tsaynö nirqan <<Felipe mä imatash ninqa>> nirmi. Jesúsqa musyarqannam imata rurananpä kanqantapis. 7Felipinam nirqan: <<Ishkay pachak (200) junaq arupakur gänanqantsikwan rantimushqapis manam ichik ichiklla mikuyänallanpäpis tinkunqatsu>>.

8Tsaynö niptinmi Jesúspa discïpulun Andrés nirqan (Andrésqa Simón Pedrupa wawqinmi karqan): 9<<Kaychö juk wamrapam pitsqa cebäda tantan y ishkay pescädun kaykäpun. Tsayllaqa manam llapan runakunapä aypanmantsu>>.

10Jesúsnam llapan runakunata jamatsiyänanpä nirqan. Tsaymi qewakuna jananman runakuna jamakuyarqan. Runakunaqa pitsqa waranqanömi (5,000) kayarqan. 11Tsay pitsqa tantata Jesús aptarkurmi Tayta Diosta mañakur agradëcikurqan. Jamaykaq runakunatanam [discïpulunkuna] aypuyarqan. Tsaynöllam pescädutapis aypuyarqan. Aypuyaptinmi llapanpis pacha junta mikuyarqan.

12Runakuna mikuskiyaptinnam discïpulunkunata nirqan: <<Llapan sobraqkunata qoriyämuy. Ama imatapis perditsishuntsu>>.

13Tsaynö niptinmi pitsqa cebäda tantapita sobraq kaqta chunka ishkay canasta juntata qoriyarqan. 14Tsay milagru ruranqanta rikaykurmi runakuna niyarqan: <<¡Kay runaqa Tayta Dios mandamunanpä kaq profëtam!>>#Deut. 18.15-18.

15Tsaynö nirmi mandaqnin rey kananpä amälas churayta munayarqan. Peru tsayta tantiyaskirmi jirkapa Jesús japallan aywakurqan.

Yaku jananpa Jesús purinqan

Mateo 14.22-27; Marcos 6.45-52

16Tsakaykaptinnam Jesúspa discïpulunkuna qocha kuchunman kutiyarqan. 17Patsa tsakaskiptinnam büquiman yarkurkur Capernaúm markaman aywayarqan. Peru Jesúsqa manarämi kutimurqanrätsu. 18Aywaykäyaptinnam pasaypa vientuptin yaku laqchikachar qallaykurqan. 19Tsaypita juk lëwatanö aywaykarnam Jesústa rikaskiyarqan yaku jananpa paykuna kaqman aywaykaqta. Tsayta rikaykurmi pasaypa mantsakäyarqan. 20Tsaymi Jesús nirqan: <<¡Noqam kä! ¡Ama mantsayämaytsu!>>

21Tsaymi Jesús witsänanpä büquita päratsiyarqan. Tsaypitaqa rasllanam qocha kuchunman chäyarqan.

Imayyaqpis kawatsikuq tanta kanqanta Jesús ninqan

22Warayninnam quëdaq runakuna tantiyayarqan tsaychö kaykaq jukllaylla büquiwan discïpulunkuna aywayanqanta. Tsaynöllam paykunawan Jesús mana aywanqanta tantiyayarqan. 23Tsaynö kaykäyaptinmi Tiberias markapita büquikuna chäyarqan Señor Jesús tantata qarakunqan cercanman. 24Jesústa y discïpulunkunatapis mana tarirmi tsay büquikunawan Jesústa ashirnin Capernaúm markaman aywayarqan.

25Capernaúmchö tariskirnam tapuyarqan: <<Rabí, ¿imaynatä kayman shamurquyki?>>

26Jesúsnam nirqan: <<Rasunpam nï: Manam qamkunaqa milagrukunata rikartsu ashiyämanki, sinöqa pacha junta mikuyanqaykipitam. 27Pachallaykipä aruyänaykipa rantinqa imayyaqpis kawatsikuq mikuyta tariyänaykipä aruyay. Tsay mikuytaqa Runapa Tsurinmi qarayäshunki. Tsaypämi Tayta Dios mandamushqa>>.

28Tsaynam tapuyarqan: <<Tayta Diospa aruyninchö aruyänäpä ¿imatatä rurayäman?>>

29Jesúsnam nirqan: <<Tayta Diospa aruyninqa mandamunqanman criyikuyanqaykim>>.

30Tsaynam niyarqan: <<Tayta Dios mandamushunqaykita criyiyänäpäqa mä juk milagruta ruramuy. 31Unay castantsikkunaqa desiertuchö manátam mikuyarqan. Tayta Diospa palabranmi nin: <Ciëlupita tantatam mikuyänanpä alistaparqan> >>.#Éxo. 16.4, 15; Sal. 78.24.

32Jesúsnam nirqan: <<Rasunpam nï: Manam Moiséstsu ciëlupita tantata qararqan, sinöqa Papänïmi. Paymi ciëlupita rasunpa kawatsikuq tantata qarayäshunki. 33Tsay tantaqa ciëlupita shamuq runam. Payqa pïmaytapis mana ushakaq kawaytam qaranqa>>.

34Runakunanam niyarqan: <<Taytay, tsay tantataqa imayyaqpis qaraykayämay>>.

35Jesúsnam nirqan: <<Noqam kawatsikuq tanta kä. Noqata chaskimaq kaqqa imaypis manam mallaqanqatsu ni yakunanqatsu. 36Ninqänöllam rikaykämarpis criyiyämankitsu.

37<<Papänï qaramanqan runakunaqa llapanmi chaskiyäman. Noqata chaskimaq kaqkunataqa manam pitapis qarqushätsu. 38Manam kikï munanqäta ruranäpätsu ciëlupita shamurqü, sinöqa mandamaqnï munanqanta ruranäpämi. 39Mandamaqnï [Papänï] manam munantsu qaramanqan runakunata ni jukllayllatapis oqranäta, sinöqa llapantapis juiciu finalchö kawatsimunätam munan. 40Payqa munan llapanpis Tsurinman criyiqkuna mana ushakaq kawayta tariyänantam. Paykunataqa juiciu finalchömi kawatsimushä>>.

41<<Noqaqa ciëlupita shamuq tantam kä>> niptinmi tsaychö kaykaq Israel runakuna Jesústa manakaqman churar 42niyarqan: <<Kay runaqa ¿manaku Josépa tsurin Jesús? Musyantsikmi maman papänin pï kanqantapis. ¿Imanirtä payqa <ciëlupitam shamurqü> nikämantsik?>>

43Jesúsnam nirqan: <<Manakaqman ama churayämaytsu. 44Mandamaqnï Papänï mana tantiyatsiptinqa manam pipis chaskimanmantsu. Chaskimaqkunataqa juiciu finalchömi kawatsimushä. 45Profëtakuna qellqayanqanmi nin: <Llapan runakunatam kikï yachatsishä>.#Isa. 54.13. Tsaynöllam Tayta Dios tantiyatsinqanta cäsukuq kaqkunaqa llapanpis chaskiyäman. 46Tayta Diosta manam pipis rikashqatsu. Diospita shamuq runallam paytaqa rikashqa. 47Rasunpam nï: Noqaman criyikamuqkunaqa mana ushakaq kawaytam tariyanqa.

48<<Noqam kawatsikuq tanta kä. 49Unay castaykikuna desiertuchö manáta mikurpis wanuyarqanmi. 50Peru ciëlupita shamuq tantata mikuqkunam sïqa wanuyanqatsu. 51Noqam ciëlupita shamuq kawaykaq tanta kä. Pipis kay tantata mikurqa mana ushakaq kawaytam tarinqa. Kay tantaqa kikïpa cuerpümi. Runakuna mana ushakaq kawayta tariyänanpämi cuerpüta sacrificiutanö Tayta Diosman entregashä>>.

52Israel runakunanam kikinkunapura niyarqan: <<¿Imanöpatä kay runa cuerpunta mikutsimäshun?>>

53Jesúsnam nirqan: <<Rasunpam nï: Runapa Tsurinpa cuerpunta mana mikurqa y yawarninta mana upurqa manam mana ushakaq kawayta tariyankitsu. 54Peru cuerpüta mikur y yawarnïta upurmi sïqa mana ushakaq kawayta tariyanki. Noqam juiciu finalchöpis kawatsiyämushayki. 55Noqapa cuerpüqa rasunpa kaq mikuymi y yawarnïpis rasunpa kaq yakum. 56Cuerpüta mikuq kaqqa y yawarnïta upuq kaqqa noqawan jukllayllanömi kanqa y noqapis paywan jukllayllanömi kashä.

57<<Noqa kawä mandamaqnï y imayyaqpis kawaq Papänï kawayta qaramaptinmi. Papänïpita kawayta chaskinqänöllam cuerpüta mikuq kaqkunapis noqapitarä kawayta chaskiyanqa. 58Ciëlupita shamuq tantam noqaqa kä. Tsay tantaqa manam unay castaykikuna manáta mikuyanqannötsu. Manáta mikurpis paykunaqa wanuyarqanmi. Peru kay tantata mikuq kaqmi sïqa imayyaqpis kawayanqa>>.

59Jesús tsaynö yachatsirqan Capernaúmchö kaykaq sinagögachömi.

Jesús yachatsinqankuna mana ushakaq kawayta qaramänantsikpä kanqan

60Tsaynö yachatsinqanta wiyarmi Jesúspa atskaq discïpulunkuna niyarqan: <<Pay yachatsinqankunaqa aja tantiyaymi. Tsaynö parlaptinqa ¿pirä payta criyinqa?>>

61Tsaynö niyanqanta tantiyaskirmi Jesús nirqan: <<¿Yachatsinqäpitaku rabyakuyanki? 62Tsaynö rabyakurqa ¿ima niyankimanrä Runapa Tsurin ciëluman kutiykaqta rikar? 63Manam pipis kikillanpitatsu mana ushakaq kawayta tarin, sinöqa Espïritupitam. Noqa yachatsinqäqa Espíritu Santupita karmi mana ushakaq kawayta qarayäshunaykipä kaykan. 64Tsaynö kaptinpis wakikikunaqa ninqäkunata manam criyiyankitsu>>.

Jesús tsaynö nirqan mayqan runakuna payta mana chaskiyanqanta musyarmi. Tsaytaqa qallaykunanpitam musyarqan. Tsaynöllam mayqan discïpulun rantikunanpä kanqantapis musyarqan.

65Jesúsnam nirqan: <<Wakikikuna mana criyiyanqaykita musyarmi nirqü: <Papänï mana tantiyatsiptinqa manam pipis chaskimanmantsu> >>.

66Jesús ninqanta wiyaykurmi atskaq discïpulunkuna payta jaqiskir aywakuyarqan. 67Tsaymi chunka ishkay akranqan discïpulunkunata Jesús tapurqan: <<¿Qamkunapis aywakuytaku munaykäyanki?>>

68Tsaynö niptinmi Simón Pedro nirqan: <<Taytay, qampita mas jukqa manam pipis qatiräyänäpä kantsu. Ninqaykikunaqa mana ushakaq kawayta tariyänäpämi kaykan. 69Noqakunaqa qammanmi criyiyä. Qamqa Tayta Dios mandamunqan santu runam kanki#6.69 Wakin qepa kaq griego copiakunam niyan: Qamqa kawaykaq Tayta Diospa Tsurin Cristum kaykanki.>>.#Mat. 16.16; Mar. 8.29; Luc. 9.20.

70Jesúsnam nirqan: <<¿Manaku chunka ishkay discïpulükuna kayänaykipä akrarqü? Peru juknikim diablupa poderninchö kayanki>>.

71Jesús tsaynö nirqan Simónpa tsurin Judas Iscariotipämi. Payqa apostolnin kaykarmi Jesústa wanutsiyänanpä rantikurqan.

Currently Selected:

Juan 6: qxo

Highlight

Copy