Génesis 7

Diluviu kanqan

1Tsaypitanam Noéta Tayta Dios nirqan: <<Llapan runakunapita qam japallaykim noqa munanqänö kawaykanki. Tsaynö kawanqaykipitam qam, warmiki y tsurikikuna warmintin arcaman yaykuyanki. 2Püru kaq ashmakunataqa#7.2 Püru kaq ashmakunaqa Diosta adorar altarchö rupatsinanpä ashmakunam kayarqan. Mayqan ashmakuna püru kanqanta y impüru kanqanta musyanaykipä liyinki Lev. 11.1-47; Deut. 14.3-20. qanchis chinata qanchis orquta arcaman yaykutsinki. Impüru kaqtaqa chinan orqullata yaykutsinki. 3Tsaynölla yaykutsinki qanchis chinan orqu llapan casta päriqkunata kay patsachö mana ushakäyänanpä. 4Kananpita qanchis junaqtam mana päraypa tamyatsimushä chusku chunka (40) junaq y chusku chunka paqas. Tsay tamyawanmi kay patsachö llapan kawaq kaqkunata ushakätsishä>>.

5Tsaymi Noéqa Tayta Dios ninqannölla llapanta rurarqan.

6Diluviu kanqan witsan Noéqa kaykarqan joqta pachak (600) watayuqmi. 7Diluviupita salvakuyänanpämi arcaman Noé yaykurqan warminwan, tsurinkunawan y llumtsuyninkunawanpis.#Mat. 24.38-39; Luc. 17.27. 8Tsaynöllam arcaman yaykuyarqan püru kaq y impüru kaq llapan casta ashmakuna, päriqkuna y lätaypa puriqkunapis. 9Tayta Dios ninqannöllam tsay ashmakunata chinan orquta Noé yaykutsirqan.

10Tayta Dios ninqannöllam qanchis junaqta diluviu qallaykurqan. 11Tsayqa karqan wata qallanqanpita juk killata ushaskir chunka qanchis junaqmi. Tsay witsan Noéqa kaykarqan joqta pachak (600) watayuqmi. Patsa rurinpitam atska yaku pashtamurqan. Tsaynöllam ciëluchö yakuta tsaparaykaq punkupis kichakaskirqan.#2Ped. 3.6. 12Tsaymi chusku chunka (40) paqas y chusku chunka junaq mana päraypa tamyamurqan.

13Tamya qallanqan junaqmi Noéqa kimsan tsurinkunawan arcaman yaykuyarqan. Tsurinkunapa jutinkunam karqan Sem, Cam y Jafet. Tsaynöllam kimsan llumtsuyninkunawan Noépa warminpis yaykuyarqan. 14Paykunawanmi yaykuyarqan llapan casta wätana kaq y mana wätana kaq ashmakuna, lätaypa puriqkuna y llapan casta päriqkunapis. 15Llapan casta ashmakunatam ishkay ishkay arcaman Noé yaykutsirqan. 16Tayta Dios ninqannöllam cada casta ashmakunata chinan orquta yaykutsirqan. Yaykuyta ushaskiyaptinnam arca punkuta Tayta Dios wichqaskirqan.

17Tsaypitanam chusku chunka (40) junaq y chusku chunka (40) paqas mana päraypa tamyarqan. Tsaynö tamyarmi patsaman yaku juntarnin arcata aynatsir qallaykurqan. 18Tsaynö tamyaptin warayllanta warayllanta yaku pasaypa juntaptinmi arcaqa aynar qallaskirqan. 19Altunnin jirkakunatapis tsapanqanyaqmi yaku juntarqan. 20Tsay jirkakunata tsapaskirpis qanchis metru mastarämi päsarqan.

21Tsaychömi llapan runakunapis, päriqkunapis, wätana kaq y mana wätana kaq ashmakunapis y lätaypa puriqkunapis shenqaypa wanuyarqan. 22Kay patsachö kawaqkunaqa llapanpis shenqaypa wanurmi ushakäyarqan. 23Arcaman Noéwan yaykuqkunallam kawayarqan. Mana yaykuq kaqmi sïqa runakunapis, ashmakunapis, päriqkunapis y lätaypa puriqkunapis chipyaq ushakäyarqan. 24Tsay yakum pachak pitsqa chunka (150) junaq kay patsata tsapararqan.

Currently Selected:

Génesis 7: qxo

Highlight

Copy