Génesis 6
6
Runakuna jutsata rurayanqan
1Kay patsachö runakuna atskaman mirayaptinmi warmi tsurinkunapis atska kayarqan. 2Tsaymi Tayta Diospa tsurinkuna rikayarqan runakunapa warmi tsurinkuna kuyayllapä kayanqanta. Tsay jipashkunapitam munayanqanta akrayarqan warmin kananpä.#6.2 Kay textuchö ni versïculu 4-chöpis Diospa tsurinkuna pï kayanqanpis manam shumaq musyakantsu. Capaz kayarqan unay reykuna, angelkuna o Diosman yärakuqkuna. 3Tsaymi Tayta Dios nirqan: <<Manam runakuna imayyaqpis kawayanqatsu. Paykunaqa kay patsachö ushakaqllam kaykäyan. Tsaymi imayyaqpis kawayänanpa rantin pachak ishkay chunka (120) watallana kawayanqa>>.
4Diospa tsurinkunawan runakunapa warmi tsurinkuna täyanqan witsanmi jatusaq runakuna kay patsachö kawayarqan. Tsay unay runakuna alläpa reqishqa y kallpasapam kayarqan.#Núm. 13.33.
5 Tayta Diosmi rikarqan runakuna pasaypa jutsata rurallar kawayanqanta. Paykunaqa shonqun munanqannö jutsata ruranallanpämi yarpäyaq.#Mat. 24.37; Luc. 17.26; 1Ped. 3.20. 6Tsaymi runata kamanqanpita Tayta Dios pasaypa pësakur nirqan: 7<<¿Imapärä kay patsachö runata kamarqäpis? Kananqa llapan runakunatam ushakätsishä. Tsaynöllam llapan ashmakunata, lätaypa puriqkunata y päriqkunatapis ushakätsishä>>.
8Peru Noétam sïqa Tayta Dios kuyaparqan.
Arcata Noé ruranqan
9Kaychömi qellqashqa kaykan Noé imanö kawanqanpis.
Runakuna jutsata rurar kawayaptinpis Noéqa Tayta Diosman yärakurmi pay munanqannö kawarqan.#2Ped. 2.5. 10Noépa tsurinkunam kayarqan Sem, Cam y Jafet.
11Tayta Diosmi rikarqan kay patsachö runakuna pasaypa jutsata rurar y wanutsinakullar kawayanqanta. 12Maytsaychöpis jutsata rurallar runakuna kaykaqta rikarmi Noéta Tayta Dios nirqan: 13<<Kay patsachö llapan runakunatam ushakätsishä. Paykunam jutsayuq kaykäyan kay patsachö wanutsinakuy kananpä. Tsaynö kayanqanpitam kay patsachö kaqkunata chipyaq ushakätsishä.
14<<Tsaynö kananpä kaykaptinqa atska cuartuyuq jatunkaray arcata weqiyuq qerupita ruray. Yaku mana yaykunanpä uchkunkuna jananpa y rurinpa breawan llushtanki. 15Tsay arcata ruranki pachak kimsa chunka pitsqa (135) metru larguta. Anchuntana ruranki ishkay chunka ishkay metru pullanta (22.5). Altuntana ruranki chunka kimsa metru pullanta (13.5). 16Tsaynölla ruranki kimsa altusyuqta. Qataranqanpita uraman pullan metruchö ventänata ruranki. Tsaynölla jukaq lädunpa punkuyuqta ruranki.
17<<Mantsaypä diluviu tamyatam tamyatsimushä maytsaytapis yaku tsapanqanyaq. Tsay yakuwanmi maytsaychöpis llapan wanuyanqa. 18Peru qamwanmi sïqa pactuta rurashä. Tsaymi arcaman yaykuyanki qam, warmiki y tsurikikuna warmintin. 19Tsaynölla arcaman yaykutsinki kay patsachö kaq tukuyläya ashmakunata chinan orquta, qamkuna salvakuyanqaykinö ashmakunapis salvakuyänanpä. 20Qamkunawanmi arcaman yaykuyanqa tukuy casta päriqkuna, wätana kaq y mana wätana kaq ashmakuna y lätaypa puriqkunapis. Cada ünu chinan orqu yaykuyätsun. Tsaynöpam tsay ashmakunapis ushakäyanqatsu. 21Arca rurinman tukuyläya mikuykunata churanki. Tsay mikuytam mikuyanki qamkunapis y ashmakunapis>>.
22Tayta Dios ninqannöllam llapantapis Noé rurarqan.#Heb. 11.7.
Currently Selected:
Génesis 6: qxo
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.