Génesis 40

Ishkay runakuna sueñuyanqanta José tantiyatsinqan

1Tsaypitanam vïnu ruraqkunapa y tanta ruraqkunapa mandaqninkuna mana allita rurar 2Egipto nacionpa mandaqnin rey Faraónta ajanätsiyarqan. 3Tsaymi wardiakunapa capitanninpa wayinchö kaykaq carcelman prësu apatsirqan. Tsay carcelchömi Josépis wichqaraykarqan. 4Wardiakunapa capitanninnam tsay ishkan runakunata Josépa poderninman churarqan. Tsay runakunam atska killa carcelchö wichqaräyarqan.

5Juk paqasmi vïnu ruraqkunapa y tanta ruraqkunapa mandaqninkuna sueñuyarqan imapis päsananpä kanqanta. 6Wäraylla paykunata watukaq aywarmi llakishqa kaykäyaqta José tarirqan. 7Tsaymi tapurqan: <<¿Imanirtä llakishqa kaykäyanki?>>

8Paykunanam niyarqan: <<Mana allitam sueñuyarqü. Manam pipis kantsu imapä sueñuyanqätapis tantiyatsiyämänanpä>>.

Josénam nirqan: <<Tsay sueñuyanqayki imapä kanqantapis Tayta Diosllam tantiyatsimäshun. Imata sueñuyanqaykitapis kanan willayämay>>.

9Tsaynö niptinmi vïnu ruraqkunapa mandaqnin willar nirqan: <<Sueñuynïchömi juk üva planta 10kimsa rämayuq kaykaqta rikarqü. Tsay rämakuna tseqllimur tukturmi poqushqa üvakunaman tikrashqa. 11Tsay poqushqa üvata Faraónpa väsunta aptaraykanqäman qapiskirmi Faraónta makyarqü>>.

12Josénam nirqan: <<Sueñuynikichö kimsa rämakunata rikanqaykiqa kimsa junaqmi kaykan. 13Kananpita kimsa junaqtam kay carcelpita Faraón jipiskatsishurniki puntata arunqaykiman kutitsishunki. Tsaymi väsuwan vïnuta yapay sirvinki. 14Ninqänölla arunqaykiman kutir noqatapis yarpaykallämanki. Tayta Faraónta rugakuykullanki kaypita jipimänanpä. 15Hebreo runakuna täyanqanpitam imayka suwaqnö kay markaman apayämashqa. Jutsaynaq kaykarmi kaychö wichqaraykä>>.

16Allipä sueñunqanta willaptinmi tanta ruraqkunapa mandaqninpis Joséta willar nirqan: <<Sueñuynïchömi kimsa taksha canastakunachö janay janay umallishqa tantakunata puriykätsinä kä. 17Janan kaq canastachömi tukuy niraq mishkiq tantakuna Faraón mikunanpä kanä. Tsay tantakunatam pishqukuna shamur mikuyashqa>>.

18Tsaynö willaptinmi paytapis José nirqan: <<Sueñuynikichö kimsa taksha canastakuna rikanqaykiqa kimsa junaqmi kaykan. 19Kananpita kimsa junaqtam umaykita roquskatsir qeruman Faraón warkutsishuptiki ayaykita wiskurkuna mikuyanqa>>.

20Tsaypita kimsa junaqtam santunta Faraón rurar tsaychö mandar yanapaqninkunata qayatsirqan mikuyänanpä y upuyänanpä. Tsay junaqmi carcelpita jipitsimurqan tanta ruraqkunapa y vïnu ruraqkunapa mandaqninkunata. 21Vïnu ruraqkunapa mandaqnintam yapay churarqan puntata arunqanman. Tsaymi väsuwan vïnuta Faraónta yapay makyarqan. 22Peru tanta ruraqkunapa mandaqnintam sïqa José willanqannölla wanuskatsir ayanta qeruman warkutsirqan. 23Vïnu ruraqkunapa mandaqninqa José rugakunqanta manam yarparqannatsu.

Currently Selected:

Génesis 40: qxo

Highlight

Copy