Éxodo 10

Tsaytsika chukllushkuna yuriyanqan

1Tsaypitam Moisésta Tayta Dios nirqan: <<Faraón kaqman ayway. Pasaypa mantsariypä castïgukunawan castiganäpämi paypa y mandar yanapaqninkunapa shonqunkunatapis chukruyätsirqü. 2Poderyuq Tayta Dios kanqäta musyarnam Egiptuchö mantsariypä castiganqäta wamraykikunata y willkaykikunatapis willayanki>>.

3Tsaynö niptinmi Moiséswan Aarón Faraón kaqman aywaykur niyarqan: <<Hebreo runakunapa#10.3 Hebreo runakunaqa Israel runakunam kayarqan. Tsaymi Moiséspis hebreo runa karqan. Tayta Diosninmi nin: <¿Imayyaqtä cäsumayta munankitsu? ¡Kuyanqä runakunata adoramaq aywayänanpä dëjay! 4Dëjayta mana munaptikiqa waray junaqmi nacionnikiman atska chukllushkunata yuritsimushä. 5Tsaykunam ishniyparä patsapis mana rikakunqanyaq juntayämunqa. Runtu tamyapita qeshpiq kaqtapis chipyaqmi ushanqa. Tsaynöllam llapan jachakunatapis mikur ushayanqa. 6Tsaykunam juntayanqa palaciuykimanpis, mandar yanapashuqnikikunapa wayinkunamanpis y entëru Egiptuchö täraq runakunapa wayinkunamanpis. Tsaytanöqa papänikipis ni awiluykikunapis manam imaypis rikayashqatsu> >>.

Tsaynö niskirmi Faraónpa palaciunpita Moisés aywakurqan.

7Tsaymi mandar yanapaqninkuna Faraónta niyarqan: <<Taytay, ¿imayyaqnatä tsay runa mana allita ruramäshun? Jina Tayta Diosninta adoraq aywayänanpä dëjaykuy. ¿Manaku tantiyanki Egiptuchö imaykapis chipyaqna ushakanqanta?>>

8Tsaynö niyaptinmi Moisésta y Aarónta Faraónqa yapay qayaykatsir nirqan: <<Kananqa Tayta Diosnikita adorayänaykipä aywayay. Peru pikunapis aywayänanpä kanqanta willayämay>>.

9Moisésnam nirqan: <<Noqakunaqa Tayta Diosta adorarmi jatun fiestata rurayäshä. Tsaymi llapäkuna aywayäshä ollqu wamräkunata, warmi wamräkunata y awilükunatapis pushakurkur. Tsaynöllam üshäkunata, cabräkunata y wäkäkunata chipyaq qatikurkur aywayäshä>>.

10Faraónnam nirqan: <<¡Ajä! <Tayta Diosmi yanapaykämantsik> niq tumpalla aywakuyänaykipä kanqanta ¿mana tantiyanqätaku yarpäyanki? ¿Wamraykikunawan llapayki aywayänaykipä dëjanätaku yarpäyanki? 11Manam yarpanqaykinötsu kanqa. Tayta Diosta adoraq aywayta munarqa ollqu kaqkunalla aywayay. Ollqu kaqkunalla aywayänaykipämi niyämarquyki>>.

Tsaynö nirmi paykunata puntanpita qarqutsirqan.

12Tsaypitanam Moisésta Tayta Dios nirqan: <<Egipto nacionman makikita joqariy atska chukllushkuna shayämunanpä. Tsay chukllushkunam ushayanqa llapan plantakunata y runtu tamya mana ushanqankunatapis>>.

13Tsaynö niptinmi Egiptuman tukrunta Moisés joqarirqan. Tsaymi rupay yarqamunan lädupita juk paqas y juk junaq Tayta Dios vientutsimurqan. Tsay vientuwanmi patsa waränanpäqa tsaytsika chukllushkuna kaykäyänä. 14Tsaynöpam entëru Egiptuman chukllushkuna juntäyarqan. Tsaytsika chukllushkuna manam imaypis kashqatsu ni imaypis kanqatsu.#Apoc. 9.2-3. 15Tsaymi juntäyarqan patsapis mana rikakanqanyaq. Tsaynö ishniyparä karmi llapan plantakunata y runtu tamyapita qeshpiq jachakunapa wayuynintapis mikuyarqan. Tsaymi Egiptuchö jachakunapis ni qewakunapis verdiqa quëdarqantsu.

16Tsaymi Moisésta y Aarónta juklla qayaykatsir Faraón nirqan: <<Mana cäsukurmi Tayta Diosnikipa contran y qamkunapa contraykikuna jutsata rurarqü. 17Tsaymi qamkunata rugakü kananllana perdonaykayämänaykipä. Tsaynölla Tayta Diosnikita mañakuykuyällay kay chukllushkunata illakaykatsinanpä>>.

18Tsaymi Faraónpa palaciunpita Moisés yarquskir Tayta Diosta jinan höra mañakurqan. 19Mañakuptinmi rupay ullunan lädupita Tayta Dios pasaypa vientutsimurqan. Tsay vientu llapan chukllushkunata Puka Lamarman apaptinmi entëru Egiptuchö ushakäyarqan.

20Peru Faraónpa shonqunta Tayta Dios yapay chukruyätsiptinmi Israel runakuna yarquyänanta munarqantsu.

Patsa tsakanqan

21Tsaypitanam Moisésta Tayta Dios nirqan: <<Ciëlupa makikita joqariy entëru Egiptuchö pasaypa tsakänanpä>>.

22Ninqannö makinta Moisés joqariptinmi kimsa junaqyaq Egiptuchö pasaypa tsakarqan.#Sal. 105.28; Apoc. 16.10. 23Tsaymi Egipto runakunaqa kimsa junaq pitapis rikayarqantsu ni maypa aywaytapis puëdiyarqantsu. Peru Israel runakuna täyanqan partichöqa manam tsakarqantsu.

24Tsaynam Moisésta qayaykatsir Faraón nirqan: <<Tayta Diosta adorayänaykipä wamraykikunawan llapayki aywayay. Peru üshaykikunata, cabraykikunata y wäkaykikunata sïqa kayllachö dëjayay>>.

25Faraón tsaynö niptinmi Moisés nirqan: <<Ashmäkunata qatiyänäta mana munarqa ¿qamtsurä ashmakunata alistapäyämanki Tayta Diosnïta adorar sacrificiukunata rupatsiyänäpä? 26Ashmäkunataqa juktapis mana jaqiypam llapanta qatiyäshä. Tsay ashmakunapitam akrayäshä sacrificiuta rupatsir Tayta Diosnïta adorayänäpä. Manarä charqa manam musyayärätsu ayka ashmata rupatsiyänäpä kanqantapis>>.

27Peru Faraónpa shonqunta Tayta Dios yapay chukruyätsiptinmi aywakuyänanpä Israel runakunata dëjarqantsu. 28Tsaymi Moisésta Faraón nirqan: <<Ñöpäpita witikuy. Kananpitaqa manam rikaytapis munätsu. Yapay kutimuptikiqa wanutsishaykim>>.

29Moisésnam nirqan: <<Ninqaykinömi kanqa. Kananpitaqa manam imaypis rikayämankinatsu>>.

Currently Selected:

Éxodo 10: qxo

Highlight

Copy