ZAKARIA 11
11
Ananowo manga tembonnanne apan maṛṛagissa
1Ei Libanon, wu'ate manga ngaranu,
tadea'u putungnga manoṛṛobba manga alu arasi yamiu!
2Ei punnu daru, lalluaite,
ana waugu naṛṛaate manga punnu alu cemara,
manga aaluanna apan matohassa nawansalle.
Ei manga aaluanna masallakka su Basan, lalluaite.
Ana waugu manga mahurangnge mal᷊alangnga buatte niwabbassa mal᷊aukka.
3Paddaringikke lal᷊uai manga tembonanne
nawul᷊ite awawantugi mangitou!
Paddaringikke wawassingngu manga singa su mahurangnge;
ana waugu nahohakke atatanaanni mangitou su al᷊o'engngu Sal᷊ukku Yordan.
Ruang katou mallal᷊u'udda
4 Mawu Ruata nabbiara si ya'u, “I'o pattingkaola'e ere mallal᷊u'adda apan uataṛṛapa domba apan sarun ṛatanna. 5Manga mamamalline mammate manga domba udde ringannu tawe naasomba ṛuumanna. I mangitou apan mabbalu'u ṛemessu manga domba udde mabbisara, ‘Dalo su Mawu! Orassa indi niatambante paa'alan kite!’ Manga mallal᷊u'udda udde tawe maapendamma umakkanna su manga domba papadul᷊iananni mangitou.
6I Ya'u maddirite lai umakkanni sai-sai su wanua indi. I Ya'u sassane sarun manantillu anambon tumanangnge su manga tembonanne. I mangitou sarun makkimunsa'a wanua indi, wuṛṛu i Ya'u tate manganu apia wuassu lima mangitou.”
7I ya'u, Zakaria, ana see nisewannu manga mabbawal᷊u'u domba tadea'u mallu'adda manga domba apan sarun ratanna. I ya'u pia darua ta'inna; iapa sambua ta'u nisaggo “Aakkanna” wuṛṛu iapa sambau lai “Nii'itta”. Wua'udde i ya'u mannattakke mandiaga wuṛṛu mammadul᷊i manga domba udde. 8Siri tallu malll᷊u'adda apan maddantingku nanginsue asasabbare'u. I mangitou ta'u nilimbuaṛṛanna sulal᷊ummu tempo sambul᷊anna. 9Wua'udde i ya'u nabbisara su ammul᷊annu domba udde, “I ya'u maddirite mallu'adda si yamiu apia. Iapa matete wal᷊a'e i tou nate, wuṛṛu iapa masilaka, wala'e i tou masilaka. Ana see lambene walate i mangitou mapapate.” 10Ana see ta'inna apan ta'u nisaggo “Aakkanna” udde ta'u nianu wuṛṛu ta'u nipaddi tadea'u ipanal᷊are paaire apan niola'u Mawu ringannu anambon balahanna. 11Su allo udde lai paaire tawe nariaddi. Manga mabbawal᷊u'u domba uataṛṛapa si ya'u, wuṛṛu i mangitou naatutukke manungku Mawu tantal᷊anna mabbisara sulal᷊ummu inolaangku. 12-13I ya'u nabbisara si mangitou, “Amungkangngu manga Tuangnga mappulu, onggol᷊a'e sewa'u; amungkangngu tawe, lasa'e lai.” Wua'udde i mangitou nangonggolla si ya'u tallun pul᷊o roitta sal᷊a'a maola'a sewa'u.
Mawu nabbisara si ya'u, “Taṛṛoa'e roitta udde sulal᷊ummu kasen Wal᷊e-U.” nariaddi ta'u nitaṛṛo tallun pul᷊o roitta sal᷊a'a udde sulal᷊ummu kasen Wal᷊en Mawu. Tumba'u aroddi pangangareggan mangitou si ya'u! 14Wua ude ta'u nipaddi ta'ingku aruane, eteudde apan ta'u nisaggo “Nii'itta”, ne napesangke paa'aukku Yehuda wuassu Israel.
15Ana see Mawu nabbisarate si ya'u, “Pa'ola'e paassa apia ere ola'u i'o mallal᷊u'adda, arawe paassa indi ere sangkatou mallal᷊u'adda apan dal᷊eo. 16Ana waugu i Ya'u sarun mapamanaran sangkatou mallal᷊u'adda iapariaga ammul᷊annu domba-U, arawe i tou tawe maddea'a domba nawul᷊i; i tou tawe maddea'a domba apan nilamammiṛṛane, tawe lai mangundamma domba apan nal᷊essa, wuṛṛu tawe mapa'annu domba apan ta'e wiakka. Ewe'e i tou lai sassane u'inassa ṛemessu domba apan atawanne wuṛṛu nanawutta manga anu'un binatangnga udde. 17Niawontohante mallal᷊u'adda apan tawe gunane udde! It ou buatte nanantangngu ammul᷊annu dombane. Ta'iakke sarun mabbal᷊i lome wuṛṛu mata aikkatanne mabbal᷊i wuta.”
Currently Selected:
ZAKARIA 11: LAITLD
Highlight
Share
Copy
Want to have your highlights saved across all your devices? Sign up or sign in
