LUKAS 2

Asasungkangngu Mawu Yesus

(Mat. 1:18-25)

1Su tempo udde i Kaisar Agustus namarenta tadea'u anambon tumana'u Araratuannu Roma maiwoṛṛettu aranne ana see ireengnga. 2Pandareengnga paarorone indi, niamatta su tempo i Kirenius naola'a gubernure su leta'u Siria. 3Su tempo udde anambon taumata inaite mapawoṛṛettu aranne su soan sangkatou-sangkatou.

4I Yusuf inaite wuassu Nazaret su Galilea, watukku Betlehem su Yudea, su soa inasungkanganni Ratu Daud; ana waugu i Yusuf wuassu papapulunni Daud. 5I Yusuf naiwoṛṛettu aranne su sambau ringanni Maria tunangane, apan tantal᷊anna pia illoṛṛo. 6Napawe i mangitou na'omate su Betlehem, nia'omante tempone i Maria mangunsiwe. 7I tou nangunsiweten sangkatou ana'a esakka, anangnge pahul᷊u. Ana'a udde nioosannu laṛṛeme, see niapaatiilla su tampan aananannu winatangnga niampaṛṛannu laṛṛami; ana waugu i mangitou niasueannu tampa pattindahoanna.

Mallal᷊u'adda domba wuṛṛu mala'ekatta

8Su ṛabbi udde pia manga mallal᷊u'adda apan tantal᷊anna mandiaga manga dombane su wadda'u nannal᷊o su leta'a udde. 9Inaṛṛombanganne mala'ekattu Mawu natingkapasilom batanganne si mangitou, wuṛṛu semakku asasemakka wuassu Mawu nilumansiangnga nanemakka si mangitou, wuṛṛu i mangitou mangke nata'utta. 10Arawe mala'ekatta udde nabbisara, “Arie pa'ata'utta! Ana waugu i ya'u nirumanta uaapiddu Watti'u Al᷊al᷊uassa si yamiu – watti'a apan maal᷊uassa anambon taumata. 11Allo indi su soan Daud nasungkangke Ratum Punnu Sal᷊amatti yamiu, eteudde i Kristus, Mawu. 12Ete indi tatialane: I yamiu sarun maaratingnga sangkatou ana'a aoosannu laṛṛeme, niapaatiilla su tampan aananannu winatangnga.”

13Inaṛṛombanganne mala'ekatta udde raṛṛundingannannu manambo mala'ekatta waine, apan maddalo Ruata. I mangitou mabbisara,

14“Daralo su Ruata su langitta apan atanggaṛṛanne!

Wuṛṛu su wowon dunia, paddarame su taumata

apan ma'al᷊uassa naungngu Mawu!”

15Napawe manga mala'ekatta udde nanantangke mangitou wuṛṛu nabelengke su surga, manga mallal᷊u'adda uawawisarate sangkatou ringannu sangkatou, “Wette i ite inaite su Betlehem ma'ellega apa apan suete nariaddi udde, apan suete niapasingkattu Mawu si ite.”

16I mangitou lapiddu inai, see naaratingke si Maria wuṛṛu si Yusuf, wuṛṛu ana'a adio'a udde tantal᷊anna mattiilla su tampa aananannu winatangnga.

17Napawe manga mallal᷊u'adda domba naasilo ana'a udde, i mangitou nabbatti'e apa apan niapaasingkattu manga mala'ekatta su ola'u ana'a udde. 18Wuṛṛu anambon taumata naherangnga naaringikka watti'u manga mallal᷊u'adda domba udde. 19Arawe i Maria nanahipunna sarangkanambone udde sulal᷊ummu naungnge wuṛṛu iraṛṛingida. 20Manga mallal᷊u'adda domba nabelengke watukku wadda'u nannal᷊o lapiddu maddalo wuṛṛu mammantuga Ruata, ana waugu sarangkanambone apan suete inaringiṛṛanna wuṛṛu inasiloanni mangitou naṛṛino ere suete niapaasingkattu mala'ekatta si mangitou.

Mawu Yesus nionggol᷊annu aranne

21Napawe uukke ual᷊ute allo, ana'a udde nissunatte. Wuṛṛu aranne nissagote mangitou Yesus, aranna apan suete nionggolu mala'ekatta si Tou tantal᷊anna i Tou ta'e su illoṛṛon inangnge-Ne.

Mawu Yesus tinantilla su Mawu su Wal᷊e Mawu

22Na'omate tempone i Yusuf wuṛṛu i Maria mapaamattu addatta pamamaresi tumuṛṛutta Tita Musa. Nariaddi i mangitou nangapiddu ana'a udde watukku Yerusalem itantilla su Mawu. 23Ana waugu sulal᷊ummu tita Mawu uawoṛṛetta arendi, “Suapan ana'a esakka puhul᷊u sarun itantilla su Mawu.” 24I mangitou lai pia pandumma manantillu sasamba, eteudde sampare manu'a bakiangnga ara'e darua ana'u merpati ta'e maradio'a, ere suete tinantunna sulal᷊ummu tita Mawu.

25Tempo udde su Yerusalem pia sangkatou taumata aranne Simeon. I tou taumata mapia, apan matta'uttu Ruata wuṛṛu tantal᷊anna uaraṛṛaddo tempone Ruata manal᷊amatta Israel. Ghaṛṛahon Ruata uaṛṛundinganna si tou, 26wuṛṛu Ghaṛṛahon Ruata suete namasingkatta si tou manungku i tou taambe mate tantal᷊anna taambe naasilo Ratum Punnu Sal᷊amatta apan suete pina'ire Mawu. 27Wuassu aehettu Ghaṛṛahon Ruata, i Simeon sinumutta su Wal᷊e Mawu. Su tempo udde i Yusuf wuṛṛu i Maria uaapiddu Mawu Yesus, apan ta'e adio'a udde mallagun addatta apan suete niatokku Titan agama. 28Ne i Simeon nanganute ana'a udde wuṛṛu nisal᷊uruten tou, see nadalote Ruata,

29“Orassa indi, Mawu, I'o suete napasuungngu pa'aire-Nu.

Wala'ewe allang-Ngu indi mate ringannu matammuda.

30Ana waugu ringannu mata'u sassane, i ya'u suete naasilo

Punnu Sal᷊amatta wuassu Ruata.

31Punnu Sal᷊amatta apan suete nisaddia-Nu

hunane su al᷊awo'u walahanna:

32naal᷊ihida semakka apan mannemakka lal᷊annu manga walahanna waine,

ana see rumanta ringan-Nu;

eteudde asasemakka apan mandantan awawantuga

su al᷊aṛṛanang-Ngu Israel.”

33Iamangnga wuṛṛu inangngu ana'a udde naherangnga naaringikka apa apan suete niwisaran Simeon su ola'u ana'i mangitou. 34I Simeon nangal᷊amatta si mangitou wuṛṛu nabbisara si Maria, inangngu ana'a udde, “Ana'a indi suete nipilen Ruata sarun mamate wuṛṛu manal᷊amatta anambon taumatan Israel. I Tou sarun maola'a tatiala wuassu Ruata, apan sarun ipaseettu taumata nambo, 35wuṛṛu ringannu aroddi inasingkatante lal᷊oṛṛo naungngi mangitou. Asasusa sarun mangusu'a naungngu ere hal᷊ele maṛṛoro.”

36Pia lai sangkatou nabi wawine timmaddete atonna. Aranne i Hana, ana'i Fanuel, wuassu walahanna Asyer. Napawe pitute tonna wua naawingnga, 37i Hana naola'e wawine wal᷊u, wuṛṛu orassa indi uukke ual᷊utem pul᷊o appatta su tonnane. Tawe saran paassa i tou nanantangngu Wal᷊e Mawu. Allo ṛabbi i tou mattaṛṛamawu isudde su Ruata ringannu u'al᷊iomanna wuṛṛu mappuasa. 38Orassa udde lai i tou naṛṛindo'a nirumanta, see nadalo Ruata wuṛṛu uahahatto su ola'u ana'a udde ringannu awadaalla apan uaraṛṛaddo tempone Ruata mamallossu Yerusalem.

Nabelengnga watukku Nazaret

39Napawe i Yusuf wuṛṛu i Maria suete na'ola'a sarangkanambone apan niatokku tita Mawu, i mangitou napul᷊ete watukku Nazaret su Galilea. 40Ana'a udde aatambante ahewalle wuṛṛu atohanne. I Tou pande atonna wuṛṛu lembon arangnguannu Ruata.

Yesus su Wal᷊e Mawu

41Suapan tonna hagurangngu Mawu Yesus inai watukku Yerusalem maddamean Allo Wahewam Paskah. 42Wuṛṛu napawe Mawu Yesus uukke mapul᷊ote dua su tonnane, i mangitou inaite su ramea udde tumuṛṛuttu inanaramanna. 43Napawe ramea udde nasuete i mangitou napul᷊ete, arawe Mawu Yesus, ana'a udde, ta'e natantangnga su Yerusalem wuṛṛu iamangnga inangnge wagga. 44I mangitou massunna i Tou uatantalongnga suadio'a ringannu ammul᷊anna su amatanna. Napawe suete inumamatta allo massallo wakkute udde i mangitou naddea'a si Tou su wallattu manga tuṛṛangnge see hawe mangitou. 45Arawe i mangitou tawe naasangkala si Tou, nariaddi i mangitou nabelengke apia watukku Yerusalem nadea'a si Tou. 46Napawe tallute allo maddea'a, i mangitou naasangkala si Tou sulal᷊ummu Wal᷊e Mawu. I Tou tantal᷊anna ua'ianna madaringikka manga hurun agama wuṛṛu manggagillu manga aiwal᷊o. 47Anambon taumata apan naaringikka si Tou naherangnga ana waugu manga sasimbak-Ke apan masiṛṛongnga. 48Hagurang-Nge lai naherangnga naasilo si Tou. Inangnge nabbisara si Tou, “Ana'a, anio I'o na'ola'a arendi si yami? Iamangngu wuṛṛu inangngu sussinggawangnga maddea'a Si'o!”

49Mawu Yesus sinumimbakka, “Anio iamangnga wuṛṛu inangnga maddea'a si Ya'u? Iamangnga wuṛṛu inangnga wagga manungku i Ya'u ṛinone su wal᷊en Iamang-Ku?” 50Arawe i mangitou tawe naasunna sasimbakku Mawu Yesus.

51Wua'udde Mawu Yesus napul᷊ete su sampunna ringanni mangitou watukku Nazaret, wuṛṛu uararingikka si mangitou. Anambon inolaanna udde sasahipunannu inangnge sulal᷊ummu naungnge. 52Mawu Yesus mangke a'atambanna ahewalle wuṛṛu a'atambanna apandene, see iattal᷊antuppu Ruata wuṛṛu ipaapulun taumata.

Currently Selected:

LUKAS 2: LAITLD

Highlight

Copy