IMAMATTA 7

Sasamba lal᷊anna'a arugianna

1Eteindi manga atoranna su ola'u sasamba lal᷊anna'a arugianna. Sasamba udde lembon susi. 2Winatangnga maola'a sasamba ṛinone ṛatanna su pamamototanna winatangnga olaanna sasamba itattambunna, ana see daṛṛane iwokka su mezbah sandiṛṛanne appata. 3-4Imam ṛinone mangonggola su wowon mezbah anambon tawan binatangnga udde, eteudde: Tol᷊ene apan pia tawane, aṛiwungkalu apan uapi'unna lal᷊oṛṛon tianne, wabbatune wuṛṛu tawane, wuṛṛu wageangngu ate apan apianne. 5Sarangkanambone udde ṛinone itambunna su wowon mezbah maola'a sasamba annu Mawu. Sasamba udde eteudde sasamba lal᷊anna'a arugianna. 6Suapan esakka sulal᷊ummu amonannu manga imam botongnge uminassa ṛemessu sasamba udde, arawe i mangitou ṛinone uminassa su tampa apan buatte niṛṛae, ana sasamba udde lembon susi.

7Su sasamba ipangampunga rosa wuṛṛu sasamba ipallanna'a arugianna iappaatta atoranna apan uasul᷊ungnga, eteudde; Ṛemessu binatangnga apan nionggola sasamba maola'a wageangngu imam nangonggollu sasamba udde. 8Pisin binatangnga lai maola'a pussa'an imam. 9Suapan sasamba ia'imbe apan itambunna sulal᷊ummu pallol᷊oanne ara'e lahanna sulal᷊ummu urinna ara'e pangganganna, maola'a wageangngu imam apan nangonggolu sasamba udde. 10Arawe sasamba ia'imbe apan tawe nilaha, mawae ete nilo'annu lana ara'e mamara, sarangkanambone wuattu manga imam papapulunni Harun, wuṛṛu ṛinone tahianna uasul᷊ungnga si mangitou.

Sasamban paddarame

11Eteindi manga atoranna su ola'u sasamban paddarame apan ionggola su Mawu. 12Amungkangngu sasamba udde ionggola ipa'adiangkamanna, ne ringannu winatangnga udde ṛinone ionggola lai roti tawe ragine. Roti udde wotongnge maappala wuassu taponna nilo'annu lanan zaitun, wotongnge lai roti mamara manipissa apan niwuṛṛannu lana, ara'e kukisse wuassu taponna apan niola'a wuassu lanan zaitun. 13Wal᷊ine wua isudde ṛinone ionggola lai roti apan nappaattu ragi. 14Wuassu apan hatin doti sambageanganna ṛinone ionggola su Mawu, wuṛṛu udde wageangngu imam apan nanganu daṛṛan binatangnga udde wuṛṛu namokka su mezbah maola'a sasamban paddarame. 15Ṛemene ṛinone inasanna su allo binatangnga udde ionggola, saran addio'a tawe wotongnge itantangnga maddatingngu tiṛṛabbi marua'allone.

16Amungkangngu pia sangkatou uaapiddu sasamban paddarame ipanipussa riandine, ara'e maola'a sasamban apulun naungnge sassane, salaiwe tawe inasanna allo udde abbi. Lambene wotongnge inasanna tiṛṛabine. 17Amungkangngu su allo atallune ta'e pia lambene, ṛemessa udde ṛinone insueanna itambunna. 18Arawe amungkangngu su allo atallune ṛemessa udde inasanna lai, ne sasamba udde tawe sengkamanna wuṛṛu tawe mapangapiddu al᷊amatta su taumata udde, ewe'e lai maola'a ipappalli. Taumata apan niuminassa nassal᷊a wuṛṛu ṛinone mamasanna pangillul᷊eanne.

19Ṛemessa apan naeṛṛettannu saranapa ipappali ṛinone insueanna itambunna wuṛṛu imbaṛṛangnga annananna.

Ṛemessu sasamban paddarame tumba'u wotongnge annanannu taumata apan tawe nassal᷊a. 20Amungkangngu taumata uminassa ṛemessa udde su tempo i tou tantal᷊anna nassal᷊a, i tou tate lai mareengnga al᷊aṛṛana'u Ruata. 21Amungkangngu sangkatou uminassa ṛemessu sasamba udde napawe i tou buatte nangeṛṛetta saranapa apan ipappalli, mawae udde wuassu taumata ara'e lai wuassu binatangnga, i tou tate lai mareengnga al᷊aṛṛana'u Ruata.

22 Mawu nangonggolu manga atoranna indi si Musa 23hunam balahannu Israel. Tawan sapi, domba ara'e ambinga tawe wotongnge inasanna. 24Tawan binatangnga apan nate sassane ara'e ana waugu niaṛṛatu binatangnga mal᷊aṛṛaga, tawe wotongnge inasanna arawe wotongnge ipaatta su hausanne waine. 25Taumata apan uminassa tawan binatangnga apan botongnge ionggola maola'a sasamba annu Ruata, tate lai mareengnga al᷊aṛṛana'u Ruata. 26Taumatan Israel salaiwe suapa i tou uatana'a, tawe wotongnge uminassa daṛṛan manu'u winalanganna ara'e daṛṛan binatangnga waine. 27Isai apan nilumawangnga atoranna udde tate lai mareengnga al᷊aṛṛana'u Ruata.

28 Mawu nangonggolu manga atoranna indi si Musa 29hunan balahannu Israel. Isai-sai mangapiddu sasamban paddarame, ṛinone maṛṛaen sambageanganna maola'a sasamba su Mawu. 30I tou sassane ṛinone mangapiddu sasamba anna udde. Tawa wuṛṛu sabba'u binatangnga udde ṛinone ionggola maola'a sasamba iatoggokka su Mawu. 31Imam ṛinone manambunnu tawan binatangnga udde su wowon mezbah, arawe roone uddewe wageangngu manga imam. 32Palangnge aikkatanna ṛinone ionggola maola'a sasumbala niṛṛae 33su imam apan nangonggolu daṛṛa wuṛṛu tawan sasamban paddarame udde. 34Ro'o wuṛṛu palangnge aikkatanna uddewe aonggola apan buatte niṛṛaen Mawu wuassu sasamba iatoggoku walahannu Israel wuṛṛu ionggola su manga imam. Eteudde sasumbalan walahannu Israel su manga imam saran mal᷊annu-l᷊annu. 35Wuassu anna apan nionggola su Mawu, ete wageangnge udde apan nionggola si Harun wuṛṛu manga anangnge su allo i mangitou itenega maṛiaddi imam. 36Su allo udde Mawu namarenta walahannu Israel tadea'u wuassu sasamban mangitou, wageangnge udde wuattu manga imam. Atoranna udde ṛinone tuṛṛutannu walahannu Israel saran mal᷊annu-l᷊annu.

37Etearoddi manga atoranna su ola'u sasamba itattambunna, sasamba ia'imbe, sasamba ipangampungnga rosa, sasamba lal᷊anna'a arugianna wuṛṛu sasamban paddarame. 38Mawu nangonggolu manga parenta udde si Musa su Wowon Sinai su tempo i Tou nandolokku walahannu Israel nangonggolu sasamba su wadda'u Sinai.

Currently Selected:

IMAMATTA 7: LAITLD

Highlight

Copy