PANDARIADDI 39

I Yusuf wuṛṛu awingngi Potifar

1I Yusuf niapiddu manga taumatan Ismael udde watukku Mesir, wuṛṛu niwal᷊u'a si Potifar, sangkatou tembonannu ratu apan uamanara lai tembonannu mandariaga wal᷊en araratuanna. 2Mawu nantul᷊ungngi Yusuf na'oman sara i tou sidutu ma'auntunga sulal᷊ummu al᷊awo'u manarane. I tou uatana'a su wal᷊en mawune, taumatan Mesir udde. 3Tuangnge naasilo manungku Mawu nantul᷊ungngi Yusuf wuṛṛu ana waugu udde i Yusuf mahessi su al᷊awo'u manara apan mammanaranne. 4I Potifar mal᷊uassa si Yusuf wuṛṛu nitenega nabbal᷊i mangangimbe si tou sassane; ana see i Yusuf niapamanaran tou mallu'adda amonanne wuṛṛu al᷊awo'u darotongnge. 5Nanattaka orassa udde, ana waugu i Yusuf, Mawu nangal᷊amatta amonannu taumatan Mesir udde wuṛṛu sarangkanambone apan tatahuananne, mawae ete su wal᷊en ara'e su wawail᷊anna. 6Sarangkanambone apan tatahuananni Potifar tinantilla si Yusuf. Ringannu aroddi i Potifar waggaten hausannu wal᷊en tabbene'e ete ola'u wiakka.

I Yusuf matohassa wuṛṛu maṛṛamaga. 7Manga pira tempo al᷊annune, awingngi Potifar manattake pia naungnga si Yusuf, ana see umbasanna udde niaheanne matiilla suadio'a. 8I Yusuf madiri wuṛṛu nabbisara si tou, “Arie pa'asa'u i Mama, i tuanga i Potifar buatte nanantillu al᷊awo'u darotongnge si ya'u. I tou tate maṛṛingiddu manga apa su wal᷊en indi. 9Isindi taṛṛino'u uasul᷊ungngu taṛṛinone. Tawe saran sambau apan tawe niapangimanna si ya'u tumba'u i Mama tawe. Ereapa wotongnge i ya'u ma'ola'a al᷊al᷊eo udde wuṛṛu marosa su saruannu Ruata?” 10Salaiwe mamiallo awingngi Potifar massal᷊o'i Yusuf, umbasanna udde sidutu madiri matiilla suadio'a ringanni tou.

11Su allo sambau i Yusuf sinumutta sulal᷊ummu wal᷊en ma'ola'a manarane, tawe saran sangkatou isudde. 12Awingngi Potifar namangkassa si Yusuf su jubane wuṛṛu nabbisara, “Wette iaddua matiilla suadio'a.” I Yusuf nilumawangnga wuṛṛu napallossa, ana see tinumal᷊angnga su liudde, arawe jubane natantanga su liman bawine udde. 13Napawe awingngi Potifar naasilo manungku i Yusuf tinumal᷊angke wuṛṛu jubane natantangke, 14i tou namago manga mangangimbene wuṛṛu nabbisara, “Pa'ellego! Taumatan Ibrani apan niapiddu awingku su wal᷊en indi, nallobossa si ite. I tou sinumutta sulal᷊ummu wabboa'u wuṛṛu maapulu makkampassa si ya'u, arawe i ya'u niumui ma'ikka-ikkata. 15Su tempo naaringikka i ya'u u'ui, i tou tinumal᷊angnga su liudde wuṛṛu jubane natantanga.”

16Ana see awingngi Potifar nanahipunna juba udde naddatingngu awingnge napul᷊e. 17Napawe awingnge nawelengke, i tou apiddu nabbatti'a awingnge, wisarane, “Taumatan Ibrani apan niapiddu inawarendi, sinumutta sulal᷊ummu wabboa'u mallobossa si ya'u. 18Arawe su tempo i ya'u niumui, i tou tinumal᷊angnga su liudde wuṛṛu jubane natantanga.”

19I Potifar nabbal᷊i nasa'u atonna. 20Wuṛṛu i tou nandolokka tadea'u i Yusuf sametanna wuṛṛu itaṛṛo sulal᷊ummu tutupanna, su tampa tataṛṛoannu manga taumata tataṛṛangannu ratu uataṛṛo. 21Arawe Mawu nantul᷊ungngi Yusuf wuṛṛu sidutu marangngu si tou, na'oman sara tembonannu tutupanna marangngu si tou. 22Manga taumata tataṛṛanganna nipangimante niapariaga si Yusuf, wuṛṛu ete i Yusuf tinantil᷊annu winabbawa su al᷊awo'u manara apan mammanaranna sulal᷊ummu tutupanna udde. 23Tembonannu tutupanna udde tate lai mallu'adda al᷊awo'a apan buatte nipangimanna si Yusuf, ana waugu Mawu mantul᷊ungngi si tou na'oman sara i tou mahessi su al᷊awo'u manarane.

Currently Selected:

PANDARIADDI 39: LAITLD

Highlight

Copy