PANDARIADDI 31

I Yakub tinumal᷊angnga wua dinganni Laban

1I Yakub naaringikka al᷊aṛṛana'i Laban nabbisara arendi, “I Yakub buatte nanganu al᷊awo'u darotongngu iamangngi ite. Anambon pa'a'alane punnene wuassu darotongngu iamangngi ite.” 2I Yakub naasilo lai manungku i Laban tate lai masaṛṛionto'a ere dorone si tou. 3Ana see Mawu nabbisara si Yakub, “Pabelengke watukku wanuan iamangngu wuṛṛu ringannu manga tuṛṛangngu. I Ya'u sarun mallu'adda si'o.”

4Wua'udde i Yakub nandolokku taumata niapapasingkatta si Rahel wuṛṛu si Lea tadea'u maisasomban tou su wadda'a, su tampan ammul᷊annu ambinga wuṛṛu dombane. 5Ana see i Yakub nabbisara sitarua, “I ya'u ma'ellega manungku iamangngu tate masaṛṛionto'a si ya'u ere dorone; arawe Mawu Ruata apan raddaloannu iamangku ual᷊u'adda si ya'u. 6Iraddua lai masingkatta manungku i ya'u buatte nammanara ringannu iamangngu ringannu ahewallu atatoha'u. 7Salaiwe aroddi ya'u buatte niawusuanne wuṛṛu i tou namal᷊u lal᷊antakke na'oman sara paapul᷊o awawone. Arawe Ruata tawe namalan tou ma'ola'a al᷊al᷊eo si ya'u. 8Su tempo iamangngu nabbisara, ‘Ambinga apan pia boṛṛentenge sarun maola'a lal᷊antakku,’ ne al᷊awo'u ammul᷊annu winatangnga nanungkangu ana'a apan pia boṛṛentenge. Su tempo i tou nabbisara, ‘Ambinga apan pia tal᷊iṛṛawanne sarun maola'a lal᷊antakku,’ ne al᷊awo'u ammul᷊annu winatangnga udde nanungkangu ana'a tal᷊iṛṛawanna. 9Ete aroddi Ruata buatte nanganu ammul᷊annu winatangnga tatahuananni iamangngu ana see nionggola si ya'u.

10Wuṛṛu su tempo manga winatangnga udde uawawatianna, i ya'u nabbal᷊iawa naasilo anambon ambinga esakka apan tantal᷊anna uawawatianna, pia boṛṛentenge, pia titingnge wuṛṛu tal᷊iṛṛawanna. 11Wuṛṛu Ruata ringannu lihiddu mala'ekatta nabbisara si ya'u sulal᷊ummu wal᷊iawa udde, wisarane, ‘I Yakub!’ I ya'u sinumimbakka, ‘Ore’. 12Mala'ekatta udde nabbisara apia, ‘Pa'ellege, anambon ambinga esakka apan tantal᷊anna uawawatianna udde pia boṛṛentenge, wuṛṛu pia titingnge wuṛṛu tal᷊iṛṛawanna. I Ya'u nangatokku udde si'o ana waugu i ya'u buatte naasilo al᷊awo'u inolaanni Laban si'o. 13Ete i Ya'u Ruata apan buatte naipasilon batangan-Ne si'o su Betel. Poiaroddi i'o buatte nangonggolu sasamba sambau watu pananaunganna, ringannu nallal᷊innu lanan zaitun su wowone. Poiaroddi lai i'o nassalu. Orassa indi pandiahite wuṛṛu pabelengke watukku wanua niasungkangannu.’ ”

14Ana see i Lea wuṛṛu i Rahel sinumimbakka, “Tate bageangnge lai wuassu pa'a'alan iamangngi yami apan pussaanni yami. 15I yami indi si tou naal᷊ihidda taumata raho. I tou buatte nabbal᷊u'i yami wuṛṛu sarangkanambone apan buatte nisengkamma udde buatte lai niinsue. 16Anambon pa'a'ala apan buatte nianun Duata wuassu iamangngi yami udde ṛinone darotongngi yami wuṛṛu darotongngu manga ana'i yami. Tuṛṛute apa apan nirolokku Ruata si'o.”

17-18Ana see i Yakub nandiahite inai mapul᷊e ringanni iamangnge su wanua Kanaan. I tou nalluranten manga awingnge wuṛṛu manga anangnge su wowon unta, wuṛṛu i tou nangul᷊ugga anambon ammul᷊annu ambinga dombane wuṛṛu al᷊awo'u darotongnga apan niasombanganne su Mesopotamia. 19Tempo udde i Laban su wadda'a tantal᷊anna mammol᷊o wambul᷊un manga dombane, wuṛṛu ete su tempo udde i Rahel nanna'o paal᷊uanna mallal᷊u'adda amonanna darotongngu iamangnge. 20I Yakub namahia si Laban ringannu tawe namasingkattu apapul᷊ene. 21I tou nanganu al᷊awo'u darotongnge wuṛṛu inaite ringannu mal᷊iha-l᷊ihakka. I tou tinumumbe Sal᷊ukku Efrat see inaite watukku wageangu panenteannu Gilead.

I Laban nangenggenna si Yakub

22Wakkute tallu allo nal᷊iudda i Laban nipasingkatanna manungku i Yakub tinumal᷊angke. 23Ana see i Laban nangammullu manga taumatane wuṛṛu suadio'a ringanni mangitou nangenggenna si Yakub al᷊annune pitu allo nanantuṛṛutta su panenteannu Gilead. 24Ṛabbi Ruata nirumanta ringanni Laban sulal᷊ummu wal᷊iawane, wuṛṛu nabbisara, “Naunge, imbaṛṛanga i'o mamansagi Yakub salaiwe tumba'u ringannu wisara sangkapadi!” 25Su tempo udde i Yakub buatte napararisikku rasanne su sambau wuidda. Wua'udde su sambau wuidda waine su wageangu leta'a udde lai Laban wuṛṛu manga taumatane napararisiku rasanne.

26Wua'udde i Laban nabbisara si Yakub, “Anio i'o namahia si ya'u wuṛṛu nantal᷊angngu manga ana'u, i mangitou naal᷊ihidda taumata niatawanna su lal᷊ummu pangalo? 27Anio i'o namahia si ya'u wuṛṛu nangingkatta ringannu mal᷊anna-l᷊annaba, ringannu tawe bawal᷊one? Unnu wisara i'o nabbawal᷊o, i ya'u sarun nandolokku ringannu mal᷊uassa apiddu mangantarin musikku rebana wuṛṛu kecapi! 28I'o ewe'e tawe nangonggolu tempone si ya'u mangari'a ana'a pulungku maola'a tatialan patatal᷊ei. Longonna atonna pallal᷊agunu! 29I ya'u ta'e matohassa ma'ola'a al᷊al᷊eo su saruannu, arawe na'allawanna Ruata apan sassubbannu iamangngu napaanaungnga si ya'u tadea'u imbaṛṛanga i ya'u mamansagu. 30I ya'u masingkatta manungku i'o nangingkatta udde ana waugu i'o maapulu mapul᷊e. Arawe anio i'o nanna'o paal᷊uanna mallal᷊u'adda amonangku?”

31Ana see i Yakub sinumimbakka, “I ya'u nanantangnga ringannu mal᷊anna-l᷊annaba ana waugu matta'utti i Papa manaṛṛangnga manga ana'i Papa. 32Su ola'u paal᷊uanna udde, amungkangu i Papa naasangkalla sangkatou isindi apan buatte nanna'o, i tou sarun iṛṛuumanna pateanna. Parikisete, tanne pia manga saranapa darotongngi Papa isindi. Amungkangu pia, ore anute. Wuṛṛu manga taumatang kite wotongnge maola'a matatatialane.” I Yakub wagga manungku i Rahel apan nanna'o paal᷊uanna udde.

33Ana see i Laban inaite watukku rasanni Yakub wuṛṛu namarikissa; wua'udde i tou watukku rasanni Lea wuṛṛu watukku rasana aruane wuassu allangnga wawine udde, arawe paal᷊uanna udde tawe niasombanganna. Panginsueanne i tou sinumutta sulal᷊ummu rasanni Rahel. 34Tantal᷊ana udde i Rahel buatte nanganu paal᷊uanna udde wuṛṛu nitaṛṛo sulal᷊ummu pato'a aiananna su liuddu unta, wuṛṛu i tou sassane ua'ianna su aiananna udde. I Laban namarikissa ahewallu rasanni Rahel, arawe tawe naasomba paal᷊uanna udde. 35Ana see i Rahel nabbisara iamangnge, “Ariewe i Papa masa'u, i ya'u tawe maararisikka manal᷊oho si Papa, ana waugu i ya'u tantal᷊anna nirantannu rada'u wawine.” I Laban maddea'a ringannu maadunna, arawe tawe naassomba paal᷊uanna udde.

36Ne i Yakub nasa'ute, “Al᷊al᷊eo apate apan buatte ta'u niola'a?” aiwal᷊one ringannu hati mapakkada. “Apa pasasal᷊a'u na'oman sara i Papa nangenggenna si ya'u? 37Orassa indi napawe buatte namarikissa al᷊awo'u saranapa'u, apa'i Papa naasangkalla darotongngi Papa? Paasabanga'e saranapa udde wuṛṛu addoa'e isindi, tadea'u manga taumata'u wuṛṛu manga taumatan i Papa wotongnge maasilo wuṛṛu makkawessa isai su wallati ite apan naṛṛino. 38Ruan pul᷊o su tonnane i ya'u uatana'a ringanni Papa. Ammul᷊annu domba wuṛṛu ambingngi Papa nabbalage manambo, wuṛṛu taambe saran paassa i ya'u niuminassa sambau ambinga esakka wuassu winatangngi Papa. 39Iapa nate niaṛṛatu winatangnga mal᷊aṛṛaga tawe saran paassa ta'u niapidda ringanni Papa, arawe i ya'u sassane namaekka. Iapa nita'o su tempo allo ara'e ṛabbi sidutu tattuntu'anni Papa tadea'u i ya'u mamaekka. 40Masokka i ya'u apadisanna su tempo allatune wuṛṛu amansungeanna su tempo alloarane. Wuṛṛu masokka lai ya'u tawe amatiil᷊anna. 41Etearoddi ya'u su tempo mammanara ringanni Papa al᷊annune naṛṛattubba ruan pul᷊o su tonnane. Mapul᷊o appata su tonnane al᷊annune i ya'u mammanara tadea'u maasomba ruan katou ana'i Papa udde wuṛṛu annumu tonna lai tadea'u maasomba ammul᷊annu ambinga domba udde. Wuṛṛu al᷊annune udde lai i Papa namal᷊u lal᷊antakke nihaingnga paapul᷊o wuassu lal᷊antakke paarorone. 42Unnu wisara i ya'u tawe lal᷊u'arannu Ruatan al᷊amona'u, eteudde Ruata apan sassubanni Abraham wuṛṛu i Ishak, ne i Papa buatte napaasal᷊iu'u ringannu tawe ul᷊ene. Arawe Ruata buatte na'ellega asasusa'u wuṛṛu manara apan buatte ta'u niola'a, wuṛṛu masaṛṛabi i Tou buatte nakkawessa.”

Paairen i Yakub wuṛṛu i Laban

43Ana see i Laban sinumimbakka si Yakub, “Wawine darua udde ana'u; ana'i mangitou udde pussaa'u, wuṛṛu ammul᷊annu domba udde darotongku lai. Mangke atonna, al᷊awo'u saranapa apan aellehannu isindi udde tatahuanangku. Arawe i ya'u tawe mapanaṛṛangnga ana'a pulungku. 44Ana waugu udde wette iaddua makkiinnu paaire wuṛṛu mangatokku manga watu maola'a tatialan pa'aire udde.”

45Wua'udde i Yakub nanganu sambau watu wuṛṛu nipasi'a maola'a watu pananaunganna. 46Ana see i tou nandolokku manga taumatane mangammulu watu wuṛṛu niapa'ombo. Wua'udde i mangitou niumante su sampunna maranin batu ua'ombo udde. 47Watu ua'ombo udde nissagon i Laban i Yegar-Sahaduta, arawe si Yakub nissago Galed. 48Unnu i Laban si Yakub, “Ombon batu indi sarun maola'a pananaunganna siaddua.” Ana waugu udde tampa udde nissago Galed. 49I Laban nabbisara apia, “Antimanna Mawu uariaga si ite su al᷊annune i ite mabbiakka mararau.” Ana waugu udde tampa udde nissago lai Mizpa. 50I Laban nabbisara apia, “Amungkangu i'o ma'ola'a al᷊al᷊eo su al᷊aṛṛana'u, ara'e ma'awingngu manga wawine waine, salaiwe taweddu maasingkatta, paanaunge Ruata uariaga si ite. 51Eteindi manga watu apan ta'u niombo, wuṛṛu indi watu pananaunganna. 52Mawae ombone indi, ara'e watu pananaunganna udde mapaanaungnga si ite manungku i ya'u tawe wotongnge malliu ombone indi inai mamangalo si'o, wuṛṛu i'o lai tawe wotongnge malliu ombone indi inai mamangalo si ya'u. 53Ruata apan sassubbanni Abraham wuṛṛu sassubannu iamangku i Nahor sarun maola'a mallaṛṛuungnga su wallati yaddua.” Ana see i Yakub nassalu ringannu arannu Ruata apan sassubanni Ishak, iamangnge, tadea'u masuungnga pa'airene. 54I tou namototta winatangnga sambau wuṛṛu niola'a sasamba su wowon buidda udde. Ana see i tou nangahe manga taumatane umanna suadio'a, i mangitou nanaṛṛabbi su wuidda udde. 55Tiṛṛabbine marua allo maṛṛanggapa, i Laban nangonggolu aari'u patatal᷊ei su ana'a pulunne, nangal᷊amatta si mangitou, ana see napul᷊ete watukku tampa atatanaanne.

Currently Selected:

PANDARIADDI 31: LAITLD

Highlight

Copy