PANDARIADDI 27
27
I Ishak nangal᷊amatta si Yakub
1Su allo sambau, napawe i Ishak timmadete ana see lai wutate, i tou namago si Esau, anangnge pahul᷊une, ana see nabbisara si tou, “Ana'u!”
“I ya'u, Papa,” sasimbakki Esau.
2I Ishak nabbisara, “I'o masingkatta manungku i ya'u timmadete wuṛṛu asinungka tate mabbiakka mal᷊annu lai. 3Nariaddi panganute papiti'a wuṛṛu manga anaannu, roote pattaṛṛiasu sambau winatangnga su wadda'a. 4Lahate paatemangnga ere su ipaapulu'u, ana see apira'e ringangku. Napawe i ya'u buatte niumanna, i ya'u mangonggollu al᷊ama'u si'o tantal᷊anna i ya'u taambe nate.”
5Pagahahaton Ishak ruan Esau udde dararingiṛṛanni Ribka. Ne napawe i Esau inaitearoa nattaṛṛiasu, 6i Ribka nabbisarate si Yakub, “Wakku-wakku i ya'u naaringikka iamangngu nabbisara si Esau arendi, 7‘Pattaṛṛiasute sambau winatangnga wuṛṛu lahate pa'atemangnga untura'a si ya'u. Napawe i ya'u buatte niumanna, sarun ta'u ionggolla al᷊ama'u si'o su saruannu Mawu, tantal᷊anna i ya'u taambe nate.’ 8Ne ana'u,” unnu Ribka apia, “daringiṛṛete wuṛṛu ola'e sarangkanambone apan ta'u niwisara indi. 9Roote watukku tampan dombang kite, wuṛṛu pamilete darua ana'u ambingnga apan mangkatawa, tadea'u i ya'u mallaha wiakka apan al᷊utuanni papanu. 10Wua'udde apira'e ringanni tou tadea'u i tou umanna, wuṛṛu napawe wua'udde i tou sarun mangonggollu al᷊amanne si'o tantal᷊anna i tou taambe nate.”
11Arawe i Yakub nabbisara inangnge, “Mama, wal᷊inewe awa'i Esau wambul᷊uanna, arawe awa'u tawe? 12Aṛṛengenne i papa manaṛṛipo awa'u wuṛṛu maasingkatta manungku i ya'u namahia si tou; antahanna i tou wal᷊inewe mangonggolu al᷊amatta, ewe'e mamontoga si ya'u.”
13Inangnge sinumimbakka, “Arie pa'asinggawanga, Ana'a. Ya'ute mamasanna al᷊awo'u wawontoge. Pa'ola'e apa apan iwabisara'u, roote panganu manga ambinga udde.” 14Ne i Yakub inaite nanganu manga ambinga udde wuṛṛu niapidda ringannu ianangnge. Ana see i Ribka nallahate sinangngo al᷊utuanni Ishak. 15Wua'udde i Ribka nanganu laubbi Esau apianne, apan niaddon tou su wal᷊en, ana see niluṛṛe si Yakub. 16I tou namul᷊issu pisin ana'u ambinga lai su pulal᷊anna wuṛṛu ullekkan Yakub apan tawe bambul᷊une udde. 17Ana see i tou nangonggola si Yakub anna apan matemangnga wuṛṛu roti apan niolangnge.
18Wua'udde i Yakub inaite ringannu iamangnge wuṛṛu nabbisara, “Papa!”
“I ya'u” sasimbakki Ishak, “isai i'o, i Esau ara'e i Yakub?”
19I Yakub sinumimbakka, “I Esau, ana'i papa pahul᷊une; tanatan papa buatte ta'u niola'a. A'iante wuṛṛu inasse ṛemessa nilul᷊uanna apan ta'u niapidda indi, tadea'u i papa wotongnge mangal᷊amatta si ya'u.”
20I Ishak nabbisara, “mal᷊ihakka atonna i'o naasomba, Ana'a.”
Sasimbakki Yakub, “Ana waugu ete Ruata apan sassubbanni papa apan nantul᷊ungku.”
21Ana see unni Ishak si Yakub, “Wette paarani tadea'u i ya'u wotongnge maagassa si'o. Atonnawe i'o i Esau?” 22I Yakub nangundanin iamangnge, see iamangnge nanaṛṛipo si tou apiddu nabbisara, “Tingikku naal᷊ihidda tingikki Yakub, arawe pulal᷊annu naal᷊ihidda pulal᷊anni Esau.” 23I Ishak tate naillal᷊a si Yakub ana waugu pulal᷊anne pia bambul᷊une ere pulal᷊anni Esau. Arawe su tempo i tou mangal᷊amatte si Yakub, 24i tou ta'e naiwal᷊o paassa lai, “Atonnawe i'o i Esau?”
“Atonna” sasimbakki Yakub.
25Ana see i Ishak nabbisarate, “I ya'u onggol᷊eten ṛemessa udde. Napawe i ya'u buatte niumanna, i ya'u sarun mangonggollu al᷊amatta si'o.” I Yakub nangonggollu ṛemessa udde si tou wuṛṛu anggore addio'a niapa'inumma. 26Ana see iamangnge nabbisarate si tou, “Wette paarani lai, Ana'a, wuṛṛu pangari'e si ya'u.” 27Su tempo i Yakub nangundani mangari'a, i Ishak naasimbua hal᷊urun laubbi Esau, ana see i tou nangal᷊amatte si tou. Unni Ishak, “Hal᷊uru mawangngi ana'u naal᷊ihidda hal᷊urun wadda'a apan buatte nial᷊amatannu Mawu. 28Antimanna Ruata mangonggola si'o wal᷊angngukka wuassu langitta, wuṛṛu ma'ola'a manga wawail᷊annu masuwukka! Antimanna i Tou mangonggola si'o gandumma wuṛṛu anggore apan manambo-nambo! 29Antimanna manga walahanna maola'a allangngu wuṛṛu manga ṛuangannu walahanna uasuṛṛubawa si'o. Antimanna i'o uataṛṛino manga tuṛṛangngu, wuṛṛu pallaṛṛiten inangngu massubba su saruannu. Antimanna awontohana anambon taumata apan mammontoga si'o wuṛṛu al᷊amatan anambon taumata apan mangngal᷊amatta si'o.”
I Esau sinumal᷊ande al᷊amatta wuassi Ishak
30Tawe nal᷊annu napawe i Ishak buatte nangoggolu al᷊amanne wuṛṛu i Yakub nangingkate, i Esau iaangnge, napul᷊ete wua nattaṛṛiasu. 31I tou lai nallaha anna apan matemangnga ana see niapidda ringannu iamangnge, wisarane, “A'iante, Papa, wuṛṛu inasse ṛemessa apan ta'u niapidda si Papa, tadea'u i Papa mangal᷊amata si ya'u.”
32“Isai i'o?” aiwal᷊on Ishak.
“I Esau ana'i papa pahul᷊une,” sasimbakki tou.
33Ahewallu wadangngi Ishak mangngindote, wuṛṛu i tou naiwal᷊o, “Amungkangngu aroddi, isai apan buatte nilumul᷊u winatangnga wuṛṛu niapidda si ya'u tanginna? I ya'u buatte niumanna tantal᷊anna i'o taambe nirumanta. Ana see i ya'u buatte nangonggolu al᷊ama'u panginsueanne si tou, ne orassa indi naola'e pussaane saran mal᷊annu-l᷊annu.”
34Napawe i Esau naaringikka udde, i tou nilumuai ringannu ma'ikkata wuṛṛu napenen asasusa, ana see wisarane, “Al᷊amate lai ya'u, Papa!”
35I Ishak nabbisara, “Tuarinu buatte nirumanta isindi wuṛṛu namahia si ya'u. I tou buatte nanganu al᷊amatta apan ṛinone ta'u ionggola si'o.”
36I Esau nabbisara, “Indi aruane i tou namahia si ya'u. Naṛṛinote aranne i Yakub. I tou buatte nanganu hakka'u ana'a pahul᷊u, wuṛṛu orassa indi i tou nanganu lai al᷊amatta ionggola si ya'u. Apa i papa tawe al᷊amatta waine ionggola si ya'u?”
37I Ishak sinumimbakka, “I ya'u buatte na'ola'a si tou mawunu; wuṛṛu anambon manga tuṛṛangnge ta'u niola'a allangnge. I ya'u buatte nangonggola si tou gandumma wuṛṛu anggore. Orassa indi tate apa-apan ta'u olaanna si'o Ana'u!”
38I Esau tawe illol᷊one sussal᷊ande iamangnge, “Apa i papa tumba'u uatahuanna sambau al᷊amatta? Al᷊amate lai ya'u, Papa!” Ana see i tou mannatakke lulluai apia.
39Wua'udde i Ishak nabbisara si tou,
“Tate lai angngukka wuassu langitta si'o,
tate lai wawail᷊anna apan masuwukka si'o.
40I'o sarun mabbiakka wuassu hal᷊elenu,
arawe maola'a allangngu tuarinu,
arawe amungkangngu lumawangnga,
i'o sarun mal᷊iu wuassu taṛṛinone.”
41Ne i Esau nasaseeten i Yakub ana waugu iamangnge buatte nangonggollu al᷊amanne su tuarine udde. Su ṛingidde, “Tate mal᷊annu lai i papa mate wuṛṛu napawe nal᷊iudde orassa lullal᷊o, i Yakub sarun ta'u pateanna!”
I Ishak nandolokki Yakub inai ringanni Laban
42Napawe i Ribka naaringikka ṛiinni Esau udde, i tou nandolokka niapawago si Yakub wuṛṛu nabbisara, “Paddaringikka, iaangngu i Esau pia pandumma mabbal᷊issa asasa'une wuṛṛu mamate si'o. 43Ne ola'e apa apan iwabbisara'u indi. Roote paal᷊ihakka inai ringannu iaangku Laban su Haran, 44wuṛṛu atana'e ringanni tou manga pira allo al᷊annune, ma'oman sara asasa'un iaangngu masue, 45wuṛṛu i tou maabul᷊in sarangkanambone apan buatte niolangngu si tou. Wua'udde i ya'u sarun mandolokku taumata mangapiddu mapul᷊e inawarendi. I ya'u madiri awul᷊iannu ana'u darua su allo apan uasul᷊ungnga.”
46Ne i Ribka nabbisarate si Ishak, “I ya'u maddantinna wuṛṛu nualle ma'ellega manga awingngi Esau wuassu walahanna waine udde. Amungkangngu i Yakub sarun maawingngu maṛṛualan Het, mappianne i ya'u mate.”
Currently Selected:
PANDARIADDI 27: LAITLD
Highlight
Share
Copy
Want to have your highlights saved across all your devices? Sign up or sign in
