PANDARIADDI 25
25
Papapulunni Abraham wuassu awingnge waine
(1Ta. 1:32-33)
1I Abraham na'awingnga apia ringannu sangkatou wawine aranne i Ketura. 2Awingnge udde nanungkangngu manga ana'a aranne; i Zimran, i Yoksan, i Medan, i Midian, i Isybak, wuṛṛu i Suah. 3I Yoksan iamangngi Syeba wuṛṛu i Dedan, wuṛṛu papapulunni Dedan eteudde taumatan Asyur, taumatan Letus, wuṛṛu taumatan Leum. 4Al᷊aṛṛana'i Midian eteudde; i Efa, i Efer, i Henokh, i Abida, wuṛṛu i Eldaa. I mangitou sarangkanambone papapulunni Ketura.
5Salaiwe i Abraham nanantillu al᷊awo'u pa'alane si Ishak, 6su al᷊o'engngu pinabbiaṛṛanne i tou nangonggollu manambo aonggolla su manga ana'a apan niasombanganne wuassu manga awingnge waine. Wua'udde manga al᷊aṛṛana'a udde nirolokka nangingkatta watukku wageangngu leta'a su samba'a ra'in Kanaan, tadea'u marau wuassi Ishak anangnge.
I Abraham nate wuṛṛu nilabingnga
7-8I Abraham nate su uukka timadete atonna, eteudde 175 su tonnane. 9I tou nilabingngu al᷊aṛṛanangnge, eteudde i Ishak wuṛṛu i Ismael, su Liangngu Makhpela apan addone su wailla samba'an da'in Mamre. Dorone wailla udde tatahuananni Efron ana'i Zohar, taumatan Het, 10arawe buatte niwallianni Abraham wuassu taumatan Het udde. I Sara awingngi Abraham nilabingnga lai poiaroddi. 11Napawe i Abraham natete, Ruata nangal᷊amatta si Ishak, ana'i Abraham. Su tempo udde i Ishak uatana'a maranin paṛṛihi apan isassago “I Tou Apan Mallu'adda si ya'u”.
Papapulunni Ismael
(1Ta. 1:28-31)
12I Ismael uddewe ana'i Abraham wuṛṛu i Hagar, wawine Mesir, allangngi Sara udde. 13-16I Ismael naasomba ana'a siri mapul᷊o dua apan isassago isindi tumuṛṛutu allo niasungkanganne; i Nebayot, i Kedar, i Adbeel, i Mibsam, i Misyma, i Duma, i Masa, i Hadad, i Tema, i Yetur, i Nafis wuṛṛu i Kedma. Al᷊aṛṛana'a udde naola'a iupungngu al᷊amona mapul᷊o dua balahanna, wuṛṛu ampunga wuṛṛu paddasananni mangitou nisago tumuṛṛutu manga aranni mangitou. 17I Ismael uukke 137 su tonnane su tempo i tou nate. 18Papapulunne uatana'a su wageangngu leta'a su wallatu Hawila wuṛṛu Syur su samba'an ra'in Mesir watukku Asyur. I mangitou mabbiakka ual᷊aṛṛae wuassu papapulunni Abraham waine.
Asasungkangngi Esau wuṛṛu i Yakub
19Ete indi watti'i Ishak, ana'i Abraham. 20I Ishak uuke appatu pul᷊o su tonnane su tempo i tou naawingngi Ribka, tuarin Laban, ana'i Betuel, sangkatou taumatan Aram wuassu Mesopotamia. 21Ana waugu i Ribka tawe naasomba ana'a, i Ishak niumal᷊iomannu awingnge su Mawu. Wuṛṛu Mawu naddaringikka aal᷊iomanni Ishak, na'oman sara i Ribka piate illoṛṛo. 22Iloṛṛon Ribka ana'a ṛindua, wuṛṛu tantal᷊anna ana'a udde taambe niasungkangnga, itarua ual᷊aṛṛawa'a su illoṛṛon inangnge. Unni Ribka, “Anio olangnge indi sarun mariaddi si ya'u?” Ana see i tou nadorongnga tatantiro su Mawu.
23 Mawu nabbisara si tou,
“Balahanna darua udde sulal᷊ummu illoṛṛonu;
i'o sarun manungkangngu darua walahanna apan uasaseetta;
tuarine mattohasanna wuassu iaangnge
iapa pahul᷊une mangimbe tuarine.”
24Nia'omante tempone i Ribka mangunsiwe, wuṛṛu i tou nanungkangngu ana'a esakka ṛindua. 25Iapa pahul᷊une awangnge uaṛṛamutta wuṛṛu pisine naal᷊ihidda jubah pia bambul᷊une. Ana waugu udde i tou nissago i Esau. 26Su tempo ana'a aruane niasungkangnga, limane uaagassa paalli Esau. Ana waugu udde i tou nissago Yakub. I Ishak uukke annumu pul᷊o su tonnane su tempo itarua niasungkangnga.
I Esau nabbal᷊u'u hakkan ana'a pahul᷊u
27Ana'a darua udde aatambanna ahewalle. I Esau nabbal᷊i limalul᷊u apan pande wuṛṛu apulune uatana'a su wadda'a, arawe i Yakub matammudda wuṛṛu apulune uatana'a su wal᷊en. 28I Ishak lembon marangngu si Esau, ana waugu i Ishak mal᷊utu uminassa ṛemessa lallul᷊uanna. Arawe i Ribka lembon marangngu si Yakub.
29Su sambau allo su tempo i Yakub tantal᷊anna mallaha sayore buncise maṛṛamu, i Esau niramanta wua nilumul᷊u. I tou mal᷊unussa. 30Wisarane si Yakub, “I ya'u mal᷊unussa atonna. Onngol᷊e'on addio'a sayore udde.” (Ana waugu udde i tou nissago i Edom.)
31Sasimbaki Yakub, “Ore, addonganne udde hakkan ana'a pahul᷊u onggol᷊a'e asuene.”
32Unni Esau, “Ipa'ura si ya'u hakka udde. I ya'u mal᷊unusse atonna!”
33Unni Yakub Apia, “Passalute dorone manungku i'o nangonggolu hakkanu si ya'u.”
I Esau nassalu wuṛṛu nangonggollu hakkane si Yakub. 34Wua'udde i Yakub nangonggollu roti wuṛṛu sambageanganna sayore udde si tou. I Esau niumanna wuṛṛu na'inumma ana see niumamatta. Etearoddi i Esau nanggal᷊usa'a hakkan sangkatou ana'a pahul᷊u.
Currently Selected:
PANDARIADDI 25: LAITLD
Highlight
Share
Copy
Want to have your highlights saved across all your devices? Sign up or sign in
