PANDARIADDI 22
22
Ruata namarenta si Abraham tadea'u i Ishak ionggolla maola'a sasamba
1Manga pira tempo wua'udde Ruata na'annamma tatuṛṛutti Abraham. Ruata namaggo, “I Abraham!” Ana see i Abraham sinumimbakka, “I ya'u, Mawu.”
2Unnu Ruata, “Roote watukku leta'u Moria su sambau ringanni Ishak, anangngu tinggassa udde, apan lembon arangnguannu. Isudde, su sambau wowone apan Ta'u ita'e si'o, onggol᷊a'e si ya'u anangu maola'a sambau sasamba itattambunna.”
3Tiṛṛabine marua allo maṛṛanggapa, i Abraham nama'ate alun sasamba itattambunna wuṛṛu nalli'ussa alu udde su liuddu keledai. I tou inaite ringanni Ishak wuṛṛu ruan katou allangnge watukku tampa apan niapasingkattu Ruata si tou. 4Su allo atallune i Abraham naasilote tampa udde wuassu marau. 5Ana see i tou nabbisara allangnge ruan katou udde, “Iradua atana'e isindi ringannu keledai indi. I ya'u wuṛṛu ana'u inai poiaroddi massubba Mawu, paṛṛadote iambua mabelengnga ringanni radua.”
6I Abraham nangandangngu alu olaanna sasamba uddesu wambangngi Ishak, wuṛṛu lai i tou uaapiddu lari'a wuṛṛu waṛṛan putungnga ipandiitta alu. Napawe itarua u'amatta su sambau, 7i Ishak nabbisara, “Papa!”
I Abraham sinumimbakka, “Pia apa ana'u?”
I Ishak naiwal᷊o, “I ite uaapidden putungnga wuṛṛu alu, arawe suapa ana'u domba olaanna sasamba itattambunna udde?”
8I Abraham sinumimbakka, “Ruata sassane sarun manaddia ana'u domba udde.” Ana see itarua nanassukku amatanna.
9Napawe itarua na'omate su tampa apan niwal᷊on Duata si Abraham, i tou napararisikku sambau mezbah wuṛṛu nangatokku alu udde su wowone. Ana see i tou nakkapussa ana'a wuṛṛu niapal᷊allowanga su mezbah, su wowon alu udde. 10Wua'udde, i tou nanganu lari'a ipamate anangnge. 11Arawe mala'ekattu Mawu niumui si tou wuassu langitta, “Abraham, Abraham!”
Sasimbakki Abraham, “I ya'u, Mawu!”
12“Imbaṛṛangnga mamate ana'a udde ara'e olaannu ereapa i tou,” unnu Mawu sulal᷊ummu mala'ekata udde. “Orassa indi i Ya'u masingkatta manungku i'o maadatta wuṛṛu matuṛṛutta si Ya'u, ana waugu i'o tawe nanol᷊a'a manantillu anangngu tinggassa udde si Ya'u.”
13Ana see i Abraham na'ellega uapal᷊iwutta si tou wuṛṛu naasilo sambau domba esakka apan tatandunge naaitta su aputta. I Abraham nanganu domba udde ana see niola'a sasamba su Mawu pinanal᷊i anangnge. 14Tampa udde nissagon Abraham “Mawu manaddia apa hagausanna.” Wuṛṛu naddatingngu orassa indi lai taumata mabbisara, “Roso su wowo-Ne Mawu nanaddia apan hagausanna”.
15Paassa lai wuassu langitta mala'ekattu Mawu niumui si Abraham, 16“Mawu nabbisara: i Ya'u massalu ringannu arang-Ku sassane, ana waugu i'o buatte na'ola'a inolaanna indi wuṛṛu tawe nanol᷊a'a manantillu anangngu tinggassa udde si Ya'u, 17i Ya'u sarun mangal᷊amatta si'o ringannu lumambalanna wuṛṛu ma'ola'a papapulunnu anambone naal᷊ihidda anumputanna su langitta wuṛṛu anambone naal᷊ihidda anne su apannu tahal᷊oangnga. Anangngu pulunnu sarun malluṛṛugu manga seetti mangitou. 18Anambon balahanna su runia sarun sumal᷊ande si Ya'u tadea'u i Ya'u mangal᷊amatta si mangitou su ereapa i Ya'u nangal᷊amatta papapulunnu – ana waugu i'o buatte tinumuṛṛutta parenta-U.” 19Wua'udde i Abraham nabelengke ringannu allangnge darua, ana see i mangitou suadio'a inaite watukku Bersyeba, wuṛṛu i Abraham namanuate poiaroddi.
Papapulunni Nahor
20I Abraham pia iaangnga aranne i Nahor. Napawe nal᷊iudde arariadianna su Wowon Moria udde, i Abraham naaringikka manungku i Milka, awingngi Nahor piate siri ual᷊u ana'a esakka eteudde: 21i Us, iapa pahul᷊une, i Bus, tuarine; i Kemuel, apan sal᷊immurine nariaddi yamangngi Aram; 22i Kesed, i Hazo, i Pildas, i Yidlaf, wuṛṛu i Betuel, 23apan sal᷊immurine nariaddi iamangngi Ribka. 24I Nahor pia awingnge aruane aranne i Reuma wuṛṛu awingnge udde nanungkangngi Tebah, i Gaham, i Tahas wuṛṛu i Maakha.
Currently Selected:
PANDARIADDI 22: LAITLD
Highlight
Share
Copy
Want to have your highlights saved across all your devices? Sign up or sign in
