PANDARIADDI 15
15
Pa'airen Duata ringanni Abram
1Wua'udde, i Abram naasomba sondappa wuṛṛu naaringikka Mawu nabbisara si tou, “Arie paata'utta, i Abram, i Ya'u sarun mallu'adda si'o wuassu asasilaka, wuṛṛu mangonggolla si'o lal᷊antakke apan manambo.”
2-3Arawe i Abram nabbisara, “Mawu Apan Atanggaṛṛanne, Mawu tawe nangonggollu ana'a si ya'u. Taumata apan mamusa'a darotongku tumba'u i Eliezer, allangku wuassu Damsyik. Nariaddi apa hunane Mawu mangonggollu lal᷊antakke si ya'u?”
4Wua'udde i Abram naaringikka Mawu nabbisara si tou apia, “Wal᷊ine allangngu apan sarun mamusa'a darotongngu, ewe'e anangngu esakka sassane.” 5Mawu nangapiddi Abram su liudde ana see nabbisara si tou, “Paningngarate langitta, wuṛṛu annama'o pandeengngu manga anumpitanna; i'o sarun manahuanna papapulunna anambone ere manga anumpitanna udde.”
6I Abram nangimante Mawu, wuṛṛu ana waugu udde Mawu nanengkamma lai si tou maola'a taumata apan ma'al᷊uassa naung-Nge.
7Wua'udde Mawu nabbisara apia si tou, “Ete i Ya'u Mawu, apan buatte namiaṛṛangngu sinumabbangnga wuassu wanua Ur su Babilonia, tadea'u panantilannu leta'a indi si'o maola'a pusaanu.”
8Arawe i Abram naiwal᷊o, “Oh, Mawu Apan Atanggaṛṛanne, ereapa i ya'u wotongnge maasingkatta manungku leta'a udde maola'a pusaa'u?”
9 Mawu sinumimbakka, “Panganute onggol᷊a'a si Ya'u sambau sapi wawine, sambau ambingnga wawine wuṛṛu sambau domba esakka, sambau-sambau uukke tallu tonna, wuṛṛu lai sambau manu'a tekukur wuṛṛu sambau manu'a merpati.” 10Ana see i Abram nanganute manga winatangnga udde ionggolla su Ruata. Sapi ambingnga wuṛṛu domba udde sambau-sambau niwa'a nabbal᷊i darua, wuṛṛu manga wa'ane udde niaddo uasasaruanna niantaga paddarua. Arawe manga munu'u winalanganna udde tawe niwa'a. 11Ṛemessa udde niarunannu manga manu'u winalanganna taṛṛa inassa winal᷊unanna, arawe i Abram nallimbuakka si mangitou.
12Napawe matannallo umatuppe, i Abram niamatiil᷊anna mal᷊angnga. Inaṛṛombanganne i tou ni rantannu atata'utta tumaniten bahewalla. 13Mawu nabbisara si tou, “Paanaunge, papapulunnu sarun mabbal᷊i taumata raho su wanua waine; i mangitou sarun maola'a allangnga poiaroddi wuṛṛu sarun mattaṛṛuallangnga appattu ṛasutta su tonnane al᷊annune. 14Arawe balahanna apan mangngallangnga papapulunnu udde sarun Ta'u iṛṛuumanna wuṛṛu su tempo papapulunnu manantangngu wanua udde, i mangitou sarun mangapiddu manambo darortongnga. 15I'o sassane sarun maal᷊al᷊appa uukka apan matanggakka; i'o sarun mate ringannu matammudda, ana see ilabbingnga. 16Napawe nal᷊iute papapulunnu su aippatu ṛawanne, papapulunnu sarun mabelengnga apia isindi, ana waugu i Ya'u tawe mallimbuakka taumatan Amori tantal᷊anna i mangitou taambe naola'a aroddi al᷊aleone ma'oman sara wotongnge iṛṛuumanna.”
17Napawe allo ṛabbite, inaṛṛombanganne nilumapputta sambau sunggilla apan pia timbulle wuṛṛu sasol᷊oanna apan luṛṛenggamma, ana see sinumabbi su wallattu manga ṛemessa apan buatte niwa'a udde. 18Su tempo udde lai Mawu na'ola'a pa'aire ringanni Abram. Mawu nabbisara, “I Ya'u maddiandi sarun mangonggolla su papapulunnu ahewallu leta'a indi, manattakka wuassu passarannu wanua Mesir maddatingngu sal᷊ukku Efrat, 19nasutta lai leta'u taumatan Keni, Kenas, Kadmon, 20Her, Feris, Refaim, 21Amori, Kanaan, Girgasi wuṛṛu Yebus.”
Currently Selected:
PANDARIADDI 15: LAITLD
Highlight
Share
Copy
Want to have your highlights saved across all your devices? Sign up or sign in
