SASABANGNGA 40

Rasannu Mawu niapararisikka wuṛṛu niṛṛae tumba'u su Mawu

1 Mawu nabbisara si Musa, 2“Pararisiṛṛa'e Rasang-Ku su allo paarorone su wul᷊anna paarorone. 3Sutta'a sulal᷊umme Wantallu Pa'aire apan lal᷊oṛṛoannu Mapul᷊o Tita wuṛṛu taapeten mal᷊aṛṛenessa su saruanne. 4Addoa'e medda ringannu saranapane. Sutta'e lai leddan sol᷊o wuṛṛu re'omete sol᷊one. 5Addoa'e mezbah wul᷊awanna tampan panutunganna amania su saruannu Wantallu Pa'aire, wuṛṛu elea'e sasarane su ngaran Dasanna. 6Addoa'e mezbah sasamba itattambunna su saruannu ngaran Dasanna. 7Addoa'e tampan ua'e su pattangngannu Rasanna wuṛṛu mezbah udde, ana see loṛṛoiten ua'e. 8Wua'udde elea'e senggota pamal᷊liwuta'a rallaku Rasanna, wuṛṛu elea'e lai pampelen ngaran pasallanganna.

9Wua'udde Rasanna wuṛṛu al᷊awo'u saranapane ṛinone ionggola si Ya'u ringannu olangnge mallana lanan lal᷊aghu, ne sarangkanambone udde niṛṛae si Ya'u. 10Onggol᷊a'a mezbah wuṛṛu al᷊awo'u saranapane ringannu laghune aroddi, tadea'u sarangkanambone iṛṛae huna'u. 11Ola'e aroddi lai su tampan ua'e wuṛṛu apampakke.

12Wua'udde, doloṛṛa'e i Harun wuṛṛu manga anangnge rumanta su ngaran Dasanna wuṛṛu mangukkasa watanganne. 13Luṛṛea'e laubbu imam si Harun, wuṛṛu lanaite i tou tadea'u i tou iṛṛa'e mangimbe si Ya'u maola'a imam. 14Ana see doloṛṛa'e manga anangnge mangundani, wuṛṛu luṛṛea'e kemeja si mangitou. 15Ana see lanaite i mangitou ere i'o nallana iamangngi mangitou, tadea'u i mangitou lai wotongnge mangimbe si Ya'u maola'a imam. Ringannu lal᷊aghun lanan udde, ṛuanganni mangitou saran papapulunne uaagassa manara imam.”

16I Musa tinumuṛṛutta sarangkanambone ere buatte niparentan Mawu. 17Ne su allo paarorone wul᷊anna paarorone sulal᷊ummu tonna aruane napawe balahannu Israel buatte nanantangngu Mesir, Rasannu Mawu udde niapararisikka. 18I Musa nangaddon rapappake, napararisikku manga salaba'ukke, namasangngu manga alu wawarene wuṛṛu nanul᷊idda manga diṛṛine. 19Ana see i tou namilattu atuppu Rasanna ringannu lal᷊uubbe su liudde al᷊iurosone ere niparentan Mawu. 20Wua'udde watu udde nitaṛṛo sulal᷊ummu Wantallu Pa'aire. Ana see i Musa nanutubbu Wantalla udde wuṛṛu nanuṛṛin alu papasanna sulal᷊ummu hal᷊angnge. 21Ana see i tou nangaddon Wantalla sulal᷊ummu Rasanna wuṛṛu nangelen mal᷊aṛṛenessa tataamme su saruanne, ere buatte niparentan Mawu si tou.

22Wua'udde i Musa nangaddon medda sulal᷊ummu Rasanna, su wageangngu sawannaka su liuddu mal᷊aṛṛenessa, 23ana see su wowon medda udde niatokka roti ia'imbe. 24Leddan sol᷊o niaddo sulal᷊ummu Rasanna, su wageangngu timukka, uasaruanna medda udde, 25ana see, manga sol᷊o udde nire'omanna su saruannu Mawu. 26Mezbah wul᷊awanna niaddo sulal᷊ummu Rasanna, su saruannu mal᷊aṛṛenessa, 27ana see i tou nanambunnu amania mawangngi ere buatte niparentan Mawu si Musa. 28I Musa nangelen pampele ngaran Dasanna, 29wuṛṛu su saruannu ngara udde i tou nangaddon medda pangadoannu sasamba itattambunna. Su wowon mezbah udde i tou nangonggolu sasamba itattambunna maola'a wuṛṛu sasamba ia'imbe. 30Tampan witu'a niaddon tou su wallatu Rasanna wuṛṛu mezbah, ana see tinaṛṛoanni tou ua'e. 31I Musa, i Harun wuṛṛu manga anangnge nangukkassa lima wuṛṛu leddan mangitou isudde, 32suapan i mangitou sumutta sulal᷊ummu Rasannu Mawu ara'e mangundanin mezbah. 33Uapal᷊iwutta Rasanna wuṛṛu mezbah udde i Musa nangelen senggota, ana see i tou nangelen pampele ngara pasallanganna. Ne anambon manara udde nasuete.

Winabbawa nangooppa Rasannu Mawu

(Reg. 9:15-23)

34Wua'udde niumonto'e winabbawa nangooppa Rasannu Mawu, wuṛṛu Rasanna udde napenen semakku darantan Mawu. 35Ana waugu udde i Musa tawe naasutta sulal᷊ummu Rasanna udde. 36Suapan winabbawa udde ire'e wuassu Rasannu Mawu, walahannu Israel manggohakku paddasananni mangitou wuṛṛu mangingkatta su tampa waine. 37Arawe amungkangngu winabbawa udde tawe ire'e, i mangitou tawe manatangngu tampa udde. 38Su al᷊annun balahannu Israel mammal᷊intadda, Mawu uatana'a su Rasanna udde sulal᷊ummu lihiddu winabbawa su tempo allo wuṛṛu lihiddu putungnga su tempo ṛabbi.

Currently Selected:

SASABANGNGA 40: LAITLD

Highlight

Copy