SASABANGNGA 23

Atatul᷊idda wuṛṛu apapian naungnga

1“Imbaṛṛangnga manal᷊iawukku watti'a awusu, wuṛṛu imbaṛṛangnga mantul᷊ungngu taumata lal᷊eo apan mattiala awusu. 2Imbaṛṛangnga matatuṛṛutannu awada'alla amungkangngu i mangitou ma'ola'a sal᷊a ara'e mammengkollu tita ringannu mattiala awusu. 3Imbaṛṛangnga mamile hatin taumata sulal᷊ummu hatton pallaṛṛuungnga, salaiwe papparikisanna udde taumata asiangnga.

4Amungkangngu i yamiu unnu wisara naasilo sapi ara'e keledain seetti yamiu nilamammiṛṛanne, apira'e welenga'a su tatahuanne. 5Amungkangngu keledain seennu nal᷊iundu'a ana waugu mawakkata luranne, tul᷊unga'a i tou mamatunna keledai udde; arie pattantanga'a aroddi.

6Ola'e taumata asiangnga ringannu atatul᷊idda amungkangngu i tou rumanta mangapiddu hattone su mallaṛṛuungnga. 7Paaraua'a aansilla awusu wuṛṛu imbaṛṛangnga taumata tawe sal᷊ane iṛṛuumanna pateanna, ana waugu i Ya'u tawe manamba'a taumata apan ma'ola'a al᷊al᷊eo ereudde. 8Imbaṛṛangnga manengkamma roitta aonggolla, ana waugu roitta aonggolla udde ma'awuta su ola'u inolaanna mapia wuṛṛu ma'arugi manga taumata apan tawe sal᷊ane.

9Imbaṛṛangnga mandal᷊eo taumata raho ringannu walate apulunu; i yamiu masingkatta ereapa pendamanna maola'a taumata raho, ana waugu dorone i yamiu lai taumata raho su Mesir.”

Tonna appitune wuṛṛu allo appitune

10“Annummu tonna al᷊annune i yamiu wotongnge massuanna su wawail᷊annu wuṛṛu mani'o manga wuane. 11Arawe su tonna appitune leta'a udde ṛinone iwalan kamiu. Su al᷊annun tonna udde i yamiu tawe wotongnge mangammulu saranapa apan tinumuwo sassane su wawail᷊annu. Wala'e udde onggol᷊a'a su taumata asiangnga, wuṛṛu lambene su winatangnga matengnga. Wala'e aroddi lai su waillu anggore wuṛṛu manga punnu alu zaitunnu.

12Annumu allo sulal᷊ummu sangkamisa i yamiu wotongnge mammanara, arawe su allo appitune i yamiu ṛinone mangillol᷊o, tadea'u winatangngu, manga allangnga wuṛṛu manga taumata raho apan mammanara ringannu wotongnge mangillol᷊o lai.

13Daringiṛṛete sarangkanambone apan buatte Ta'u niwisara si'o. Imbaṛṛangnga massubba manga Mawu waine, ewe'e lai managgon aranne lai arie.”

Atoranna su ola'u manga allo wahewa

(Sab. 34:18-26; Tah. 16:1-17)

14“Suapan tonna ṛinone i yamiu mallaghun tatallu allo wahewa ipangaddata si Ya'u. 15Sulal᷊ummu wul᷊anna Abib, su allo apan buatte tinantunna, i yamiu ṛinone maddamean Andeangngu Roti Tawe Ragine ringannu tul᷊adane apan Ta'u niparenta si yamiu, ana waugu sulal᷊ummu wul᷊anna udde i yamiu nanantangngu Mesir. Imbaṛṛangnga umanna roti apan niola'a nappaatu ragi sulal᷊ummu ramea pitu allo udde. Suapan i yamiu rumanta mattaṛṛamawu si Ya'u, i yamiu ṛinone mangapiddu aonggolla.

16Laghua'e Andeangngu Pangangitingnga su tempo i yamiu mannattake mangitingnga wua paaororone su wawail᷊annu.

Laghua'e Andeangngu Rasannu Rongnga su panginsueannu tonna su tempo i yamiu mangammulu hessin baillu anggore wuṛṛu waillu manga wuan aaluanna.

17Suapan tonna su tempo mallaghun tatallu ramea udde, anambon taumata esakka ṛinone rumanta mattaṛṛamawu si Ya'u, Ruatanu.

18Imbaṛṛangnga mangonggolu roti apan pia ragine su tempo i yamiu mangonggolu sasamba winatangnga si Ya'u. Tawan binatangnga apan niola'a sasamba nionggola si Ya'u su tempo manga ramea udde tawe wotongnge itantangnga ma'oman sara tiṛṛabbi rua'allone.

19Suapan tonna i yamiu ṛinone mangapidda watukku wal᷊en Ruatanu gandumma paarorone apan niitingngi yamiu.

Ṛemessu ana'u domba ara'e ana'u ambingnga tawe wotongnge lahannu ua'en susun inangnge.”

Pa'aire wuṛṛu parenta

20“I Ya'u sarun mandolokku mala'eka-U malliu ṛoro si yamiu iapal᷊u'adda si yamiu sulal᷊ummu amatanna wuṛṛu mangapiddi yamiu watukku tampa apan buatte nisaddia-U. 21Paddaringikka wuṛṛu paatuṛṛutta si tou. Imbaṛṛangnga lumawangnga si tou ana waugu i tou daroloṛṛang-Ku, wuṛṛu i tou tawe mangampungnga pasasal᷊anu. 22Amungkangngu i yamiu matuṛṛutta si tou wuṛṛu ma'ola'a sarangkanambone apan Ta'u nirolokka, I Ya'u sarun mapapangalo mandoappa anambon seennu. 23Mala'eka-U sarun malliu ṛoro si yamiu wuṛṛu mangapiddi yamiu watukku wanuan balahannu Amori, Het, Feris, Kanaan, Hewi wuṛṛu Yebus, wuṛṛu i mangitou sarun Ta'u pateanna. 24Imbaṛṛangnga massubba manga paal᷊uanna mallal᷊u'adda si mangitou wuṛṛu imbaṛṛangnga mattanno ola'i mangitou mattaṛṛamawu. Ṛimunsa'e manga paal᷊uanna mallal᷊u'addi mangitou udde wuṛṛu paddite manga diṛṛi watu apan nipaatti mangitou pattaṛṛamawuanna. 25Amungkangngu i yamiu massubba si Ya'u, Ruatanu, i yamiu sarun Ta'u al᷊amatannu anna wuṛṛu ua'e, wuṛṛu al᷊awo'u radda'a sarun Ta'u iapaarau wuassi yamiu. 26Su wanuanu sarun tawe bawine anawoanna ara'e tinna. I yamiu sarun Ta'u onggol᷊annu uukka mal᷊o'engnga.

27Manga walahanna apan rantanni yamiu sarun Ta'u olaanna matta'utta su saruang-Ku; i mangitou sarun Ta'u olaanna maal᷊iba'ukka; seennu sarangkanambone sarun mabelengnga wuṛṛu tumal᷊angnga. 28Manga seennu sarun Ta'u isongkakka, wuṛṛu manga walahannu Het Ta'u limbuaṛṛanna wuassu saruannu tadea'u i yamiu wotongnge umamatta. 29I mangitou tawe Ta'u limbuaṛṛanna paassa sulal᷊ummu santonna, tadea'u leta'a udde tawe ma'ahuranganna, wuṛṛu winatangnga mal᷊aṛṛaga tawe walate apulune. 30I mangitou sarun Ta'u limbuaṛṛanna passambageanganna, ma'oman sara manga taumatanu manambote matana'a su leta'a udde. 31Manga passarannu wanuannu sarun Ta'u iatokka wuassu Tongokku Akaba maddatingngu Sal᷊ukku Efrat, wuṛṛu wuassu Tahal᷊oangngu Tangngane maddatingngu wadda'a lol᷊okka. I yamiu Ta'u onggol᷊annu taṛṛino su tumana'u wanua udde, na'oman sara i mangitou wotongnge limbuaṛṛanni yamiu su tempo i yamiu inaite mangaṛṛo leta'a udde. 32Imbaṛṛangnga ma'ola'a pa'aire ringannu manga taumata udde ara'e ringannu manga mawun mangitou. 33Arie pabbala'a manga taumata udde matana'a su wanuanu, tadea'u i yamiu tawe massubba manga mawun mangitou wuṛṛu ma'ola'a rosa su saruang-Ku. Amungkangngu i yamiu massubba manga mawun mangitou, i yamiu nanawote sulal᷊ummu loṛṛangngu papate.”

Currently Selected:

SASABANGNGA 23: LAITLD

Highlight

Copy