SASABANGNGA 18

I Yitro nattembo si Musa

1I Yitro la'iananni Musa, imam su Midian, naaringikka su ola'u sarangkanambone apan nimanara Mawu si Musa wuṛṛu balahannu Israel, su tempo udde i tou namiaṛṛa'i mangitou sinumabangnga wuassu Mesir. 2Ne Yitro inaite nattembo si Musa, uaapiddi Zipora, awingngi Musa apan ta'e uatana'a su Midian, 3suadio'a ringanni Gersom wuṛṛu i Eliezer, ruan katou anangnge esakka. Anangnge paarorone nisago Gersom ana waugu i Musa nabbisara, “I ya'u sangkatou rumaratingnga su wanua waine”, 4ana'a aruane nisago i Eliezer ana waugu i Musa nabbisara, “Ruata wabbantuhannu iupungngu al᷊amona'u buatte nantul᷊ungnga wuṛṛu nanal᷊amatta si ya'u na'oman sara i ya'u tawe niapaten ratun Mesir”. 5I Yitro nirumanta suadio'a ringannu awingngi Musa wuṛṛu anangnge darua watukku wadda'a su tampa i Musa naddasanna maranin bowone na'ukkassa. 6I Musa nipasingkatanna manungku i mangitou rumanta, 7ne sinumabbangke i tou nanal᷊oho si mangitou. I tou niumal᷊intudda su saruanni Yitro wuṛṛu nangari'a. I mangitou uaaiwal᷊ote al᷊al᷊uassu wadangngu sangkatou-sangkatou, ana see sinumuttate sulal᷊ummu rasanni Musa. 8I Musa nabbatti'a su la'iananne sarangkanambone apan niola'u Mawu su saruannu ratu wuṛṛu walahannu Mesir tadea'u ipanal᷊amatta taumatan Israel. I tou lai nabbatti'a su la'iananne su ola'u manga asasusa apan sasaruanannu walahannu Israel su tangngan amatanna, wuṛṛu ereapa Mawu nanal᷊amatta si mangitou. 9Naaringikka sarangkanambone udde, i Yitro mangke lulluassa, 10wuṛṛu nabbisara, “Dalo su Mawu apan nanal᷊amatta si yamiu wuassu liman datu wuṛṛu walahannu Mesir! Dalo su Mawu apan namallossu walahannu Israel wuassu patataṛṛualanga! 11Orassa indi ya'u masingkatte manungku Mawu maggewal᷊anna wuassu anambon Mawu, ana waugu sarangkanambone udde niolang-Nge su tempo taumatan Mesir inolaanne tumaniten mawunga su saruannu taumatan Israel.” 12Wua'udde i Yitro nangapiddu manga pira sasamba itattambunna wuṛṛu sasamba pappototanna maola'a sambau sasamba su Ruata. I Harun wuṛṛu anambon piaṛa'u walahannu Israel nirumanta wuṛṛu niumanna suadio'a ṛinganni Yitro sulal᷊ummu darantan Duata.

I Musa nanenegu manga Mallaṛuunga

(Tah. 1:9-18)

13Su allo tiṛabbine i Musa naṛṛunnu manga hatto suwallatu manga taumatan Israel. Manara udde nanganu tempo wuassu marua'allo naddatingngu ṛabbi. 14Sutempo i Yitro naasilo sarangkanambone apan mammanaranni Musa, i tou naiwal᷊o, “Apate ṛinone manarannu su walahanna indi? Ṛinone sarangkanambone indi manarannu sassane, na'oman sara madorongnga al᷊aṛṛangu lai, manga taumata udde sarun dumarisikka isindi wuassu marua'allo maddatingngu ṛabbi?”

15I Musa sinumimbakka, “Manga taumata udde nirumanta ringangku madea'a maasingkatta apulun Duata. 16Amungkangu i mangitou matatiakka, i mangitou sumaruanna si ya'u tadea'u makkawessu hatton mangitou, wuṛṛu ta'u iapasingkatta si mangitou manga parenta wuṛṛu manga titan Duata.”

17Unni Yitro, “Dal᷊eo aroddi. 18Ringannu olangnge aroddi i'o mallotakka watangannu sassane, wuṛṛu lai manga taumata udde. Manara udde tumaniten manambo agasannu sangkatou. 19Paddaringikke al᷊aṛṛa'u, ana see Ruata sarun mantul᷊ungngu. Atonna i'o mapia uapiaṛṛa'u walahanna indi su saruannu Ruata wuṛṛu mangapiddu hatton mangitou si Tou. 20I'o ṛinone mangaṛṛa'a si mangitou manga parentan Duata manal᷊a'an ola'u ereapa mabbiakka mapia wuṛṛu apa apan ṛinone olaanni mangitou. 21Arawe su liuddu udde lai i'o ṛinone mamile manga pira taumata esakka apan pande, wuṛṛu manebbo'i mangitou maola'a piaṛṛa'u saṛṛiwu su atoune, maṛṛasutta su atoune, liman pul᷊o su atoune wuṛṛu mapul᷊o su atoune. I mangitou ṛinone manga taumata apan matta'utta wuṛṛu matuṛṛutta Mawu, wotangnge pangimananna wuṛṛu maddiri manengkamma aonggola. 22Doloṛṛa'e i mangitou mammanara maola'a mallaṛṛuungngu walahanna indi, sangkatou-sangkatou su wageangnge. Manara indi ṛinone olaanni mangitou ringannu uaatokka. Manga hatto apan asaharanne wotongnge iapiddi mangitou ringannu, arawe pattatatiakka maradio'a wotongnge insuanni mangitou sassane. Olangnge udde ma'aṛṛanna manaranu ana waugu i mangitou niawuatannu manarane. 23Amungkangngu i'o ma'ola'a aroddi, wuṛṛu olangnge udde niatokku Ruata si'o, i'o sarun botongnge maaola'a manaranu, wuṛṛu anambon taumata sarun mapul᷊e ringannu naungnga mal᷊uassa ana waugu hatton mangitou niola'a ringannu mapia.”

24I Musa naddaringikka al᷊aṛṛa'i Yitro, 25wuṛṛu namile manga taumata apan pande su wallatu walahannu Israel. I tou nanebo'i mangitou naola'a piaṛṛa'u saṛṛiwu su atoune, maṛṛasutta su atoune, liman pul᷊o su atoune, wuṛṛu mapul᷊o su atoune. 26I mangitou napaamattu manarane naola'a manga mallaṛṛuungnga su walahannu Israel. Manga hatto apan asaharanne iapiddi mangitou si Musa, arawe pattatatiakka maradio'a insueanni mangitou sassane. 27Wua'udde i Musa nandolokken i Yitro inai watukku wanuane.

Currently Selected:

SASABANGNGA 18: LAITLD

Highlight

Copy