SASABANGNGA 17
17
Ua'e wuassu watu wahewa
(Reg. 20:1-13)
1Wua'udde walahannu Israel sarangkanambone nanantangu wadda'u Sin wuṛṛu mangngingkate wuassu tampa sambau watukku tampa waine ere buatte nirolokku Mawu. Su allo sambau i mangitou naddasanna su Rafidim, arawe isudde tawe ua'e pa'inumanna. 2Ana see i mangitou sussawutulle si Musa wuṛṛu nabbisara, “Yami onggol᷊ewen ua'e pa'inumanna.” I Musa sinumimbakka, “Anio i yamiu sussawutulla wuṛṛu mannal᷊u'atta Mawu?”
3Arawe manga taumata udde mangke tumaniten marou wuṛṛu i mangitou sidutu sussawutulla si Musa. Unni mangitou, “Anio i'o nangapiddi yami sinumabbangnga wuassu Mesir? Tadea'u yami, manga ana'i yami wuṛṛu winatangngi yami mate marou?”
4Ne i Musa sinumal᷊andete Mawu, wisarane, “Apa ṛinone ta'u olaanna su manga taumata indi? Pa'ellege, i mangitou ma'apulu manuntungngu watu si ya'u.”
5Unnu Mawu si Musa, “Waggoite siri pira taumata piaṛṛange wuṛṛu amata'e suadio'a ringanni mangitou malliu ṛoro balahanna udde. Apira'a lai ta'inna apan nipaatta pinamuulla Sal᷊ukku Nil. 6I Ya'u sarun rumarisikka su saruannu su wowon sambau watu wahewa su Wowon Sinai. Puulle watu udde, ne ua'e sarun sumabbangnga na'oman sara manga taumata udde wotongngete ma'inumma.” I Musa na'ola'a aroddi aellehannu manga piaṛṛa'u Israel.
7Tampa udde nisaggo Masa ana waugu ete su tampa udde taumatan Israel nanal᷊u'atta Mawu su tempo i mangitou naiwal᷊o, “Tanne Mawu uarundinganna si ite ara'e tawe?” Tampa udde lai isassago Meriba ana waugu su tampa udde taumatan Israel sussawutulla.
Pangalo ringannu taumatan Amalek
8Wua'udde taumatan Amalek nirumanta wuṛṛu namangalo taumatan Israel su Rafidim. 9Unni Musa si Yosua, “Pamilete manga siri pira taumata inai mamangalo taumatan Amalek. Tiṛṛabbi ya'u sarun dumarisikka su puiddu wuidda mangagassa ta'inna apan niapaapiddu Mawu.” 10I Yosua tinumuṛṛutta apa apan nirolokki Musa si tou. I tou inaite namangalo taumatan Amalek, tantal᷊anna i Musa, i Harun wuṛṛu i Hur sinuma'a wuidda naddatingngu puidde. 11Su al᷊annune i Musa uawatten limane, taumatan Israel naauntunga. Arawe napawe ta'iakki Musa maado wowa, ete taumatan Amalek apan maauntunga. 12Napawe i Musa nal᷊otakke, i Harun wuṛṛu i Hur nanganu sambau watu tadea'u i Musa wotongnge uma'ianna; i Harun wuṛṛu i Hur uarisikka su samba'a aiṛṛi wuṛṛu aikkatanni Musa uatumpulla limane tadea'u sidutu uawatte maddatingngu matannallo umattuppa. 13Panginsueanne taumatan Amalek niawaddon i Yosua.
14 Mawu nabbisara si Musa, “Woṛṛeta'e ola'u auntunganni yamiu indi tadea'u sidutu nannaunganna. Wal᷊oa'a si Yosua manungku i Ya'u sarun mamate taumatan Amalek.” 15Ana see i Musa napararisikku sambau mezbah wuṛṛu nisago “Eteudde Mawu Waneṛṛa'u.” 16Unni Musa, “Wattea'e paatanggakka waneṛṛa Mawu! Mawu napapangalo nandoappa taumatan Amalek saran mal᷊annu-l᷊annu!”
Currently Selected:
SASABANGNGA 17: LAITLD
Highlight
Share
Copy
Want to have your highlights saved across all your devices? Sign up or sign in
