SASABANGNGA 1
1
Manga taumatan Israel niola'a allangnga su Mesir
1I Yakub apan isassago lai Israel, inaite watukku Mesir ringannu al᷊aṛṛanangnge wuṛṛu amonanni mangitou sambau-sambau. Manga ana'i Yakub eteudde:
2I Ruben
I Simeon
I Lewi
I Yehuda
3I Isakhar
I Zebulon
I Benyamin
4I Dan
I Naftali
I Gad
I Asyer.
5Papapulunni Yakub udde sarangkanambone pitun pul᷊o su atoune. I Yusuf doronete uatana'a su Mesir. 6Manga pira tempo wua'udde i Yusuf wuṛṛu manga tuṛṛangnge natete, aroddi lai manga taumata sanluwane. 7Arawe papapulunni mangitou, eteudde manga taumatan Israel, naṛṛana'e napulunna manambo atonna, wuṛṛu reenganni mangitou a'atambanna mal᷊ihakka atonna, na'oman sara wanua Mesir napene mangitou.
8Wua'udde sangkatou ratu wakku apan waggan i Yusuf mannatakke mammarenta su Mesir. 9I tou nabbisara su tumana'u araratuanne, “Manga taumatan Israel udde maasilaka atonna si ite, ana waugu i mangitou tumanite manambo wuṛṛu mattohasanna wuassi ite. 10Unnu wisara nariaddi pangalo, i mangitou sarun maammulu seetti ite wuṛṛu mamangalo si ite, ana see tumal᷊angnga manantangngua wanua indi. I ite ṛinone madea'a lal᷊anne tadea'u i mangitou tawe atambanna anambone apia.” 11Ne manga taumata Mesir napaatenegu manga mandariaga walahannu Israel, tadea'u mapasusan susan biakki mangitou ringannu mammanara masahadda. I mangitou niwata'a mabbangunna hunan datu Mesir manga soa Pitom wuṛṛu Raamses maola'a punnu pangangadoannu saranapa. 12Arawe lembon sassansarannu taumata Mesir, ewe'e lembon aatambanna reengannu taumatan Israel, wuṛṛu nassal᷊iawukke i mangitou su ahewallu wanua udde, na'oman sara taumata Mesir matta'utte mangitou. 13Ana see ringannu maṛṛagissa mannansara taumatan Israel, 14wuṛṛu nanansarate wiakki mangitou. Ringannu tawe aakkanne i mangitou niwata'a mammanara masahadda su manga pa'olaanna wal᷊en wuṛṛu su manga wawail᷊anna.
15Wua'udde ratu Mesir namarenta si Sifra wuṛṛu si Pua, ruan katou biangnga apan mantul᷊ungngu manga wawinen Ibrani apan mangngunsiwe. 16Unnu ratu Mesir, “Su tempo i yamiu mantul᷊ungngu wawinen Ibrani mangunsiwe, paanaunge indi; Amungkangngu ana'a apan niasungkangnga udde esakka, patete i tou! Amungkangngu ana'a apan niasungkangnga udde wawine, wala'e i tou wiakka.” 17Arawe biangnga ruang katou udde taumata apam matta'uttu Ruata. Itarua maddiri tumuṛṛutta parentan ratu wuṛṛu namalan anambon ana'a esakka udde wiakka. 18Ne ratu namago biangnga darua udde wuṛṛu naiwal᷊o, “Anio iraddua namalan manga ana'a esakka udde wiakka?”
19Itarua sinumimbakka, “Wawinen Ibrani wal᷊ine ere wawine Mesir. I mangitou mal᷊uassa atonna mangunsiwe. Tantal᷊anna biangnga taambe nirumanta, anangnge niasungkangke.” 20-21Ne Ruata nangal᷊amatta manga biangnga udde wuṛṛu nangonggolu papapulunna sitarua, ana waugu itarua mangngaddata Ruata. Wuṛṛu taumatan Israel aatambanna anambone wuṛṛu matohassa. 22Ana see ratu nangonggolu parenta indi su tumanangnge, “Suapan ana'a esakku taumatan Ibrani apan wakkute niasungkangnga ṛinone iramme su Sal᷊ukku Nil, arawe anambon anangnge wawine wotongnge iwala wiakka.”
Currently Selected:
SASABANGNGA 1: LAITLD
Highlight
Share
Copy
Want to have your highlights saved across all your devices? Sign up or sign in
