O ROMA 1

1Roriadodoto mata-mata o Roma mabereraka winïdora-dora ma Jou Madutu deʼ winïahokoka ma Jou Madutu lanidadi Ai umati.

Ma Jou Madutu wohi irikoka deʼ wohigorakoka duga-duga katohingahu o Abari ma Oa ma Jou Madutuino. 2O Abari ma Oa gënanga ma Jou Madutu wohijajioka kahuruoninohi Ai nabi-nabiika deʼ yatulihoka Ma Jou Ai Demo ma Buku magoronaka. 3O Abari ma Oa gënanga yakorona ma Jou Madutu ai Ngohaka nanga Jou Yesus Kristus. Imoteke hokä o nyawa, Unanga ganga ma Koano Daud aidifauku, 4mä hokä ma Jouino inyata Unanga ganga ma Jou Madutu ai Ngohaka. Gënanga inyata igoungu de o kuaha biahaua ihiginïki de o Yesus wohonenge de womomikokali. 5Ihi ginïki de Unanga ma Jou Madutuö wohihidöaka ngohino, o ngongike todadi o rasul, hupaya ngohi – mangale o Kristus iwihoromati – tätuda hagala o hoana de o berera manyawa hupaya yongaku deʼ ihingounu. 6O hoana de o berera manyawa madungutu ganga nginiö nigögogere o Roma mabereraka; ngini ma inïahokoka la nidadi o Yesus aiumati. 7Mahababu gënanga ngohi totulihi o hurata nginika.

Tanu ma Jou Madutu nanga Ama deʼ ma Jou Yesus Kristus wohidöaka Ai barakati deʼ Ai lolä nginika.

O sukur maniata

8Madodihiraka de madodagi o Yesus Kristus, ngohi totarima kasi ma Jou Madutuika karana o Roriadodoto mata-mata; hababu o dunia mata-mataika yoihenoka ngini duru niwingaku o Kristusika. 9Ngohi salalu tinïhohininga ngini nako ngohi tomäniata. Ma Jou Madutu wahakihi okia ngohi totemo gënanga itiai. Unanga ma Jou Madutu ngohi tilöleleani de ahihininga magahumu de tohingahu o Abari ma Oa mangale Ai Ngohaka. 10Ngohi de magiria togahoko ma Jou Madutuika, tanu Unanga womau wohihi gumal̄a öraha nënanga tinï ädono ngini. 11Hababu ngohi duru töigo homakamäke dede ngini hupaya ngohi takunu tonahikodoku dede ngini ma Jou Madutu ai Womaha mangongike la ngini inihi kuata. 12Ngohi ahidungutu genangala karana ngini kamamoi ningakuoka o Yesus Kristusika, ho ngone yakunu homahi kukuata.

13 # Kis. 19:21 Roriadodoto! Ngohi töigo hupaya ngini nihiöriki hara mangöeoka ahidungutu tinïädono mä salalu naga dika madagahanga. Ngohi töigo hupaya niahidogoronakaö ahimanarama ihasiloka hokä tongohi ahimanarama o Yahudiokaua manyawa manga hidogoronaka o ngï mahomoaka ihasiloka. 14Hababu ngohi kokiani de ahi manarama hagala o hoana de o berera manyawaika; yanakoka o atoranga de o adati deʼ yanäko-näkoua o atoranga de o adati, yohohakola ekola yohohakolaowahi. 15Ma hababu gënanga ngohi duru töigo o Abari ma Oa gënanga tohingahu nginika nigö gogere o Roma mabererakaö.

O Abari ma Oa gënanga makuaha

16 # Mark. 8:38 Ngohi duru tangaku o Abari ma Oa gënanga, karana o abari gënanga ganga ma Jou Madutu aikuata wahihalamati mata-mata o nyawa yongaku-ngaku; madodihiraka o Yahudi manyawa deʼ o hoana de o berera mahomoaö manyawa. 17#Hab. 2:4 Hababu de o Abari ma Oa gënanga ma Jou Madutu wohidumutu sarakia madodagi o nyawa de ma Jou Madutu manga dodohanga idadi yaoaoli; ganga madodagi iwingaku ma Jou Madutuika, madodihiraka hiädono mabaha. Gënanga imatero hokä itulihi Ma Jou Ai Demo ma Buku magoronaka, ”O nyawa yongaku ma Jou Madutuika hiädono manga dodohanga de ma Jou Madutu idadi yaoaoli, o nyawa gënanga aha yowango!”

O nyawa manga howono

18O horogauku ma Jou Madutu wohimatoko Ai dohata o baradohaika mata-mata deʼ o nyawa manga dorouika, hababu o dorou yätatoko o nyawa mangale yanako o dodötoko madiai mangale ma Jou Madutu. 19Okia naga yakunu o nyawa ihiöriki mangale ma Jou Madutu inyata itararonoka o nyawa manga hininga magoronaka, hababu ma Jou Madutu mahirete wohi nyataka gënanga o nyawaika. 20Kadema dero ma Jou Madutu wohidadi o dunia, ma Jou Madutu aisifat-sifati yamö mäke-mäkeua, enagënanga Ai gokoil̄e de Ai gogeruku hokä ma Jou Madutu deʼ Ai kuaha ikokakali, yakunoka o nyawa imangarati ihiginïki deʼ mata-mata wohidädadioka. Hoʼ o nyawa duru koiwa manga hababu la manga diri ihitiai. 21#Ef. 4:17-18 O nyawa iwinako ma Jou Madutu, mä o nyawa iwihoromatiua hokä ma Jou Madutu, deʼ yotarima kasiua Unangika. Iidulu yaino o nyawa yapikiri ihihohomoa; manga hininga idadi ihuhutu. 22Onanga manga diri yamäo yosawaro, enahioko önanga yobodo. 23#Ul. 4:16-18 Ma Jou Madutu wokokakali Unaua önanga iwihuba, duga-duga o dulada-dulada marupa o dodadi yakunu ihonenge; enagënanga o nyawa, o totaleo, o aiwani mal̄ou iatoka, deʼ o aiwani ima tahe-tahe.

24Mahababu gënanga ma Jou Madutu wämal̄aika önanga manga hininga manahihu yäkuaha önanga la yodiai i totorou, hiädono önanga yodiai o hali ipese-peseke imahi koko onangaika. 25Ma Jou Madutu madiai, önanga yatururu de okia naga ielu-eluku. Wohidödädadiua duga-duga wohidädadiuku gënangadoka önanga yahuba deʼ yöleleani. Enahioko wohidödädadi genangala kokiani iwi higiriri kahi ado-adonika! Amin.

26Karana o nyawa yodiai hokogënanga, ma Jou Madutu wahi gumal̄a önanga yamoteke manga nahihu dema mal̄e-mal̄ekoka. Manga ngongoheka manga hininga okaua o nau-naurika hokä mabiaha o nyawa, duga-duga manga hininga kaimahi teke ngongohekaika. 27Hokogenangoli manau-naurö; önanga yamotekokaua madiai imaka ganu de o ngongoheka, duga-duga manga nahihu imahi kokanaurika. O nau-nauru yodiai o manarama de ma mal̄e-mal̄ekoka imahi kokanaurika, hiädono yatarima mabalaha imatero deʼ to ona manga manarama i totorou gënanga.

28Mahababu o nyawa yamäoua iparalu ma Jou Madutu iwinäko, ho ma Jou Madutu wamal̄aika manga dibanga ibodito, hiädono önanga yadiai o hali-o hali moteke madiai idadiua önanga yodiai. 29Manga hininga iömanga de o dorou mata-mata, itotiaiua; iömanga de o kal̄il̄u, o mela de o dohata mamamäo; i ömanga de o nahihu la yotoma, imakangamo, yotipu deʼ o hininga yägogono, önanga yöigo yahi ade-ade o nyawa mahomoa, 30yöigo o nyawa mahomoa yädiai o romanga madorou; önanga manga hininga ikurutil̄e deʼ yoedenge o dodötoko yoihenua, iwï dohata ma Jou Madutu, deʼ yöigo yotemo ihihohomoa. Onanga yosawaro yolingiri o ngëkomo mahungi la yodiai o dorou. Onanga yälawani manga dimono; 31önanga yoluku yänako o nyawa mahomoa; önanga yosetiaua deʼ manga hayanga koiwa o nyawaika. 32Onanga ihiöriki, imoteke ma Jou Madutu aitita, o nyawa yadodiai mata-mata gënanga ipatutu yähukumu de o honenge mahukumanga. Ngarokö hokogënanga önanga kayo diaioli o hali-o hali gënanga; deʼ inoli kai himotekoli o nyawa mahomoa yadodiai ënanga.

Currently Selected:

O ROMA 1: TLB

Highlight

Copy