O LUKAS 18

O hitotero o ngoheka bobao de mahakimi

1Ipaha de gënanga o Yesus woade-ade moi o hitotero la wädotoko iwinöninïki hupaya önanga salalu yohubayanga deʼ uha manga nganono itöaka. 2O Yesus wato, ”O berera moioka naga womatëngo mahakimi wïmodongua ma Jou Madutuika, deʼ o nagonaika dika mawohaduliua. 3O bereraka gënanga nagali momatëngo o bobao, mohigali-gali mïhimanga mahakimi gënanga mogahoko amiparakara wöriwo. ’Nohïriwo ngohi nähimanga tongohi ahilawani,’ o bobao gënanga mato. 4O öraha muruono naga madekana mahakimi gënanga woluku womïriwo o bobao gënanga. Mä mabaha mahakimi gënanga womapikiri, ’Ngarokö ngohi tïmodongua ma Jou Madutuika deʼ kamoikaö de tohaduliua, 5mä karana o bobao nënanga kahokogenangika dika mohiburakiti, iholoi yaoa ngohi töriwo ami parakara. Nako kowali, aha münanga kahokogenangika maino deʼ mohïdiai o huha.’ ”

6De ma Jou wotemo, ”Niatailako okia mahakimi woadi-adilua gënanga wotemo! 7Aa, boteka ma Jou Madutu aha kowäriwoua Ai umati mahirete manga parakara kiaka yopöa-pöaka Unangika o hutu deʼ o wange? Boteka Unanga aha maöraha wadohu-dohuku mangale wäriwo önanga? 8Ningaku: Unanga aha de majapatioka wöriwo manga parakara! Mä maöraha o Nyawa manga Ngohaka woböa, boteka kawämäkeohi o duniaka nënanga o nyawa yongaku-ngaku Unangika?”

O hitotero o Farisi manyawa de o soungu wogaho-gahoko

9O Yesus wohiade-adeö o hitotero nënanga wohidungutu o nyawaika kiaka yäpulono o nyawa mahomoa okiaua yädäene, mä yanäko de madiai manga diri mahirete yaoa. 10O Yesus wato, ”Naga o nyawa yahinoto yoiki ma Jou ai Tauika la imäniata. Womatëngo o Farisi manyawa, deʼ mahomoa womatëngo o soungu wogaho-gahoko. 11O Farisi manyawa gënanga womaokoino womatëngoka deʼ wohubayanga, ’Ya Jou Madutu, ngohi totemo tarima kasi Ngonaika, hababu ngohi hokä o nyawa mahomoaua, yokokal̄il̄u, yorusi-rusi, ekola yohowo-howono. Ngohi tosukur karana ngohi hokä o soungu wogaho-gahokua gënanga. 12Ngohi topuaha mahinoto o minggu moi, deʼ ngohi tohihuba Ngonaika, o regu ngimoi okianaga ngohi tamäke-mäkeino.’ 13Mä o soungu wogaho-gahoko gënanga womaokoino magurutika deʼ womamataga o dihangil̄e makowimoroënua. Ino de aiale mangunungu watino de ünanga wotemo, ’Ya Jou Madutu, nohïdora ngohi, o baradoha manyawa nënanga!ʼ ”

14 # Mat. 23:12; Luk. 14:11 O Yesus wato, ”Ningaku,” ”maöraha yolio o tauika, o soungu wogaho-gahoko gënanga ma Jou Madutu wïtarima deʼ o Farisi manyawaua gënanga. Hababu o nyawa moi-o nyawa moi i hi kurutil̄e manga diri aha yähitipokouku; deʼ o nyawa moi-o nyawa moi ihi tipokouku manga diri aha yahi kurutil̄e.”

O Yesus wahibarakati o ngoha-ngohaka

(Mat. 19:13-15; Mark. 10:13-16)

15Naga o nyawa yäao manga ngoha-ngohaka mahohumujuru o Yesusika hupaya Unanga wäpal̄anga deʼ wahibarakati önanga. Maöraha o Yesus iwinöninïki gënanga yämäke, o nyawa geönanga yängamo. 16Mä o Yesus wä ahoko o ngoha-ngohaka gënanga daha wätemo iwinöninïkika, ”Niamal̄aika o ngoha-ngohaka yaino Ngohino! Uha niaduhunu önanga, hababu o nyawa hokonënanga marupa yodadi o gegetongo ma Jou Madutu aiumati. 17Nimä hohininga! O nyawa iwihimangua ma Jou Madutu, hokä o ngohaka moi, aha yakunua yodadi o gegetongo ma Jou Madutu aiumati.”

Mangale o kaya manyawa

(Mat. 19:16-30; Mark. 10:17-31)

18Womatëngo o Yahudioka manga tutuda woleha o Yesusika, ”Bapa Guru maoa, ngohi kokiani okia todiai hupaya yakunu tatarima o ngango madutu deʼ ikakali?”

19”Yadodoa ho ngona nato Ngohi yaoa?” o Yesus wïleha unangika. ”Mahomoa de ma Jou Madutu mahirete, koiwa naga maoa. 20#Kel. 20:12-16; Ul. 5:16-20 Ngona nanaköka ma Jou Madutu wohipopareta: ’Uha nihowono, uha nitoma, uha nitohiki, uha nihakihi ni elu-eluku, deʼ niahoromati niaayo deʼ niaama.’ ”

21”O pareta gënanga mata-mata ngohi tamotekoka katoma goduru ikahi,” o nyawa gënanga wohaluhu.

22Woihene gënanga o Yesus wïtemo, ”Kanagahi o hali moi kokiani ngona nadiai: Nahukunu mata-mata aniarata, matiwi nahi döaka o nyawa mihikinika, deʼ ngona aha namäke o arata o horogaka. Iböto gënanga noböa nohinïki Ngohi.” 23Mä o nyawa gënanga maöraha woihene gënanga, ünanga aihininga ihuha karana ünanga duru wokaya.

24O Yesus wohiöriki o nyawa gënanga aihininga ihuha, hababu gënanga Unanga wotemo, ”Ihuhaholi o kaya manyawa yodadi o gegetongo ma Jou Madutu aiumati! 25Iholoi igapanga o onta o aiwani maago-agomo iwohama o populaki mapidahika, de o kaya manyawa womatëngo wowohama ma Jou Madutu ai Dunia ma Hungika.”

26O nyawa yoihe-ihene o Yesus wahetongo hokogënanga yoleha, ”Nako hoko gënanga, o nagona yakunu yohalamati?”

27O Yesus wohaluhu, ”Ka o nyawa idadiua, ma’ ma Jou Madutu kai dadi!”

28Daha o Petrus wotemo, ”Namäke! Ngomi miamal̄aka miatau madol̄a la mangale mininïki Bapa.”

29”Ningaku!” o Yesus wato. ”O nyawa yamal̄aka mangatau ekola mangahekata, ekola mangariadodoto ekola mangaayo deʼ mangaama ekola mangangoha-ngohaka karana iwïleleani ma Jou Madutu, 30o nyawa gënanga aha wamäke mabalaha de ilape-lape o öraha nënanga, deʼ o öraha aha iböa-böa ünanga iwihi döaka o ngango madutu deʼ ikakali.”

O Yesus wohiade-ade mahigali mahangeoka mangale aihonenge

(Mat. 20:17-19; Mark. 10:32-34)

31O Yesus wätoomu iwinöninïki yangimoi de yahinoto wätingakika, daha wätemo, ”Ni ihene! Ngone o örahanënanga hodumutu o Yerusalemika. Dokengoka, o nabi-nabi yatuli-tulihi mata-mata yakorona o Nyawa manga Ngohaka aha idadi. 32Unanga aha iwihilapahi o Yahudi manyawaikaua, aha iwihohedu, iwihikauku, deʼ Unanga iwiobiri. 33Onanga aha iwihangihara deʼ Unanga iwi toma, mä o wange hangeoka, Unanga aha womomiki.”

34Mata-mata iwinöninïki o Yesus gënanga, kama huhutulö de imangaratiua. Ai demo-demo mamangarati gënanga warahasia onangika. Onanga yohiorikua mangale okia Unanga woade-ade.

O Yesus wihitogumu womatëngo wogaho-gahoko de wopiloko

(Mat. 20:29-34; Mark. 10:46-52)

35Maöraha o Yesus tigi-tigi womahiädono o Yerikho ma bereraika, womatëngo wopilo-piloko wogogeruku o ngëkomo madatekoka wogaho-gahoko. 36Maöraha ünanga woihene o nyawa manga ngöe gënanga yakaino ünanga woleha, ”Naga okia?”

37”O Yesus o Nazaret manyawa gënanga, wakaino,” önanga yato unangika.

38De o nyawa wopilo-piloko gënanga wopöaka, ”Yesus, o Daud aingohaka! Nohïdora ngohi!”

39O nyawa mahima-himangoka, iwingamo deʼ iwihuloko ünanga womarïdi. Mä unanga wopöaka iholoi ikuatil̄eoli, ”Daud aingohaka! Nohïdora ngohi!”

40O Yesus womatogumu deʼ wohuloko o nyawa iwiao o nyawa wopilo-piloko gënanga Unangika. Unanga womahiadonika, o Yesus wïleha, 41”Okia ngona nomau Ngohi todiai ngonaika?”

”Tuanga,” o nyawa wopilo-piloko gënanga wohaluhu, ”ngohi tomau tomahi öriki.”

42Daha o Yesus wotemo, ”Nako hokogënanga, nölega! Karana ngona nongaku ngohiino, ngona notogumu.”

43O öraha gënanga dika ünanga yakunu womahiöriki, daha ünanga winïki o Yesus inoli wotemo tarimakasi ma Jou Madutuika. Maöraha o nyawa manga ngöe gënanga yamäke o hali gënanga, önanga mata-mata iwihigiriri ma Jou Madutu.

Currently Selected:

O LUKAS 18: TLB

Highlight

Copy