O YOHANIS 20
20
O lungunu ihomoaka
(Mat. 28:1-8; Mark. 16:1-8; Luk. 24:1-12)
1O Minggu mawange o ngoru-ngoruminohi, maöraha kai hohü hutuohi, o ngo Maria Magdalena moiki o lungunika. Münanga mamäke o helewo madadamunu yorehenoka o lungunu mapidahoka gënanga. 2Münanga momapopäta milingiri o Simon Petrus deʼ winöninïki wihohininga o Yesus, deʼ motemo onangika, ”Ma Jou iwil̄ëoka o lungunoka, deʼ ngohi tohiorikua okiaka Unanga iwikelenga.”
3Daha o Petrus deʼ winöninïki mahomoa gënanga yoiki o lungunika. 4Yahinoto imapopäta, mä winöninïki mahomoa gënanga iholoi wotaiti de o Petrus, deʼ unanga womahiädono iholoi wohira o lungunika. 5Unanga wohihahere o lungunu magoronaika deʼ wamäke o ngöere magare-garehe ikelengauku genangoka, mä unanga wowohamua. 6O Simon Petrus wihidoduruino aiporetino, daha gila-gila wowohama o lungunu gënanga magoronaika. Unanga wamäke o ngöere magare-garehe ikelengauku genangoka, 7mä o ngöere ihiliko-liko o Yesus Ai häekino koiwa madatekoka mailuluino imatingakika. 8Ahaino winöninïki iholoi wohira womahiädono o lungunika, unangö wowohama. Unanga wamäke deʼ wongaku. (9Hiädono öraha gënanga önanga imangaratiuahi okia i tulihi Ma Jou Ai Demo ma Buku magoronaka Unanga kiani womomiki o honengino.) 10Ipaha de gënanga iwinöninïki o Yesus gënanga yolio.
O Yesus womahi matoko Ai diri o ngo Maria Magdalenaika
(Mat. 28:9-10; Mark. 16:9-11)
11O ngo Maria Magdalena momaokoino o lungunu mahimangoka de moari. Moari magogiriaka, münanga mohihahere o lungunu magoronaika, 12daha mamäke o malaekat yahinoto manga pakeanga magare-garehe. Onanga yogogeruku o ngï o Yesus Ai mayeti marïoka, moi Ai häekiha idaduoka deʼ mahomoa Ai l̄ouoko idaduoka. 13O malaekat-malaekat gënanga imileha, ”Ayo, yadodoa noari!”
O ngo Maria mohaluhu, ”Tongohi ahi Jou iwil̄ëoka, deʼ ngohi tohi orikua Unanga kiaka iwikelenga.”
14Motemo iböto hokogënanga, münanga moma lega ami poretoko deʼ mimäke o Yesus womaokoino genangoka. Mä munanga mihiorikua gënanga o Yesus. 15O Yesus womi leha munangika, ”Ayo, yadodoa noari? Ayo nä lingiri o nagona?”
O ngo Maria matobote gënanga madumule madutu, hoʼ munanga motemo, ”Bapa, nako Bapa nitagalioka Unanga nenangoka, tanu nohihingahu ngohino okiaka Bapa nikelenga Unanga, hupaya ngohi takunu til̄ë?”
16O Yesus womitemo munangika, ”Maria!”
O ngo Maria moma lega o Yesusika daha motemo de o Ibranioka manga demo, ”Rabuni!” (Mamangarati ”Guru”.)
17”Uha nohi sö Ngohi,” o Yesus womitemo munangika, ”hababu Ngohi todoauahi o Amail̄e. Mä noiki Ahi roriadodotika, deʼ nahi ngahu onangika örahanënanga Ngohi todoa Ahi Amail̄e deʼ Ani Amail̄e, Ahi Jou Madutuil̄e deʼ ani Jou Madutu il̄e.”
18Ho ngo Maria moiki mohingahu iwinöninïkika o Yesus münanga mimäkeoka ma Jou deʼ ma Jou wotemoka mata-mata gënanga munangika.
O Yesus womahi matoko Ai diri iwinöninïkika
(Mat. 28:16-20; Mark. 16:14-18; Luk. 24:36-49)
19Ma Minggu mawange genangoli dika, maöraha yohutuoka, iwinöninïki o Yesus imatoomu o tau moika de manga ngora-ngorana yakusioka, hababu önanga yämodongo o Yahudioka yokokuahaika. Itodokanino o Yesus woböa deʼ womaokoino manga hidogoronaka önanga deʼ watemo, ”Nia tabea de o dame dede ngini.”
20Wotemo iböto hokogënanga, Unanga wahimatoko onangika Ai giama deʼ Ai meheho. Maöraha iwimäke ma Jou, önanga duru yomörene. 21Gila-gila o Yesus watemo onangika wohi galioli, ”Nia tabea de o dame dede ngini. Hokä o Ama wohi huloko Ngohi, hoko genangoli Ngohi tinihuloko ngini.” 22Gila-gila Unanga wahiwuwu Ai womaha onangika deʼ wotemo, ”Niatarima ma Jou Madutu ai Womaha. 23#Mat. 16:19, 18:18 Nako ngini niahiapongo o nyawa moi manga baradoha, ma Jou Madutuö winihiapongo. Nako ngini niahiapongua o nyawa moi manga baradoha, ma Jou Madutuö winihiapongua.”
O Yesus deĘĽ o Tomas
24O Tomas, womatëngo o Yesus iwinöninïki yangimoi de yahinoto manga hidogoronaka, (iwi hetongo o ”Hago”) kodede unangua de aidodiawo mahomoa maöraha o Yesus woböa. 25Iwinöninïki o Yesus mahomoa iwitemo o Tomasika, ”Ngomi miwi mäkeoka ma Jou!”
Mä o Tomas wohaluhu, ”Nako ngohi tamäkeuahi o paku mario Ai giamoka, ngohi togelengauahi ahi hagarara Ai nabo o paku marioika gënanga, deʼ togelengauahi tongohi ahigiama Ai mehehoika, ngohi tolukohi tongaku.”
26O Minggu moi yaino, iwinöninïki o Yesus nagali o ngïoka gënanga, deʼ o Tomasö woböaino. O ngorana mata-mata ikusioka. Mä o Yesus woböa deʼ womaokoino manga hidogoronaka, daha wotemo, ”Nia tabea de o dame dede ngini.” 27Dahaino o Yesus witemo, o Tomasika, ”Nakelenga anihagarara nenangoka, deʼ nolega Tongohi Ahi giama. Nohidöaka anigiama deʼ nakelenga Ahi mehehoika. Uha nodododatohi, mä nongaku!”
28O Tomas wotemo o Yesusika, ”Ahi Jou, deʼ ahi Jou Madutu!”
29O Yesus witemo unangika, ”Ngona nongaku hababu nohi mäkeoka Ngohi igoungua? Youtumoka o nyawa yongaku ngaro ihimäkeua Ngohi!”
Madumutu o buku nënanga
30Duru kohangöeohi ihëra-hëranga mahomoa wodiai o Yesus iwinöninïki manga himangoka, mä itulihua buku nënanga magoronaka. 31Mä mata-mata nënanga itulihi, hupaya ngini ningaku o Yesus ganga ma Koano Wohi hohalamati, ma Jou Madutu ai Ngohaka, deʼ karana iwi ngaku Unangika, ngini niamäke o ngango.
Currently Selected:
O YOHANIS 20: TLB
Highlight
Share
Copy
Want to have your highlights saved across all your devices? Sign up or sign in
