O YOHANIS 10
10
O hitotero o duba deʼ magogöana
1”Igoungu itiai Ahi demo nënanga: O nyawa yowohama o duba makurunga magoronaika yanïkua o ngorana, mä yodoa yanonu o ngëkomo mahomoa, o nyawa gënanga yotohi-tohiki deʼ yo ora-ora. 2Mä o nyawa yowohama yanïki o ngorana, ünanga o duba magogöana. 3O kurunga magogöana wibelenga o ngorana mangale ünanga, deʼ o duba-duba yanïki ai ilingi maöraha ünanga wa ahoko de maromanga ënanga moi-moi deʼ watuda ënanga wohihupu. 4Wohihupu iböto o duba-duba gënanga, o gogöana gënanga womadagi mahimangoka, deʼ o duba-duba gënanga iwinïki ünanga hababu ënanga yanäko ai ilingi. 5Enanga aha ioluku yänïki o nyawa mahomoa, ma aha iwidokaoara o nyawa gënanga, hababu yanäkoua ai ilingi.”
6O Yesus wohi ade-ade o hitotero nënanga, mä onanga imangaratiua okia Ai dungutu.
O Yesus, o gogöana maoa
7O Yesus wotemo wohigalioli, ”Igoungu itiai Ahi demo nënanga: Ngohila o ngorana mangale o duba. 8Mata-mata yoböa-böa ihira de Ngohi, geönanga yotohi-tohiki deʼ yo ora-ora, mä o duba-duba ihigihenua toönanga manga ilingi. 9Ngohila o ngorana. O nagona yowohama ihinonu Ngohi, aha yohalamati; ünanga wohupu wowohama deʼ wamäke o inomo. 10Yotohi-tohiki yoböa duga-duga mangale yotohiki, mangale yotoma deʼ mangale yakilianga. Mä Ngohi toböa hupaya o nyawa yamäke o ngango – o ngango de maboloioka.
11Ngohi o gogöana maoa. Gogöana maoa wohidöaka Ai wowango mangale Ai duba-duba. 12O hewa manyawa o gogoanua gënanga, deʼ o duba-dubaö gënanga tounaua, aha woara wamal̄aika o duba-duba nako ünanga wamäke o kaho honganika iböa. Done o duba-duba gënanga aha o kaho honganika yakaboto deʼ ihikokabarihika. 13O hewa manyawa gënanga woara, hababu ünanga womanarama mangale o hewa. Unanga wahaduliua o duba-duba gënanga. 14-15#Mat. 11:27; Luk. 10:22 Ngohila o gogöana maoa. Hokä o Ama wohinäko Ngohi deʼ Ngohi tinäko o Ama, hokogenangoli Ngohi tanäko Ahi duba-duba deʼ enangö ihinäko Ngohi. Ngohi tomahilapahi Ahi wowango mangale önanga. 16Nagahi o duba-duba mahomoaö ka Ngohi madutu, mä iwohamua o duba matika magoronaika nënanga. Onangö kiani ta ao deʼ onanga aha ihigihene Ahi ilingi. Onanga mata-mata aha yodadi kao tikamoi de magogöana kamoi.
17O Ama wohihininga Ngohi hababu Ngohi tomahilapahi Tongohi ahiwowango, mangale tatarimaokali. 18O nyawa moiuaö yakunu yal̄ë Ngohioka. Ngohi tohilapahi imoteke Ahi mau mahirete. Ngohi tokuaha tohilapahi, deʼ tokuaha tal̄ëoli. Gënanga Tongohi ahi manarama, tatarima Ahi Amaino.”
19Karana o Yesus wotemo hokogënanga, o Yahudioka manyawa muläenge imateke ributu. 20Yowöe yotemo, ”Unanga iwipootekika o tokata! Unanga iwitogohanga! Mangale okia ngini niwihi gihene ünanga?”
21Mä nagaö yotemo, ”O nyawa yapootekika o tokata, hokogenangua yotemo-temo! Yakunu o tokata yadiai o nyawa yopiloko yakunu imahiöriki?”
O Yahudi manyawa yoluku iwitarima o Yesus
22O Yerusalemoka magogiria o nyawa ihirame ma Jou ai Tau ma Tabisang ma Wange. Oraha gënanga o dumamäta maöraha. 23O Yesus woma dagi-dagi o Löa Salomo, ma Jou ai Tau magoronaka, 24o öraha o Yahudi manyawa yoböa imatoomu iwihigilolitino o Yesus. Onanga yotemo, ”Hiädono hokokia Ngona nomau nomi mal̄aika ngomi mibingu? Nomihi ngahu nohitotararonino, nako Ngona igou-goungu ma Koano Wohihohalamati.”
25O Yesus wohaluhu, ”Ngohi totemoka nginika, mä ngini ningakua. O manarama-manarama Ngohi tadiai de Ahi Ama Ai romanga, ihidöaka manyonyata mangale Ngohi. 26Ngini ningakua hababu ngini iwohamua Tongohi ahi duba-duba. 27Ahi duba-duba yogihene Ahi ilingi. Ngohi tanako ënanga, deʼ enanga ihinïki Ngohi. 28Ngohi tahidöaka önanga o ngango madutu deʼ ikakali, deʼ kahiado-adonika önanga aha yobinahaua. O nyawa moiuaö yakunu yaora önanga Tongohi ahi giamoka. 29Ahi Ama, wohihidöaka önanga Ngohino, yatilakuril̄e hagala mata-mata. Deʼ o nyawa moiuaö yakunu yäora önanga Ahi Ama aigiamoka. 30Ngohi deʼ o Ama naga kamoi.”
31Daha o Yahudioka manyawa imal̄ëoli o helewo yato iwi kaweli o Yesus. 32Mä, o Yesus watemo onangika, ”Ngini nia mäkeoka Ngohi tadiai o manarama ma oa-oa mangöe, wohihi döakoka o Ama Ngohino. O manaramino mata-mata gënanga, kiaka idadi hababu, ngini nimau nihikaweli Ngohi?”
33 #
Im. 24:16
O Yahudioka manyawa gënanga yohaluhu, ”Igoungua karana Ani manarama-manarama maoa-oa gënanga ngomi mimau minikaweli Ngona de o helewo, mä hababu Ngona nihikauku ma Jou Madutu. Ngona o nyawa moi, nomau nomadiai Anidiri ma Jou Madutu.”
34 #
Mzm. 82:6
Daha o Yesus wohaluhu, ”Mode koigoungua nia Tita ma Buku magoronaka itulihi: ma Jou Madutu wotemo, ’Ngini naga o gikiri’? 35Ngone hohiöriki okia itulihi Ma Jou Ai Demo ma Buku magoronaka idadi mangale kahiado-adonika. Hoʼ, nako ma Jou Madutu wahetongo ’o gikiri’ hagala o nyawaika yatotarima Ai demo, 36yadodoa ngini nitemo Ngohi tihikauku ma Jou Madutu hababu totemo Ngohi ma Jou Madutu Ai Ngohaka? Enahioko Ngohi wohiiriki o Ama deʼ wohihuloko o duniauku. 37Nako Ngohi tadiaiua o manarama wohihidöakoka o Ama, uha nihingaku Ngohino. 38Mä karana Ngohi tadiai ënanga, niangaku aha okia Ngohi tadiai gënanga, ngaro ngini nioluku nihingaku Ngohino. De hokogënanga ngini nihiöriki deʼ nimangarati o Ama tatapu kamoi de Ngohi, deʼ Ngohi i tatapu kamoi de o Ama.”
39Onanga ihidailakoli iwi tagoko o Yesus, mä Unanga wolapahi önanga manga giamoka.
40 #
Yoh. 1:28
O Yesus wolio o Yordan ma Ngairi mahonongaika, o ngï o Yohanis mahira waohiki deʼ wogogere dokengoka. 41Manga ngöe o nyawa yoböa Unangika. Onanga yato, ”O Yohanis wodiaiua i hëra-hëranga, mä mata-mata wohi dodemoka mangale o nyawa nënanga itiai.” 42Daha o nyawa manga ngöe dokengoka yongaku o Yesusika.
Currently Selected:
O YOHANIS 10: TLB
Highlight
Share
Copy
Want to have your highlights saved across all your devices? Sign up or sign in
