O KISAH RASUL-RASUL 28

O Maltaoka

1Mima hiadonoka o dudungiha de miahalamati, daha ngomi mihiöriki o nühu nënanga maromanga o Malta. 2O nühu manyawa genangoka duru de manga hininga irahai ngomino. Onanga imitarima ngomi mata-mata de mahailoa de yotofo o uku mangale ngomi karana imuläengoka o awana iuti deʼ ma alo ö imäta. 3O Paulus watoomu o gota, deʼ wogelenga o gota-gota gënanga o uku mal̄okuku. Unanga kawodiaiohi gënanga, o dodiha moi ihupu, karana o uku mahauku gënanga, daha yagoli aigiama. 4Maöraha o nühu manyawa gënanga yamäke o dodiha gënanga inuneuku o Paulus aigiamoka, önanga imake temo moi de moika, ”O nyawa nënanga i goungu wotoma-toma, hababu ngaroka ünanga wolapahioka o huha o ngötoka, ma Gomanga i Adi-adili iwi mal̄aikaua ünanga wowango.” 5Mä o Paulus wodohurero o dodiha gënanga o uku magoronauku de wamäoua mahiri kama huhutulö ma. 6Onanga yatibanga botino dika o Paulus aigiama aha il̄oboho ekola itodokanino ünanga aha woruba de wohonenge. Mä yotamä öraha muruono naga madekana deʼ okiaua naga moi idadi kabiahaua unangika, manga dibanga önanga ingali daha yotemo o Paulus ganga o gomanga.

7Ikurutikaua de o ngï gënanga naga o Publius aitonaka, ai pangkati magögurutil̄e o nühoka gënanga. De aihininga ma oa-oa ünanga womitarima ngomi hokä o nyawa iwiadonino o wange hange madekana. 8Oraha gënanga aiama magogiria wopanyake, iwi däene o gogama deʼ womal̄öl̄oko o awunu. O Paulus woiki wilega aiama wopopanyake gënanga daha woma niata de wakelenga aigiama ail̄okuoka hiädono ünanga wotogumu. 9Karana idadi gënanga mata-mata o nyawa yopopanyake o nühoka gënanga yoböa o Paulusika, deʼ onanga wahitogumu. 10Onanga imihidöaka ngomino mangöe o ngongike, deʼ maöraha ngomi mimau mihidete, önanga yoao o kapaoko mata-mata ngomi miaparalu mangale tongomi mia dodagioka.

O Malta de mioiki o Romaika

11O mede hange ipaha dokengoka, ngomi mimagoraka o nühino gënanga miharene o kapa moi o Aleksandriaino maöraha o dumamäta de imatapuuku o nühoka gënanga. O kapa gënanga magambar ”O Gomanga i Hago o Kastor deʼ o Poluks”. 12Ngomi mima tapu o Sirakusa makotaka deʼ migogere genangoka o wange hange. 13Genangino ngomi mihidetoli mimahigoro o hohana hiädono o Regium makotaka. Yarehino o hidal̄oko imuläenge iwuwu o koreharauku, hiädono o wange hinoto magoronaka ngomi mimahiädono o Putioli makotaka. 14Genangoka ngomi mimakamäke de o nyawa yamuruono naga iwingaku-ngaku o Yesusika, deʼ manga gogahoko önanga ngomi migogere dede önanga o minggu moi madekana. Daha ngomi mimagoraka o Romaika. 15O Roriadodoto o Romaka iwi ngaku-ngaku o Yesusika yogihene mangale tongomi mia abari, hiädono önanga yoböa yadono o Apius ma Paharika de o Pasanggrahan Tiga mangale imi buhuku ngomi. Maöraha o Paulus imakamäke dede önanga, ünanga wotemo tarima kasi ma Jou Madutuika de aihininga idadi ibitumu.

O Romaka

16Maöraha mimahiädono o Romaka, o Paulus iwihigumal̄a wogögere womatëngoka de wigöana o tentara womatëngo.

17O wange hange ipaha, o Paulus wäahoko o Yahudioka manyawa manga baluhu imatoömu. Deʼ onanga imatoömuino i böto, ünanga watemo onangika, ”O Roriadodoto! Ngohi okia-kiaua tahowono nanga hoanika ngone, ekola tatilakuru nanga adati de nanga biaha ngone hatotarima nangaete de nangatohoraino ngone. Ngaroka hokogënanga ngohi ihitagoko o Yerusalemoka deʼ ihilapahi o Roma manyawaika. 18Ahi parakara ngohi yatailako iböto, önanga yomau ihihilapahi ngohi, hababu inyata ngohi tadiaiua o howono moiö kokiani ihi hukumu de o hukumanga o hönenge. 19#Kis. 25:11 Mä karana o Yahudioka manyawa ihilawani, ngohi pakisa talingiri tongohi ahiparakara yatailako ma Kaisar Roma ai pengadilanoka. Ngohi todiai gënanga koigoungua karana ngohioka okia naga moi takalaki ahihoanika ngohi mahirete. 20Deʼ hababu gënanga ngohi togahoko homakamäke dede ngini mangale homateke ade-ade dede ngini; hababu ngohi ihirante, hababu karana Wohihohalamati iwingano-nganono o Israeloka manyawa.”

21Daha önanga yotemo unangika, ”Ngomi miatarimauahi o hurata moiö o Yudeaino mangale ngona. Deʼ o riadodoto manyawa moiuaö dokaino yoböa yoao o abari mangale ngona ekola yotemo itorou mangale ngona. 22Mä ngomi mioigo ö mi ihene mangale aningongaku Riadodoto, hababu ngomi mata-mata mi ihenoka o nyawa yöngelo o dodötoko Riadodoto namote-moteke gënanga.”

23Onanga deʼ o Paulus ihigogere o wange moiuku mangale imakamäkeoli. O wange gënanga o nyawa mangangöe yoböa o ngï o Paulus womahi dododogumika. Kao ngorumino hiädono o bimaoa o Paulus wahitararono deʼ wahingahu onangika o abari mangale sarakia ma Jou Madutu wopareta hokä o Koano. De wapäke o ayat-ayat o Musa ai Buku deʼ o Nabi-nabi manga Bukuino, o Paulus wohidailako wadiai la önanga yongaku mangale o Yesus. 24Naga yongaku okia aha o Paulus wotemo, mä nagaö yongakua. 25De manga jako önanga imakalawani yamal̄a o ngï gënanga, o Paulus wotemo hokonënanga iböto onangika, ”Igoungu duru itiaiokia itemoka ma Jou Madutu ai Womaha de o Nabi Yesaya niaete de niatohoraika ngini! 26#Yes. 6:9-10 Ma Jou Madutu wotemo,

’Noiki nahingahu o hoanika nënanga:

Ngini aha gila-gila ni ihene, mä nimangaratiua;

ngini aha gila-gila niohohininga mä nihiorikua okia idadi.

27Hababu o hoana nënanga manga dibanga i dadioka ibongono,

to önanga manga ngauku i dadioka yatopongono,

deʼ to önanga manga lako iruhutoka.

Nënanga idadi hupaya önanga manga lako uha imahiöriki,

önanga manga ngauku uha imahihene,

önanga manga dibanga uha i mangarati,

deʼ uha yolio Ngohino,

daha ngohi tahi togumu önanga.’ ”

28Mabahaka o Paulus wotemo, ”O Roriadodoto kiani nihiöriki o abari mangale o halamati ma Jou Madutuino öraha nënanga ihiabarioka o nyawa mahomoaika o Yahudiokaua manyawa. Onanga aha yamoteke!” [29O Paulus wotemo hokogënanga i böto, o Yahudioka manyawa gënanga yamal̄a o ngï gënanga de imateke roributu moi de moiika.]

30O taongo hinoto madekana o Paulus wogögere o Romaka, o tauoka woma hewa mahirete. Unanga wosanangi watarima mata-mata o nyawa yoböa iwilega. 31Deʼ aibaranioka ünanga wohi ngahu onangika mangale sarakia ma Jou Madutu wopareta hokä o Koano deʼ mangale ma Jou Yesus Kristus. O Paulus wodiai gënanga iworo-woro koiwa madadatoko-dadatoko.

Currently Selected:

O KISAH RASUL-RASUL 28: TLB

Highlight

Copy