O KISAH RASUL-RASUL 15

Yorapat o Yerusalemoka

1 # Im. 12:3 O nyawa yamuruono naga o Yudeaino yoiki o Antiokhiaika deʼ yadotoko o nyawa yongaku-ngaku o Antiokhiaoka gënanga nako önanga yahunaua imoteke o Musa ai Tita, önanga yakunua yahihalamati. 2O Paulus deʼ o Barnabas yalawani de mabuturungoka manga damäke o nyawa gënanga. Mabaha ihitatapu hupaya o Paulus deʼ o Barnabas de yamuruono naga o nyawa mahomoa o Antiokhiaino, yoiki o Yerusalemika mangale ihiade-ade o hali nënanga de o rasul-rasul de o tutuda-tutuda dokengoka.

3O jemaat o Antiokhiaoka yangotaka önanga hiädono o kota maporetika, ahao önanga yoiki yatilakuru o Fenisia deʼ o Samaria. Dokengoka önanga ihiade-ade sarakia o nyawa mahomoa o Yahudiokaua imahilapahioka manga diri ma Jou Madutuika. O abari gënanga duru yamörene o nyawa yongaku-ngaku genangoka. 4Maöraha önanga imahiädono o Yerusalemoka, o jemaat yatarima önanga koharahai, deʼ o rasul-rasul de o tutuda-tutuda. Daha önanga ihiade-ade o nyawaika gënanga mangale mata-mata ma Jou Madutu wodiaioka dede önanga. 5Mä o nyawa yamuruono naga o Farisiokaino yongaku-ngakuoka, imaoko deʼ yotemo, ”O nyawa mahomoa yongaku-ngaku gënanga kiani yahuna deʼ yahipatutu yanïki o Musa ai tita.”

6Daha o rasul-rasul deʼ o tutuda-tutuda imatoomu mangale ihiade-ade o hali gënanga. 7#Kis. 10:1-43 Madekana duru önanga imahikodöaka o dibanga. Mabahaka o Petrus womaoko deʼ wotemo, ”Riadodoto! Ngini mahirete nihiöriki öraha muruono naga ipahaika ma Jou Madutu wohi iriki ngohi nia hidogoronaka ngini mangale tohi abari o Abari ma Oa gënanga o nyawa mahomoaika o Yahudiokaua, hupaya onangö yoihene deʼ yongaku. 8#Kis. 2:4, 10:44 Deʼ ma Jou Madutu wanako o nyawa manga hininga wohimatokoka Unanga watarima önanga; Unanga wohimatoko o hali gënanga de wahidöaka onangika ma Jou Madutu ai Womaha kaimatero dika wonahi döa-döakoka ngoneino. 9Ma Jou Madutu watingaka de wafaraua ngone de önanga. Unanga wohitebini manga hininga önanga, karana önanga yongaku. 10Aa ma hababu okia ngini nimau niwilawani ma Jou Madutu örahanënanga niahidöaka o kokiani moi itubuho yoninïkika nënanga, enahioko nangaete de nangatohora deʼ ngone mahirete dika mahakunua hadiai? 11Magiliorino, ngone hongaku deʼ hohalamati karana ma Jou Yesus aidora de Ai hayangi; hokogenangö önanga.”

12Mata-mata o nyawa imatotoomu gënanga kayokokirirïdoka. Dahaino önanga yoihene o Barnabas deʼ o Paulus yoade-ade ihigalioli mata-mata ihëra-hëranga deʼ o hali-o hali kabiahaua, ma Jou Madutu wodiaioka dede önanga o nyawa mahomoa manga hidogoronaka o Yahudiokaua manyawa. 13Onanga yotemo-temo iböto, o Yakobus wotemo, ”Roriadodoto! Beika ni ihenohi ngohino. 14O Simon aha ipahaino wohitararono sarakia ma Jou Madutu kamadodihirakahi wohimatokoka wahininga o nyawa mahomoa, ngarokö o Yahudiokaua manyawa de Ai dungutu wairiki onangino o nyawa mahomoa aha yodadi Ai umati. 15Gënanga imadäene de o nabi-nabi ihidodemoka, ngaro idadiuahi. Hababu naga itulihi hokonënanga,

16 # Am. 9:11-12 ’I paha gënanga Ngohi aha töboali,’ ma Jou wato,

’Ngohi aha tohimomikokali o Daud aitau iruba-rubaka,

deʼ To hidiai ikokiliangoka, daha tohigokokali;

17hupaya o nyawa mata-mata mahou-houohi gënanga iwilingiri ma Jou,

imakinïki de mata-mata o nyawa mahomoa o Yahudiokaua Ta ahokoka, la yodadi kato Ngohi.’

Hoko gënanga ma Jou wotemo, 18kahuruonikahi wohingahuoka o hali gënanga.”

19”Hoʼ imoteke ahidamäke ngohi,” o Yakobus wato, ”ngone iyakunua hahihuha o nyawa mahomoa o Yahudiokaua gënanga imahilapahioka manga diri ma Jou Madutuika. 20#Kel. 34:15-17; Im. 17:10-16, 18:6-23 Mä ngone kiani hotulihi o hurata onangika deʼ hahitiari önanga hupaya önanga uha yaol̄omo o inomo ipese-peseke ihiniatoka o gomangika, ekola yaol̄omo o aiwani ma akeme ihonenge kayahirikiti, ekola o awunu yaol̄omo. Deʼ hokogënangoli hupaya önanga imahikurutika mangadiri de o manarama isosafarune. 21Hababu o Musa aitita kahuruonikahi yada basa o Puji mawange ihigetongo o puji matau-tauoka, deʼ ihingahu o kota mata-mataika.”

O hurata o nyawa mahomoaika yongaku-ngakuoka

22O rasul-rasul deʼ o tutuda-tutuda, de o jemaat manyawa mata-mata gënanga yaputuhu mangale yairiki yamuruono naga onangino aha yahuloko o Antiokhiaika imakinïki o Paulus deʼ o Barnabas. Onanga yairiki o Silas deʼ o Yudas iwihetongö o Barsabas. O nyawa yahinoto nënanga yodadi ihibaluhu o nyawa yongaku-ngaku manga hidogoronaka o Yerusalemoka. 23Onanga ihidingoto o hurata moi yao yahulo-huloko gënanga mademo hokonënanga,

”Roriadodoto mata-mataika nia ahali o nyawa mahomoaino o Yahudiokaua, nigogere o Antiokhiaka, o Siriaka deʼ o Kilikiaka. Miatabea ngomioka, o rasul-rasul de o tutuda-tutuda, enagënanga niaroriadodoto. 24Ngomi miihene, naga yamuruono naga o nyawa ngomino yoikoka nginika, inikapusaka nima hidodogumokaua de mangadodötoko-mangadodötoko önanga. Enahïoko ngomi miahulokua önanga yodiai hokogënanga. 25Hababu gënanga ngomi mimahikidibangoka de mata-mata mirimoi mangale miairiki o nyawa yamuruono naga de miahuloko önanga nginika. Onanga aha yoiki imakinïki de o Riadodoto o Barnabas de o Paulus ngomi miahohininga. 26O nyawa yahinoto nënanga ganga o nyawa ihitaioka toönanga manga nyawa, karana tongone nanga Jou Yesus Kristus. 27Hoʼ, ngomi miähuloko o Yudas deʼ o Silas Roriadodotika. Onanga mahirete aha inihingahu youruika nginika, o abari itotuli-tulihokaö o hurata nënanga magoronaka. 28Ma Jou Madutu ai Womaha ihigoungu – de ngomiö, mihigoungu – hupaya ngini uha inihidöaka o manarama iholoi itubuho mai paralu o manarama-o manarama nënanga dika: 29uha niaol̄omo o inomo ihiniatoka o gomangika; uha niaol̄omo o awunu, uha nia ol̄omo o aiwani ma akeme ihonenge kaya hirikiti, deʼ nimahikurutika de o manarama isosafarune. Nako ngini nimahikurutika niadiri o hali-hali gënanga, ngini niadiaioka maoa-oa. Gënanga dika, halamati!”

30Imahilooa iböto, önanga yähulo-huloko gënanga imagoraka o Antiokhiaika. Dokengoka önanga yäahoko o jemaat manyawa mata-mata imatoomu daha ihingahu o hurata gënanga. 31Maöraha o jemaat gënanga yabasa o hurata gënanga, önanga duru yomörene mangale o hurata madol̄a gënanga yalaru toönanga manga hininga. 32O Yudas deʼ o Silas, nagala onangö naga o nabi, madekana yatemo-temo de o roriadodoto yongaku-ngaku o Antiokhiaka gënanga mangale yahidöaka o kuata de o barani onangika. 33O Yudas deʼ o Silas yogogere dokengoka öraha muruono naga madekana ipaha, o nyawa yongaku-ngaku o Antiokhiaka gënanga yahidingoto önanga yolio deʼ ihibehehongo onangika ihingahu manga tabea o nyawa yahulo-hulokika önanga. [34Mä o Silas waputuhoka wotatapu wogogere o Antiokhiaka.]

35O Paulus deʼ o Barnabasö yögogere öraha muruono naga madekana o Antiokhiaka. Dokengoka önanga yadotoko deʼ ihiabari ma Jou aidemo imakinïki de o nyawa yowöe-wöe mahomoa.

O Paulus deʼ o Barnabas imatingaka

36Itedekanua ipahaika o Paulus witemo o Barnabasika, ”Niaino ngone homaidulu hälega o roriadodoto yongaku-ngakuoka o Yesusika o kota mata-mataika kiaka ngone hohohi abarioka ma Jou aidemo; hupaya ngone hamäke sarakia toönanga manga hali.” 37O Barnabas woigo wiao o Yohanis Markus, 38#Kis. 13:13 mä o Paulus wamäo itorou iwiao o Markus, woluku yomanarama imakinïki dede önanga de önanga wamal̄a o Pamfiliaka. 39O Paulus deʼ o Barnabas imaributu kohagiria hiädono mabaha önanga imätingaka: o Barnabas wiao o Markus de yohidete dede ünanga o Siprusika. 40O Paulus wi iriki o Silas daha imagoraka dede ünanga kiaka ipahaino o roriadodoto o Antiokhiaka gënanga yahilapahi önanga ma Jou aidoraika. 41Onangö yakiloliti o Siria deʼ o Kilikia; dokengoka önanga yahikuata o jemaat-jemaat.

Currently Selected:

O KISAH RASUL-RASUL 15: TLB

Highlight

Copy