LUKAS 24

Puwawangung I Yesus

(Mat. 28:1-10; Mrk. 16:1-8; Yoh. 20:1-10)

1Su l᷊ou ngu Misa, mal᷊uka-l᷊ukari manga kowawine e'e natamai sarang kubul᷊i numbawa manga rampa ko seng nisadia ngi sire. 2Su kubul᷊i, i sire nakawua watu l᷊ahumpinge seng nul᷊umunggi. 3Bou e'e i sire nusumu sarang l᷊al᷊ung u kubul᷊i e'e, kateho ta nakasugha badang u Mawu Yesus su se'e. 4Tintal᷊a i sire kararisi su se'e dang bingo kapupikiru hal᷊i e'e, singkawua pia duang katau dingang u pakeang kukerong kararisi su sindihang i sire. 5I sire nataku kahingang, bou e'e nusuba nurating u tana, tintal᷊a tau darua e'e nangul᷊i si sire, “Nakura i kumu mundea taumata ko wiahi su tal᷊oara u taumata ko nate? 6#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33I sie tarie e su si'i. I Sie seng nuwangung! Tinaumete apa ko seng nihabar-E si kumu su tempo I Sie mborong su Galilea, 7humoneu ‘Ahusu Taumata mambeng isarakang su taumata bardosa, bou e'e i ghantong, dang su l᷊ou katilunge i Sie sarung muwangung.’ ”

8Kute manga kowawine e'e nakatinaung apang ko nihabari Yesus. 9Suapang napul᷊e bou kubul᷊i e'e, i sire nuwukengu kaul᷊ie ko nariadi e'e su mapul᷊onsau rasuli dang su kaul᷊i u tumatuhu kowal᷊inge. 10Manga kowawine ko nuhabaru kaul᷊i e'e su manga tumatuhu I Yesus e'e ko: I Maria Magdalena, i Yohana l᷊au i Maria mama ngi Yakobus, dang manga kowawine kowal᷊inge ko nuhundingang i sire. 11Kateho manga rasul᷊i e'e manika manga kowawine e'e mangkate asal᷊e kapuwukenge. I sire tamangimang wuke ngu manga kowawine e'e. 12Arawe i Petrus nuwangung dang tumal᷊ang sarang kubul᷊i. Apiru kimakurung i sie nutuhung sarang l᷊al᷊unge, bou e'e nakawua kitang heka sapu su se'e. I Petrus naherang kahingang, bou e'e napul᷊e dingang u napene kakina su ral᷊ung u naunge hal᷊i u apang ko seng nariadi e'e.#24:12: Su l᷊al᷊ung u pirambau wohe takoae ayeti 12.

Su l᷊al᷊eng sarang Emaus

(Mrk. 16:12-13)

13Su l᷊ou e'e l᷊ai, duang katau tumatuhu I Yesus kal᷊al᷊enge sarang kampong simbau, arenge Emaus, manga mapul᷊onsau su kilonge bou Yerusalem. 14Apiru kal᷊al᷊enge i sire rua kapudidatonge kaul᷊i u hal᷊i ko seng nariadi e'e. 15Tintal᷊a i sire rua kapudidatonge dingang kapanipire, I Yesus sisane nusumongo dang nurumal᷊eng dingang i sire rua. 16I sire nakawua si Yesus, kateho pia apa ko nakatutu si sire sarang ta nakakiral᷊a si Sie. 17Bou e'e I Yesus nangul᷊i, “Apa kahipudidatongi rua su l᷊al᷊eng i'i?”

I sire rua natatana dingang pahesi nasusa. 18Bou e'e singkatau boi sire rua, arenge i Kleopas, nukina si Yesus, “Ko I Tuang singkatau ko wuhu su Yerusalem ko wugha ngu hal᷊i ko seng nariadi pai se'e wuhu-wuhu i'i?”

19“Ko hal᷊i a?” I Yesus nukina.

“Hal᷊i ko seng nariadi si Yesus, tau Nazaret e'e,” nisimbahi sire rua. “I Sie ko nabi. Apang didato-Nge dingang apang kakanoa-E makawasa kahingang – maning tumuhu tatuhung u Mawu Ruata kere'e l᷊ai tumuhu tahuhung u kaul᷊i u taumata. 20Manga tumbonang u imam l᷊au manga pangaha u bangsa ngi kite nanarakang I Sie guna ngu hukumang papate, dang i sire nunggantong si Sie! 21Sumbal᷊i i kami muharapi ko seng i Sie ko sarung mul᷊iu ngu tau Israel! Dang silou i'i seng katilu l᷊ounge nanita bou hal᷊i e'e nariadi. 22Mborong l᷊ai, i sire pirangkatau kowawine bou tal᷊oara i kami nupahuwi si kami. Mborong mal᷊uka-l᷊ukari i sire nakoa sarang kubul᷊i, 23Kateho tanakarea badang-E su se'e. Bou e'e i sire napul᷊e dang nangul᷊i ware i sire nakawua malaekati, dang manga malaekati e'e nangul᷊i ware I Yesus wiahi. 24Bou e'e pirangkatau boi kami natamai sarang kubul᷊i dang nakahombang himoneu apang ko nihabaru manga kowawine e'e mang kere'e, kitangu i sire tanakawua si Yesus.”

25Bou e'e I Yesus nangul᷊i si sire rua, “I kumu mang ko l᷊ongong! Tumaniu mal᷊onggge i kumu mangimang kaul᷊ie ko seng nihabaru manga nabi! 26Wal᷊ingewe Ratu Mananal᷊amati mambeng mamundang horo singsara e'e, mbuhue makarea kawawantugh-E?” 27Bou e'e I Yesus nanarangkang si sire rua apang ko mawawohe su kaul᷊i u Buki Susi hal᷊i u watangeng-Nge, nanita bou apang buki i Musa dang buki u manga nabi.

28Tintal᷊a e'e i sire seng masandighu kampong ko tamaingi sire. I Yesus tuhungang nutingkakoa kere ko murumal᷊eng turusi, 29kateho i sire rua nanahang si Sie. “Katanae dingang i kami,” Angkung i sire rua si Sie, “Ii seng kal᷊ahuwinge dang l᷊ai seng kararundunge.” Kute I Yesus nusumu tadeau makapangindul᷊e su tampa i sire rua. 30Su tempo nukumangiang nukumang dingang i sire rua, I Yesus nangal᷊a boroti, nutarimakase su Mawu Ruata, nangangompeng boroti e'e dingang u l᷊ima-Nge, bou e'e nangonggo si sire rua. 31Mbuhue i sire rua natitong humoneu e'e ko I Yesus. Kateho I Sie seng ta nikawuang i sire. 32Angkung i sire singkatau su kowal᷊inge, “Wal᷊inge we pundang u naungi karua sal᷊awe sumahoka, pia I Sie kapudidatonge dingangi karua su l᷊al᷊eng, dang nanarangkang tataho u Buki Susi si kite?”

33Singka tempo e'e l᷊ai i sire rua nakoa sarang Yerusalem. Pai se'e i sire rua nakahombang si sire mapul᷊onsau tumatuhu I Yesus kapukomol᷊e dingang i sire kowal᷊inge. 34I sire e'e nangul᷊i, “Mang tingari Mawu seng sau nuwiahi! I sie seng nutingkaandaghu watangeng-E si Simon!”

35I sire rua tumatuhu I Yesus ko mbuhue nusumongo e'e bou e'e nuwukengu sombangi sire rua su ral᷊al᷊engang, dang kirapa i sire rua nakakiral᷊a su tempo I Sie nangompengu boroti.

I Yesus nutingaadaghi watang-E

(Mat. 28:16-20; Mrk. 16:14-18; Yoh. 20:19-23; Wuk. 1:6-8)

36Tintal᷊a i sire mborong kapuwawukenge, singkahuwi I Yesus sisane kararisi su tal᷊oara i sire dang nangul᷊i, “Sal᷊amati si kumu!”#24:36: Su l᷊al᷊ung u pirambau wohe takoae: dang nangul᷊i, “Sal᷊amati si kumu!”

37I sire nahuwi dang nataku, ual᷊ingu sunaungi sire ko nakawua himukuri. 38Arawe I Yesus nangul᷊i, “Nakura i kumu nataku? Nakura nutumimbul᷊i kaghagho su l᷊al᷊ung u naung i kumu? 39Tuhungete l᷊ima-Ku dingang u laeri-Ku. Katitongte, ko Ia i'i! Pundangete dang tuhungete paka pia-pia, watu'u himukuri ko takoae ghisinge arako duhinge, musul᷊ungu nikawua ngi kumu si Sia.”

40I Yesus nangul᷊i kere'e apiru nanode l᷊imang-E l᷊au l᷊aer-E si sire.#24:40: Su l᷊al᷊ung u pirambau wohe takoae ayeti 40. 41Dang tintal᷊a i sire mborong sal᷊a tamangimang, ual᷊ingu tumaniu kal᷊iaghe dang naherang, I Yesus nukina si sire, “Apa i kumu pia kang su si'i?” 42I sire nangonggo si Sie kina sinanga simpoto. 43I Yesus nundae kina e'e, bou e'e nukumang su tingo ngi sire.

44Bou e'e I Sie nangul᷊i si sire, “Ii manga hal᷊i ko seng mbuae Daku nihabari si kumu su tempo Ia mborong dingang i kumu: humoneu apang hal᷊i ko mawawohe su l᷊al᷊ung u Buki i Musa, dingang u manga Nabi dang Mazmur, bou hal᷊i u Ia mang mambeng mariadi.”

45Bou e'e I Yesus namuka sipirangi sire tadeau makahingang pandungu Buki Susi. 46I Sie nangul᷊i si sire, “Su l᷊al᷊ung u Buki Susi mawawohe humoneu Ratu Mananal᷊amati e'e mambeng mutatahang u singsara, dang mambeng sau muwangung bou papate su l᷊ou katilunge. 47Himoneu l᷊ai areng u Ratu Mananal᷊amati e'e mambeng i paka titong su kaul᷊i u bangsa humoneu taumata mambeng putobati, dang Mawu Ruata mangampungu dosa. Dang habari e'e mambeng i pakatitong manita bou Yerusalem. 48Seng i kumu makoa saksingu kaul᷊i u e'e. 49#Wuk. 1:4Ia sisane ku sarung mundoho si kumu apa ko seng nipudianding I Yamang. Kateho i kumu mambeng tatapi mangampal᷊i su soa i'i sarang kawasa ngu Mawu Ruata mahumpa si kumu.”

I Yesus nihengke sarang sorga

(Mrk. 16:19-20; Wuk. 1:9-11)

50Bou e'e I Yesus numbawa si sire sarang l᷊ikuru soa sarang nuratingu Betania. Su se'e i Sie nuhengke l᷊ima-Nge, mbuhue nangal᷊amati si sire. 51Tintal᷊a i Sie kapukoae e'e, I Sie nahengke sarang sorga, bou e'e#24:51: Su l᷊al᷊ung u pirambau wohe takoae: nahengke sarang sorga, bou e'e. nutal᷊ei boi sire. 52I sire nusuba nanumba si Sie, bou e'e napul᷊e sarang Yerusalem dingang u naung ko mal᷊uasi kahingang, 53dang turusi kapudalongu Mawu Ruata su Wal᷊e-Ngu Mawu.

Currently Selected:

LUKAS 24: LAISXN

Highlight

Copy