ZEPANYA 3
3
Yerusalem nihukung dingangu nipakasal᷊amatẹ̌
1Kai pisị Yerusalem, soa kụ nagholang o kawe puluang dumokạ Mawu ringangu mẹ̌tahuěllangu tumanạ e sẹ̌sane! 2Kạěngkěhang soa kụ mạdiri měnarimạ těntiroʼm Mawu, ringangu tawe lai měngangarěgang manga sasal᷊ěntihọʼE, kụ tawe měnarakangu pẹ̌bawiahe su Mawu, dingangu tawe mẹ̌gausẹ̌ tul᷊umange si Sie!
3Manga těmbonangu soa ene e mẹ̌sul᷊ungu singa lụhuang. Manga mělahukunge mẹ̌sul᷊ungu manga ral᷊ugẹ̌ něngkal᷊unusẹ̌; i sire e tumanịu mauagẹ̌ hakịu sarang manga ruhine sěmbua e tawẹ apa kụ deng desokang baugu sěngkarịěllone. 4Manga nabine tawẹ apa pěndangu kawe měmamikul᷊e dingangu tawe kapangimangeng; manga imange napakal᷊amuhụ u apang kụ nitani waugu Mawu ringangu němamihu manga toratu Ruata e waugu kal᷊auntung i sire hala e. 5Kaiso Mawu e wědang ene su soa ene; i Sie hanesẹ̌ mẹ̌kẹ̌koạ apang kụ těngadẹ̌ dingangu tawe mẹ̌sal᷊a. Apang kamal᷊ukadẹ̌ nal᷊ahẹ u i Sie e mạngonggọu kạadilẹ̌ su manga umatʼE. Kaiso, taumata kụ běgang kạadilẹ̌ su soa ene těbewe mẹ̌kẹ̌koạ dal᷊akisẹ̌ kụ běgaweng mamea.
6 Mawu e něhengetang, ”U Iạ seng napakailangu wansa mal᷊awọ; manga soan sire e Takụ nipakaghohahẹ̌, dingangu manga meselẹ̌ ore lai měnaran sire e Takụ pinakal᷊ěmbe ěnạu manga opehe. Kal᷊awọu soan sire e marěmasẹ̌ tawẹ taune dingangu apan dal᷊enge tụtal᷊anggo. 7Su ěnna-Ku, ’Orasẹ̌ ini nal᷊ahẹ u taumata-Ku e měngẹ̌ngadatẹ̌ si Siạ dingangu rụdaringihẹ̌ kal᷊awọu těgu-Ku. Nal᷊ahẹ u i sire e mẹ̌tẹ̌tahěndung#3:7: Piram baụ tungkangu nạung: i sire mẹ̌tẹ̌tahěndung; Ibrani: i sire e tawe i pakagholọ. těntiro kụ Takụ nionggọ si sire.’ Kaiso karal᷊ahẹ e, i sire měngkate lai sahuneng mẹ̌kẹ̌koạ dal᷊akisẹ̌ e wọu nạung kal᷊imona.
8Kaiso, pangantibẹ̌ bue! Pěngampal᷊ẹ̌ ěllone Iạ e reng mẹ̌bawa kạbaratang. U kai sen Takụ niputusẹ̌ baugu měngomol᷊ẹ̌ manga wansa ringangu kararatuang baugu mapakaěnsạu ral᷊angehẹ̌-Ku e si sire. Kạguwạu dunia e sarung masue kanengangu putungu ral᷊angehẹ̌-Ku.
9Arawe wọu ene Iạ e sarung měmal᷊ui naungu manga wansa ene, hakịu i sire e mẹ̌kal᷊iomaneng si Siạ samatang, dingangu wal᷊inewe su manga ruata wal᷊ine. Manga wansa ene kěbị e sarung dumaringihẹ̌ si Siạ. 10Saral᷊aing bọu Sudan kụ marau e, umatẹ̌-Ku seng nẹ̌sal᷊iawuhẹ̌ ene e sarung duměnta ringangu maněmbang gaghěllị si Siạ. 11Su tempo ene, ei umatẹ̌-Ku, i kamene e tawahal᷊uasu lai makapěndang mamea ual᷊ingu seng nẹ̌pahuwungkadẹ̌ su těngo-Ku. Iạ e sarung měnokol᷊u apan taumata kụ maobotẹ̌ dingangu marangẹ naunge, kụ i kamene semben tawe lai mẹ̌pahuwungkadẹ̌ su těngo-Ku su wukidẹ̌-Ku susi e.#3:11: Wukidẹ̌-Ku susi e: Bul᷊udu Sion. 12Paị sene e sarung Takụ iwala katatanạ kere wansa sěmbaụ kụ naunge masanạ kụ mạngumbala su tul᷊umang-Ku. I sire e wotonge mẹ̌tanạ paị sene. 13#Pěl. 14:5 Tau Israelẹ̌ e apan nal᷊ěmbe e, sen tawe lai saụ mẹ̌koạ dal᷊akisẹ̌ si sai-sai; i sire sen tawe lai sarung mẹ̌konti, ringangu sen tawe lai sarung měngakal᷊ẹ̌. I sire e sarung tawẹ konsange apa ringangu mal᷊unsemahẹ̌, dingangu tawe makakapěndang matakụ si sai-sai.”
Laguʼn dal᷊uasẹ̌
14Ei Israel, pahul᷊uasẹ̌ dingangu pěmpẹ̌kantarị e!
Ei Yerusalem, pěmpahul᷊iage ringangu kạguwạu naung.
15Batụu Mawu e něngirul᷊e něhukung si kamene;
i Sie seng něnokol᷊u kal᷊awọu sědụu e.
I kamene e tẹ̌těntanudangu ratung Israel, Mawunu e hala.
Orasẹ̌ ini e i kamene seng tawahal᷊uasu relaing makapěndang matakụ.
16Sarung marěnta tempone taumata mẹ̌bera u,
”Ei Yerusalem, abe kěngkatakụ dingangu kumbahangbe měngkal᷊ompọ naung i kamene.
17I kamene e tẹ̌těntanudangu Mawu Ruatanu e kụ mahasa.
I kamene e nakauntu ual᷊ingu kawasa-Ne.
Mawu e rụl᷊uasẹ̌ dingangu rụl᷊iagẹ̌ ual᷊ingu i kamene,
su ral᷊ungu kakěndagʼE, i kamene e nionggotangʼE pẹ̌bawiahẹ̌ buhu.
18Ual᷊ingu i kamene, i Sie e mẹ̌kẹ̌kantarị mal᷊uasẹ̌
al᷊ingkai taumata kapẹ̌sẹ̌sal᷊iwange.”
Angkuěng u Mawu,
”U hombang masaria e kụ seng němatakụ si kamene Takụ nipakapuạ.
Kal᷊ahinanu e sen Takụ nirědasẹ̌.#3:18: Ayetẹ̌ 18 su bukẹ̌ u Ibrani e tawe nal᷊ahẹ.
19Tempone e sarung duměnta, mẹ̌tatahuěllang i kau e Takụ ipakawihua,
ringangu taumata kempal᷊ẹ̌ e Takụ ipakasal᷊amatẹ̌;
patikụ apang nawembange Takụ ahakeng pakapul᷊ẹ.
Kal᷊ahinan sire e Takụ bal᷊uiang makoạ kal᷊aadatẹ̌;
baewe suapa, saral᷊aing patikụ dunia;
i sire sarung bantugang dingangu raloěng.
20Tempone sarung marěnta,
tumanạu e kụ nasawuhẹ̌ e Takụ ahakeng pakapul᷊ẹ.
I kamene Takụ ipakateleng su kasěllahu wowon dunia ini e,
ringangu kasasukụ u pẹ̌bawiahu e sarung Takụ ipakapul᷊e kapia.”
Mawu e seng nẹ̌bisara.
Currently Selected:
ZEPANYA 3: SXN
Highlight
Share
Copy
Want to have your highlights saved across all your devices? Sign up or sign in
