ROMA 2

Hukumang u Mawu Ruata

1 # Mat. 7:1; Luk. 6:37 Ual᷊ingu ene, manga anạ u sěmbaụ kai isai tangu i kau e hakịu i kau mapẹ̌sal᷊an taumata wal᷊ine? I kau tawẹ apang hinong ikapẹ̌tahutěndạ baugu watangengu! U kamagengu i kau kawe mapẹ̌sal᷊an taumata wal᷊ine, kutẹu i kau sěsanu mẹ̌kẹ̌koạbelai kere kẹ̌koateng i sire, ute i kau mělẹ̌hukung u watangengu hala. 2I kitẹ masingkạ kereu Mawu Ruata mapakanawong hukumang e si sai-saịewen kakanoạ e kerene ute, putusang u Mawu Ruata e kahěngang. 3Arawe i kamene, manga anạ u sěmbaụ mal᷊aing měmpẹ̌kẹ̌koạ kal᷊awọu apan ipạngěnsilʼi kamene si sire wal᷊ine! Dingangu i kamene mẹ̌tẹ̌tiněnna u i kamene makatal᷊ang bọu hukumang u Mawu Ruata e? 4Arau i kamene kai tawe měngarěgang kakěndagʼu Ruata, ringangu kakalạu ral᷊ungu naung ore lai kasěllahu pẹ̌sasabarʼE? Těngadẹ̌ i kamene masingkạu Mawu Ruata e mělahẹu kapian naungʼE ual᷊ingu i Sie mapulu tadeạu i kamene mẹ̌tobatẹ̌ bọu kal᷊awọu rosang kamene. 5Kutẹu těmbọ i kamene kawe makakětị dingangu mạdiri měmal᷊ui. Ual᷊ingu ene i kamene hala nakatambang kawěhạe hukumang su Ěllong Kiamatẹ̌ kereu Mawu Ruata e mapakarěntan dal᷊angehʼE ringangu mapakanawong hukumang maadilẹ̌. 6#Mzm. 62:13; Baw. 24:12 U Mawu Ruata e sarung mamal᷊isẹ̌ suapan taumata ituhụ su kakanoạe. 7Mawu Ruata mangonggọʼu pěbawiahẹ̌ tutune ringangu kakalẹ̌ si sire apang makạkědang měmpẹ̌koạ hal᷊ẹ̌ mapia tadeạu makaěbạ kawawantugẹ̌, adatẹ̌, dingangu kakoạ kakalẹ̌. 8Arawe i sai-saing kětạeng kụkěndagu watangenge ringangu madiri tumuhụ Mawu Ruata, kaiso kawe tụtol᷊e karal᷊akisẹ̌ e, ute i sire ene e sarung makal᷊angehẹ̌ Mawu Ruata marasai. 9Apan taumata mẹ̌kẹ̌koạ dal᷊akịe sarung masunsara ringangu masigěsạ, kahumotongange su tau Yahudi, kerene lai su manga wansa wal᷊ine. 10Kai kěbị taumata apang mẹ̌kẹ̌koạ mapia e sarung kapusakateng u kawawantugẹ̌ dingangu adatẹ̌ dingangkewen katatul᷊ende wọu Mawu Ruata kahumotongange su tau Yahudi kerene lai si sire wansa wal᷊ine. 11#Pang. 10:17 Batụu Mawu Ruata e mẹ̌koạ kěbị taumata e mẹ̌sul᷊ung.

12Taumatam banua wal᷊ine e němpẹ̌dosa kụ bẹ̌gawen toratʼu Yahudi. Kụ i sire ihukung sul᷊iung toratẹ̌. Arawe taumatan Yahudi němpẹ̌dosa samurin nakakasingkạ u toratẹ̌ e; ual᷊ingu ene i sire sarung l᷊ai tuntukang u toratẹ̌ e. 13Batụu taumata kụ saụ mẹ̌těngkapia ringangu Ruata, bal᷊inewe ual᷊ingu tau ene seng masingkạ u toratu agaman Yahudi kaiso kawe ual᷊ingu mẹ̌kẹ̌koạ apang kụ mạbawohẹ su ral᷊ungu toratẹ̌ e. 14Taumatam bansa wal᷊ine e wěgawen toratʼu Yahudi. Kai kereu i sire su kapulun sire hala e měmpẹ̌kẹ̌koạbe apang ilẹ̌atoru toratẹ̌ ute naung i sire hala e nẹ̌koạbe tiahaʼn sire, maningbe i sire wěgan toratʼu Yahudi. 15Kakanoạ i sire e měmpẹ̌nodẹu apan ilẹ̌atorʼu toratẹ̌ mạbawohẹ su naung i sire. Kasingkạ u naung i sire e mal᷊aing měmpẹ̌sẹ̌sahidin hal᷊ẹ̌ ene, u i sire hala kạdingạ ipẹ̌sẹ̌sal᷊a ringangu kạdingạ l᷊ai nẹ̌tatahino ual᷊ingu tiněnnan sire. 16Kerene sarung mariadi su ěllone kụ seng nitantu ene. Su ěllo ene – tuhụewe Injilẹ̌ takụ nịbawombeng – Mawu Ruata sural᷊ungken Yesus Kristus, sarung měhukung kal᷊awọu rahasian dal᷊ungu naung dingangu sipirang u kěbị taumata.

Tau Yahudi ringangu toratʼu Yahudi

17Kai orasẹ̌ ini e kereapạe i kamene manga anạ u sěmbaụ? I kamene něngakuwen batangeng i kamene tau Yahudi. I kamene mạngumbalang toratʼu Yahudi ringangu i kamene lụl᷊uasu pẹ̌kakauhʼi kamene ringangu Mawu Ruata. 18I kau nakaěbạ manga těntiro wọu tita ene, hakịu i kau mạsingkạ u kapulun Mawu Ruata e ringangu i kau masingkạ mẹ̌tilakehu sude mapia. 19I kau e mạngiaking u i kau kai měngangahạ tau wuta ringangu tualagẹ̌ baugi sire sumarěndung; 20i kau e mananěntiro taumata l᷊ongong dingangu mananěntiro taumata wodo. I kau mangiaking u su ral᷊ungu toratʼu Yahudi e, i kau mạnaghuang patikụ kasingkạ dingangu těntiro kahěngang. 21I kau mạněntiro taumata wal᷊ine; kụ unụe i kau tawe mananěntiro watangeng u hala? I kau mẹ̌sẹ̌sěding taumata mědeạu kumbahang mẹ̌tako, kụ unụe i kau sẹ̌sanu mẹ̌tẹ̌tako! 22I kau mạněntiro taumata kumbahang mawuang, ral᷊iune i kau sẹ̌sanu nawuang! I kau e mẹ̌bẹ̌binsịu mahang duata e, sumbal᷊iau kawe i kau sẹ̌sanu měngẹ̌ngal᷊ạ manga apal᷊iwụ bọu wal᷊eng mahan duata. 23I kau lụl᷊esạ u i kau mạnaghuangbe torati Musa, ral᷊iune kawe i kau něhinakang Duata mase tawe timuhụ hengetangʼE. 24#Yes. 52:5 Su ral᷊ungu Winohẹ Susi e mạbawohẹ kere ini: ”Ual᷊ingu i kamene taumatan Yahudi, ute areng u Mawu Ruata sẹ̌samedang sutal᷊oaran manga wansa wal᷊ine.”

25Kamageng i kau matuhụ su toratʼu Yahudi ute sunatʼu e mal᷊aing piạ gunane. Kai kereu i kau měngkate lai lụlampa toratẹ̌ ene, ute sunatʼu e semben tawẹ ual᷊ine. 26Kereu sěngkatau wal᷊ine Yahudi e kụ tawe nisẹ̌sunatẹ̌, kai měsẹ̌sěmpị toratʼu Yahudi, kụ bal᷊inewe irekeng u Mawu Ruata e kere sěngkatau wọu nisunatẹ̌ ngae? 27Kụ i sire apan ta nịsasunatẹ̌ e sarung mapẹ̌sal᷊ang kau sěngkatau tau Yahudi u i kau kai mạnaghuang toratʼu Yahudi ringangu i kau kawe nisunatẹ̌, kutẹu i kau kawe limampa toratẹ̌ ene. I sire tawe nisunatẹ̌, kutẹu i sire mẹ̌gěngganapẹ̌be toratʼu Yahudi. 28Batụu tau Yahudi patutune e, bal᷊inewe kětạeng arenge tau Yahudi e dingangu taumata kụ kahěnga-hěngang nisunatẹ̌ e bal᷊inewe taumata kụ nisunatẹ̌ tuhụ mạbadang samatang. 29#Pang. 30:6 Ral᷊iune tau Yahudi tutune e, i sie kai piạ naungu Yahudi, ringangu sunatẹ̌ tutune ute kai sunatʼu ral᷊ungu naung nipẹ̌karadiahang u Rohkẹ̌ u Ruata, wal᷊inewe kětạeng kạbawohẹ su ral᷊ungu bukẹ̌. Taumata kerene tangu makatarimạ daralo wọu Mawu Ruata, wal᷊inewe wọu taumata.

Currently Selected:

ROMA 2: SXN

Highlight

Copy