MARKUS 7
7
Tundung i upung gaghurang
(Mat. 15:1-9)
1Tau Farisi sěngkamonaěng dingangu pirang katau mananěntirong agama wọu Yerusalem nahunděnta su anun Mawu Yesus. 2I sire nakasilo manga muritʼu Mawu Yesus pirang katau mạhungkaěngu l᷊iman sire kotorẹ̌ tuhụ agama, mangal᷊ene tawe němpanguhasẹ̌ lima kal᷊imona tuhụ atorʼu agama.
3Tau Farisi, kerene lai patikụ apan tau Yahudi e masatia kahěngang mahuntol᷊e tundung i upung gaghurang i sire. I sire tawe mahungkaěng kereu tawe nanguhasẹ̌ liman sire tuhụ tundu seng nihundugẹ̌ e. 4Apan niwělliang su pasarẹ̌ e reng tawe kanengang, těntal᷊ang deng tawe nilẹ̌uhasẹ̌ kal᷊imona.#7:4: Apan niwělliang su pasarẹ̌ ... těntal᷊ang deng tawe nilẹ̌uhasẹ̌ kal᷊imona: arau lai kereu mapul᷊ẹ bọu pasarẹ̌ e i sire lai tawe kumaěng kereu tawe měmurěsi wadange kal᷊imona. Dingangu lawọ l᷊ai atorẹ̌ bal᷊ine wọu i upung i sire kụ lẹ̌umpaedang i sire matoghasẹ̌; kere manguhasẹ̌ galasẹ̌, bekerẹ̌ dingangu apal᷊iwụ bọu witụ.#7:4: Su ral᷊ungu winohẹ nạung pira-pira piạ bawera: dingangu tampạ u katatikilang.
5Batụu ene manga tau Farisi ringangu manga mananěntirong agama e, němpẹ̌kiwal᷊o su Mawu Yesus, ”Kai unụe manga muritʼU e kawe kụkaěngu lima tawe nilẹ̌uhasẹ̌? Kai unụe i sire tawe tumatol᷊e tundu manga i upung gaghurang i kitẹ e?”
6 #
Yes. 29:13
Mawu Yesus simimbang, ”I kamene mamben taumata mělle! Mangkewen nihino apang nitẹ̌bal᷊ʼi Yesaya mạanung kamene,
’U kai kere ini angkuěng u Mawu Ruata,
i sire ene kětạeng mạngadatẹ̌ si Siạ su mohong,
arawe naung i sire e kai marau wọu Iạ e.
7Tawẹ kěhase i sire měmpaněmba Siạ,
batụu kai tiahan taumata itẹ̌těntiron sire,
tabidạu kai tita-Ku!’
8Manga titan Duata e tawe sasěmpikang i kamene, arawe tundung taumata e lẹ̌umpaerangbeng kamene masěga-sěgadẹ̌.”
9Mase Mawu Yesus saụe wue něhengetang, ”I kamene e pande kahěngang mẹ̌sunial᷊ʼu titaʼm Mawu Ruata e, tadeạu makapẹ̌tahutěndạu těntirong kamene hala. 10#Sas. 20:12, 21:17; Imng. 20:9; Pang. 5:16 I Musa e seng nangonggọu tita kerei, ’Pangadatẹ̌ si amangu ringangu si ninangu,’ dingangu ’I sai mamul᷊o si amange ringangu si ninange, hinong ihukung pateěng.’ 11Arawe i kamene kawe mẹ̌nẹ̌něntiro: Kereu piạ u měmul᷊o gaghurange, ’Apang kụ hinong takụ ionggọ si amangku ringangu si ninangku, seng bọu takụ nịsasěmba su Ruata,’ 12tangu i kamene kai něliwirẹ̌ taumata ene wọu tatangkianenge mẹ̌tul᷊ung i amange ringangu i ninange. 13Tangu ual᷊ingu těntirong kamene kụ nionggọ i kamene su taumata e, i kamene měnděmmẹ u hengetangu Mawu Ruata. Bědal᷊aing mal᷊awọ kakakoạ kere ini kụ kẹ̌koateng i kamene.”
Apa makal᷊amuhʼu taumata
(Mat. 15:10-20)
14Mase Mawu Yesus kimui taumata lawọ e sěnsul᷊e kạpia kụ něhengetang si sire, ”Pěmpẹ̌daringihẹ̌ko tadeạu makaěnna! 15Tawẹ manga apa kụ bọu l᷊ikude masuẹ̌ su ral᷊ungu taumata kụ makal᷊amuhụ si sie. U kawe apan sụsěbang bọu sěngkatau ene nakal᷊amuhụ si sie. [ 16Tangu kereu piạ tul᷊i, pěmpẹ̌daringihẹ̌.]”
17Ene sarạeng Mawu Yesus naněntangken taumata l᷊awọ e kụ dimangeng su wal᷊e, manga muritʼE nakiwal᷊o si Sie měnsang kaia timonan papinintu ene. 18Tangu Mawu Yesus něhengetang si sire, ”Kai ta nakaěnna i kamene? Arau kai tawe makaěnna i kamene u apan masuẹ̌ su ral᷊ungu pẹ̌sěngkatau e tawe makal᷊amuhụ si sie? 19U apạewen masuẹ̌ e tawe sumahe ral᷊ungu naung, kaiso kawe lụl᷊iu tiang, kụ susamurine sụsěbang kapia.” Bọu manga wawera ene Mawu Yesus mělẹ̌lahẹ u kěbị kaěng e mapia.
20Mase Mawu Yesus saụ lai něhengetang, ”Apan sumẹ̌bang bọu pẹ̌sěngkataue kai ene makạl᷊amuhụ si sie. 21Batụu wọu ral᷊unge, mangal᷊ene wọu ral᷊ungu naung, pěbẹ̌buakengu tiněnna raral᷊akị kụ makạbodaị taumata měkẹ̌koạ lamuhụ, mẹ̌tako, měmate, 22mạbuang, měngakal᷊ẹ̌, mělẹ̌hinakang dingangu měkẹ̌koạ haghing kakanoạ dal᷊akị, mauagẹ̌, tạ adate, mẹ̌nanoi, maobotẹ̌, dingangu mawěhạ pěněntiroěnge. 23Kěbị apan daral᷊akị ene sụsěpụ bọu ral᷊unge, kụ kai ene e makạl᷊amuhụ taumata e.”
Pangangimangu sěngkatau wawine
(Mat. 15:21-28)
24Bọu e Mawu Yesus naněntang u tampạ ene, kụ nakoạ sol᷊ong beọ e maraning soan Tirus. I Sie simuẹ̌ su ral᷊ungu wal᷊e sěmbaụ, kụ tawe mapulu piạu makakasingkạu i Sie kawe ene sene. Kai i Sie tawe nakawuning batangenge. 25Sěngkatau inang, kụ piạ anạe wawine kụ niwal᷊iuang u rohkẹ̌ dal᷊aị, nakaringihẹ̌ piạ Mawu Yesus. I Sie riměnta sol᷊ong anum Mawu Yesus kụ nẹ̌suba su těngonʼE, 26apidʼu nẹ̌kal᷊iomaneng tadeạu Mawu Yesus e měnokol᷊u rohkẹ̌ dal᷊aị bọu rariọ ene. Tau wawine ene wal᷊inewe tau Yahudi, nihanạ su wanuan Fenisia su Siria. 27Mawu Yesus něhengetang si sie, ”Manga rariọ e hinong gělirang u kaěnge kal᷊imona. Kawe ral᷊akị mangal᷊ạ kaěng u manga rariọ e kụ iteledẹ̌ su asu.”
28”Tuang,” angkuěngu wawine ene, ”manga asu su al᷊ungu meda e mal᷊aing kụkaěng manga popahẹ̌ kụ ilẹ̌ondol᷊ʼu manga rariọ e!”
29Mase Mawu Yesus e něhengetang si sie, ”Ual᷊ingu sasimbahu ene, ute kapul᷊ẹ e; rohkẹ̌ dal᷊akịe seng simẹ̌bang bọu anạu e!”
30Inang ene e napul᷊ẹ. Su wal᷊e, i sie nakahombangke anạ e rụdal᷊oka su raral᷊okaěng, kụ rohkẹ̌ dal᷊akịe mambeng kahěngang seng siměbang bọu rariọ e.
Mawu Yesus napakapian tau mou kutẹu lai wengelẹ̌
31Bọu e Mawu Yesus naněntangken Soan Tirus kụ nanẹ̌paseng daral᷊enge lumiun Sidon sol᷊ong Danong Galilea. I Sie niral᷊engu weọ e limiu Soa Mapul᷊o. 32Sene tangu taumata e nangěntudʼu sěngkatau mou kutẹu lai wengelẹ̌ su anunʼE. I sire mẹ̌dorong su Mawu Yesus apạněllidʼu limane su tau ene. 33Mawu Yesus nẹ̌bawạe tau ene niapakatěntani wọu taumata l᷊awọ, mase naněllidʼu tal᷊imědone su tul᷊in tau ene ruambẹ̌ka e. Mase Mawu Yesus nangědu ringangu nanenggehẹ̌ lilang tau ene. 34Tuhụ e Mawu Yesus e rimal᷊ingara sol᷊ong langị, kụ simindạ maral᷊ung dingangu něhengetang su tau ene, ”Efata,” mangal᷊ene, ”Kawuka e!”
35Tul᷊in tau ene nawukạ e, ringangu lilane limontọe saụ, kụ i sie nanětạ e nakawera mapia. 36Mase Mawu Yesus nẹ̌seding i sire kěbị měmpẹ̌běken hal᷊ẹ̌ ene si sai-sai. Kai mangkeng isẹ̌dingu Mawu Yesus, i sire lai mangkeng měbẹ̌běkeng ene. 37Kụ kěbị taumata apan nakaringihẹ̌ e, rimal᷊inaụ tawẹ sihinge. I sire němpẹ̌bera, ”Kěbị e seng nikoạʼE ringangu maudupẹ̌! O i Sie wẹ̌dang lai napakateleng u tul᷊in tau wengelẹ̌ dingangu taumata mou e nakawera!”
Currently Selected:
MARKUS 7: SXN
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in