MARKUS 6

Mawu Yesus pinẹ̌binsị su Nazaret

(Mat. 13:53-58; Luk. 4:16-30)

1Bọu tampạ ene, Mawu Yesus napul᷊ẹ sěngkakapul᷊ẹ dingangu manga muritʼE sol᷊ong soan sire. 2Kụ su ěllon Sabatẹ̌, i Sie nanětạe naněntiro su wal᷊em pẹ̌kakal᷊iomanengang. Sene kai piạ taumata mal᷊awọ. Ene i sire nakaringihe těntiron Mawu Yesus, i sire mangkewen němpẹ̌dal᷊inaụ. I sire němpẹ̌bera, ”Kai wọu apa tau ěndaị nakaěbạ kěbị tamai ene? Kai kasingkạ kereapa si Sie? Kai kereapa i Sie měkoạ karal᷊inaụ? 3Karạ i Sie kawe basẹ̌ u kalu, anạ i Maria, kụ tuhang i Yakobus, i Yoses, i Yudas dingangi Simon? Ore, manga wawinene mal᷊aing měmpẹ̌tẹ̌tanạ sini.” Ual᷊ingu ene i sire tawe něnarimạ i Sie.

4 # Yoh. 4:44 Mase Mawu Yesus něhengetangke si sire, ”Sěngkatau nabi e lẹ̌adateng suapan tampạ tabeạu katewe su wanuane ringangu sutal᷊oarang anạ u sěmbaụ e ringangu walage.”

5Kụ sene Mawu Yesus tawe nakapěkoạ munara makạdal᷊inaụ tabeạu katewe napakapian masasakị, pirang katau ringangu naněllidʼu l᷊imane si sire. 6I Sie naral᷊ingung sire, kawe tawe mangimang.

Mawu Yesus rimolohʼu muritʼE mapul᷊o dua e

(Mat. 10:5-15; Luk. 9:1-6)

Bọu e Mawu Yesus limuhu manga kampong mạngěllikụe kạpaněntirone. 7I Sie kimui manga muritʼE mapul᷊o dua e, mase rimolohʼi sire pẹ̌tahạduang katau kụ nionggotangu kawasa tadeạu i sire makapěnokol᷊ẹ̌ manga rohkẹ̌ dal᷊aị e. 8#Luk. 10:4-11 I Sie nẹ̌gěllịu těntiro kere ini si sire, ”Kumbahang mẹ̌bawa manga apa-apa su raral᷊engang i kamene, tabeạu katewe tẹ̌king. Kumbahang měmpẹ̌bawa kaěng arau kawihʼu siděka, arau roitẹ̌. 9Pěmpẹ̌sasapatu wue, kai manịeng tawe mẹ̌bawa laahusẹ̌ duam parẹ̌.” 10I Sie mal᷊aing něhengetang, ”Kereu i kamene rumangeng su wal᷊e sěmbaụ, ute katanạe sene sarang i kamene maněntangu soa ene. 11#MMR. 13:51 Kai kereu i kamene mahumpạe su tampạ sěmbaụ, kụ i sire sene tawe manarimạ dingangu tawe rumaringihẹ̌ si kamene, ute těntangke wanua ene. Kụ tontongko awul᷊ẹ̌ bọu laedʼi kamene makoạ kere sasahidi si sire!”

12Tangu manga muritʼu Mawu Yesus i sire mapul᷊o dua e nahundal᷊engke. I sire rimal᷊eng němpẹ̌kakekeng habarẹ̌ u taumata e apětẹ̌tobatẹ̌ bọu kal᷊awọu rosane. 13#Yak. 5:14 Manga muritʼu Mawu Yesus e němpanokol᷊ẹ̌ kal᷊awọu manga rohkẹ̌ dal᷊aịe, namuhang lanang zaitun su masasakị, dingangu niapakaul᷊en sire.

Papateng Yohanes Mananahani

(Mat. 14:1-12; Luk. 9:7-9)

14 # Mat. 16:14; Mrk. 8:28; Luk. 9:19 Manga habarẹ̌ mạanung kal᷊awọu apan seng nariadi kinaringihʼu Ratu i Herodes,#6:14: Datu i Herodes: Herodes Antipas, měngangawasa su Galilea. batụu arengu Mawu Yesus e seng timeleng suapan tampạ. Piạ taumata nẹ̌bera u, ”i Yohanes Mananahani e seng nẹ̌biahẹ̌ kạpia! Kai ene hakịu i Sie piạ kawasane mẹ̌koạ karal᷊inaụ tamai ene.”

15Arawe i sire wal᷊ine e měbẹ̌bera u, ”i Sie kai i Elia.”

Piạ l᷊ai měbẹ̌bera u, i Sie kai nabi, mẹ̌sul᷊ungu sěngkatau nabi wọu tal᷊oarang tempo kal᷊imona.

16Piạ e i Herodes nakaringihẹ̌ ene, i sie nẹ̌bera u, ”Mang kahěngangu ini e kai i Yohanes Mananahani kụ kạngerẹ e seng takụ pakịbusạ těmbọe. Ini i sie kai seng nẹ̌biahẹ̌ kapia!”

17 # Luk. 3:19-20 Batụu kal᷊imonang ene, i Herodes nạung seng nangoro taumata piněnamẹ si Yohanes, kụ pinakitahungkụ. I Herodes nẹ̌koạ kerene ual᷊ingu i Herodias kawingu anạ u sěmbaụ e hala i Filipus. Batụu i Herodes kai seng nẹ̌kapapuěng dingangi Herodias, 18kụ su hal᷊ẹ̌ ene tangu i Yohanes kai seng piran sul᷊e měbẹ̌bera si Herodes kere ini, ”Tawe wotonge i kau mẹ̌kapapuěng kawingu anạ u sěmbaụ u ene!”

19Kai ene sungkal᷊ene hakịu i Herodias nạung nangune si Yohanes kụ mapulu měmate si Yohanes, kai i sie tawe nakakoạ hal᷊ẹ̌ ene, batụu sẹ̌sahagheěng i Herodes. 20Batụu i Herodes kai seng něndolohʼu taumata pẹ̌děndiagạ pakapia-pia si Yohanes su tahungkụ, ual᷊ingu i sie kai mạtakụ i Yohanes. I sie masingkạu i Yohanes kai sěngkatau taumata naunge mapia ringangu matul᷊idẹ̌ kụ nidarolohʼu Mawu Ruata. Kụ kamageng i Yohanes mẹ̌bisara ute, i Herodes mal᷊aing puluang dumaringihẹ̌, maning i sie ikẹ̌kal᷊ipomponge.

21Pangěnsueěnge i Herodias nakaẹ̌bạe loahe su ěllom pẹ̌tatahěndungangu karariading Herodes. Su tempo ene i Herodes namangung sal᷊iwangu kěbị wẹ̌batone, těmbonangu manga mẹ̌sasekẹ dingangu manga matatěllangu wanuang Galilea. 22Su sal᷊iwang ene, anạ i Herodias mahuala#6:22: Anạ i Herodias mahuala: Su winohẹ u nạung pira-pira e: anạ e mahuala (kụ kai anạ i Herodes mahuala) arenge i Herodias. taraịe simuẹ̌ nẹ̌sal᷊ai, kụ pẹ̌sasal᷊aine měngkai nakal᷊ahimpulu naung i Herodes dingangkewelai manga sakene. Tangu i Herodes nẹ̌berạe su rariọ mahuala ene, ”I kau e mẹ̌tonengu a, pěhabare! Iạ e sarung měngonggọu ene si kau!” 23Mase i Herodes nẹ̌kědo su rariọ mahuala ene apidʼu piạ salune. I Herodes nẹ̌berau, ”Baẹbe apa rorongangue mang sarung takụ ionggọ, ore lai maning sěmbẹ̌ka wọu wanua pẹ̌parentaěngku e!”

24Tangu rariọ mahuala ene simẹ̌bangke kụ nakiwal᷊o si ninange, ”Inang, apạ e kapiange takụ dorongang?”

I ninange simimbang, ”Pẹ̌dorongke těmbọ i Yohanes Měnanahani.”

25Dariọ mahuala e měngkatewe lighạ nẹ̌sul᷊e sol᷊ong anung Herodes kụ nẹ̌bera, ”Iạ mẹ̌dorong těmbọ i Yohanes Měnanahani kụ onggọ si siạ su orasẹ̌ ini lai ku taho su baki!”

26Sarang nakaringihẹ̌ dorong ene, tangu i Herodes měngkatewe apa masusa-susa naung e. Kaiso, i sie mang tawe makakoạ mangilěmmụ u rorong ene, ual᷊ingu i sie kai seng nẹ̌salu su těngon manga sakene. 27Kụ i sie měngkatewe něhanggosẹ̌ dimolohʼu sěngkatau l᷊ukade apẹ̌ngal᷊ạ těmbọ i Yohanes Měnanahani e. Tangu lukadẹ̌ ene simuẹ̌ e su tahungkụ, mase namusạ těmbọ i Yohanes. 28Bọu ene i sie nẹ̌bawa těmbọ ene su baki kụ nitẹ̌gone su rariọ bawine ene. Mase rariọ bawine ene saụ něnogorʼu těmbọ ene si ninang e. 29Bọu e manga muritʼi Yohanes nakaringihẹ̌ hal᷊ẹ̌ ene, i sire nahunděntạe němpangal᷊ạ maieti Yohanes mase nilẹ̌bing.

Mawu Yesus napakaěng u l᷊ima hiwu su kataune

(Mat. 14:13-21; Luk. 9:10-17; Yoh. 6:1-14)

30Manga rarolohang kụ nirolohʼu Mawu Yesus e němpẹ̌sul᷊e kapia kụ němpẹ̌komol᷊ẹ̌ dingangu Mawu Yesus. I sire němpẹ̌běke si Sie patikụewe apan seng nikoạ dingangu nitěntiron sire. 31Měngkai apa mal᷊awọ taumata měngkasongo ringangu měngkapul᷊ẹ, hakịu kal᷊ingung kumaěnge Mawu Yesus dingangu manga muritẹ̌ e tawẹ loahe. Tangu Mawu Yesus něhengetang su manga muritʼE, ”Bọete i kitẹ sol᷊ong tampạ marěmasẹ̌ mẹ̌těngkatěntani i kitẹ hala, tadeạu i kamene reng makapangirol᷊o kadodọ tempo.” 32Tangu i sire němpẹ̌buạ e ringangu sakaeng sol᷊ong tampạ marěmasẹ̌.

33Kutẹu kai lawọ taumata seng nakasilo si sire němpaněntangu tampạ ene, kụ masingkạu i sai wue i sire. Kụ bọu kěbị soa su wanua ene, i sire měngkatewe mạhuntal᷊ang bọu rul᷊unge měmpẹ̌ngal᷊imona Mawu Yesus dingangu manga muritʼE. 34#Pẹ̌t. 27:17; 1Rat. 22:17; 2Kar. 18:16; Yeh. 34:5; Za. 10:2; Mat. 9:36 Ene, Mawu Yesus tụtumpạe wọu sakaeng, i Sie nakasilo taumata lawọ. I Sie timal᷊ěntụ i sire, ual᷊ingu i sire kai kere domba tạ měral᷊ukade. Tangu i Sie nanětạe naněntirong hal᷊ẹ̌ lawọ si sire. 35Ene nawawěllọe, tangu manga muritʼu Mawu Yesus němpẹ̌berạe si Sie, ”Seng masarạ mahěbi, kutẹu tampạ ini e kawe maghea. 36Mapiawe i Tuang pěndolohʼi sire ini e aparal᷊eng, tadeạu i sire makawelliwe kaěng su manga weọ e arau manga kampong apan mạngělikụ ini e.”

37Kai Mawu Yesus e simimbang, ”I kamene e pěgěllị kaěng i sire.”

”Hu, kai i kami harusẹ̌ dumal᷊eng mamělli borotẹ̌ arẹ̌gan doitẹ̌ sal᷊aka#6:37: Doitẹ̌ sal᷊aka: Doitẹ̌ sal᷊aka sěngkal᷊ěpa e kai ghajin sěhěllo waugu sěngkatau mělahal᷊ẹ̌ biasa (kakělla Mat. 20:2). dua hasụ su kal᷊ěpane waugʼu kaěng i sire ini e?” kerene angkuěngu manga muritʼu Mawu Yesus e.

38Mase Mawu Yesus nakiwal᷊ọ e, ”Kai pirang baụ borotẹ̌ si kamene? Kěnangko pěmpẹ̌kakělla.”

Bọuten i sire němpẹ̌kakělla, ute i sire němpẹ̌bera u, ”Piạ borotẹ̌ limambaụ dingangu piạ lai kinạ duambua.”

39Mase Mawu Yesus nangoro si sire kěbị e apạkaiang pěkẹ̌kamonaěng su rěmpugẹ̌ melong. 40I sire měngkate nahungkaiang němpẹ̌kamonaěng. Kụ piạ u pẹ̌tahạ mahasụ, dingangu piạ l᷊ai pẹ̌tahạ l᷊imam pul᷊o su kataune pẹ̌sěngkamonaěng. 41Bọu ene Mawu Yesus něngal᷊ạ e borotẹ̌ limambaụ dingangu kinạ duambua ene, mase rimal᷊ingara sol᷊ong langị kụ nakitarimakasẹ su Mawu Ruata. Bọu ene, i Sie nangangompeng borotẹ̌ ene ringangu l᷊imanʼE kụ nionggọ e su manga muritʼE pakipahiạ su taumata l᷊awọ ene. Kụ kinạ duambua ene nipẹ̌papahiạ l᷊ai si sire kěbị. 42Tangu i sire nahungkaěngke sarang něngkal᷊aedẹ̌. 43Bọu ene lěmbeng kaěng e nịkakomol᷊u manga muritʼu Mawu Yesus – kal᷊awọe mapul᷊o dua su luwene napenẹ-penẹ. 44Kụ kal᷊awọu manga esẹ apan nahungkaěng borotẹ̌ e nạung piạu manga lima hiwu su kataune.

Mawu Yesus dụdal᷊eng su wowong akẹ

(Mat. 14:22-33; Yoh. 6:16-21)

45Bọu e Mawu Yesus měngkatewe rimolohʼu manga muritʼE nipẹ̌sakaeng piněngal᷊imona si Sie sol᷊ong Betsaida paị sěmběkan dano, arawe i Sie reng mạpakapul᷊ẹ u taumata lawọ e. 46Sarạeng bọu nẹ̌katạu taumata l᷊awọ e, Mawu Yesus simaka sol᷊ong bul᷊ude tadeạu mẹ̌kal᷊iomaneng. 47Ene nahěbi e, sakaengu manga muritʼE ene seng su tal᷊oaran dano, arawe Mawu Yesus e wẹ̌dang su rul᷊unge. 48I Sie nakasilọete si sire měngkate marasai mẹ̌děndalung sakaenge watụ u somahẹ̌. Ual᷊ingu ene, mangạe su wěllạu pukul᷊ẹ̌ tatěllu ringangu pukul᷊ẹ̌ ěnnung mal᷊ukadẹ̌, i Sie němatụ si sire kụ dimal᷊eng su wowong akẹ. Kụ i Sie měngkate rimal᷊eng mẹ̌sul᷊ungu lumiu si sire.#6:48: Lumiu si sire: arau sarung mẹ̌tatamba ringangu i sire. 49Kai sarạeng i sire nakasilo si Sie rụdal᷊eng su wowon akẹ e, ute i sire mạngiral᷊ingu i Sie kai himukudẹ̌, 50hakịu i sire němpẹ̌kiạ u katatakụ. U kai i sire kěbị e nakasilo si Sie kụ i sire něngkawintogẹ̌.

Kai Mawu Yesus e lighạ namisara si sire, ”Pakarěmmasẹ̌ko! Iạ e kai i Yesus. Abe kěngkatakụ!” 51Mase i Sie simakẹ e su sakaeng i sire, kụ anginge nal᷊ědạ e. Manga muritʼE mangkewen dimal᷊inaụ tawẹ sihinge. 52Karal᷊inaụ su piạ borotẹ̌ limambaụ e, wědang ta nakạpuko pangangimangi sire. Mawěhạ baugʼi sire makahěngang.

Mawu Yesus napakapian masasakị su Genesaret

(Mat. 14:34-36)

53Sarạeng narakị su sěmběkan dano e, i sire němal᷊ango su apengu Genesaret. 54Lěpase i sire natumpa wọu sakaenge, i sire nakakiral᷊a u narěntae kawe Mawu Yesus. 55Mase i sire měngkatewe nẹ̌tatal᷊ang suapang kạguwạu weọe ene, kụ nanětạe nanondan masasakị su těpihẹ̌ sol᷊ong anum Mawu Yesus. Kereu i sire makaringihẹ̌ u Mawu Yesus kai ene su tampạ sěmbaụ, i sire tamai manondang masasakị sene. 56Balạewe Mawu Yesus měnsang – su weọ e sude su kampong, su soane arau su wawurasenge – sene i sire mang duměnta maměllọu masasakịe su tal᷊uahe. Mase i sire měmpẹ̌dorong tadeạu masasakịe rembeng ipakawala měmpanenggehẹ̌ kakingkaenge manịeng tumbạu humbune. Kěbị apan němpanenggehẹ̌ e, něngkapia.

Currently Selected:

MARKUS 6: SXN

Highlight

Copy