MIKHA 3

I Mikha rụdokạ manga těmbonangu Israel

1Pẹ̌daringihẹ̌ko, ei kamene apang měngangawasa Israel! I kamene hinong masingkạ u apang kụ adilẹ̌, 2kai i kamene mal᷊ạbe mạběnsing u apang mapia e, ringangu mal᷊uasu apan dal᷊akisẹ̌ e. Bansaku e wěběnikang i kamene e wiahẹ̌, mase lunsiringko ghěsine wọu manga ruhine. 3I kamene mạhungkinạ bansaku. Pisine pěgẹ̌gaghehẹ i kamene mase ruhine pěpẹ̌pohang i kamene. I kamene mẹ̌děnduru si sire kere něndaruru ghěsing binatang kụ isowa su ral᷊ungu kuring. 4Sarung midatingu tempone i kamene mẹ̌kẹ̌kiạ u makitul᷊ung su Mawu, kaiso i Sie tawe mapulu sumimbang. I Sie sarung tawe rumaringihẹ̌ manga kakal᷊iomanengu ual᷊ingu i kamene seng nẹ̌koạ dal᷊akisẹ̌.

5Bansaku niakal᷊engu manga nabi kụ měnẹ̌něbal᷊u apang mapia su taumata kụ mạngonggọu roitẹ̌, katewe kawe rụdokạ dingangu tawe měndarekengu apan tawe mẹ̌gaghěllị. Baugu manga nabi kerene ute, Mawu e něhengetang, 6”Ei manga nabi, temponu e seng maraning mapaghohẹ̌; matangěllonu e seng kakạsědạ e. I kamene sen tawe lai sarung makahombang papasilo kụ mělahẹ u manga karaki-Ku. I kamene selain tawe makatěbal᷊u manga apa.” 7Taumata kụ měnẹ̌něbal᷊u ěllo ramahi e sarung makahombang mea ual᷊ingu pěnaněbal᷊e tawe nakahino. I sire kěbị e seng kinailangengu ghatin sire ual᷊ingu Mawu Ruata e sen tawe simimbahẹ̌ si sire.

8Arawe mạanung batangengku ini e, Mawu e seng napal᷊ohon rohkẹ̌ʼE si siạ dingangu kawasa-Ne. Iạ e nighěllirangʼE katatahuěnna su hal᷊ẹ̌ u kạadilẹ̌, dingangu l᷊ai kawawahani waugu pělahekang su tau Israel, kal᷊awọu rosa nạung seng nịkakoạe. 9Pẹ̌daringihẹ̌ko kal᷊awọu waweraku ini, e i kamene měngangawasa Israel kụ měbẹ̌binsị u kạadilẹ̌ dingangu měngẹ̌ngal᷊intuing katul᷊idẹ̌ e. 10I kamene němangung Yerusalem, soan Duata, ual᷊ingu kawe pěmamate ringangu tawẹ kạadile. 11Měngangawasa soa e mẹ̌pẹ̌parenta waugu makareạ doitẹ̌ sasorokẹ̌, manga imang měmpaněntiro toratʼu Mawu e mědeạu makaěbạ tatendenge, ringangu manga nabi e mẹ̌dẹ̌dorong těntiro wọu Ruata waugu makaěbạ doitẹ̌ – mase i sire kěbị e mạngěnna u Mawu e kawe su sěmběkan sire. I sire nẹ̌bera, ”Mawu e ene sutal᷊oarang kitẹ, i kitẹ e tawe sarung kahombangengu silakạ masaria.”

12 # Yer. 26:18 Ual᷊ingu karal᷊akisu ene, Sion sarung bungkalangeng kere pẹ̌sasuangeng. Yerusalem sarung makoạ niěndukangu apang korọ e, dingangu wongkong Bal᷊em Mawu e sarung makoạ kěhu mal᷊oang.

Currently Selected:

MIKHA 3: SXN

Highlight

Copy