MIKHA 1

1 # 2Rat. 15:32-38, 16:1-20, 18:1–20:21; 2Kar. 27:1, 28:1–32:33 I Mikha e asal᷊e wọu soa kadodọ sěmbaụ arenge Moresyet. Su tempong banuang Yehuda e pẹ̌parentaěng u ratu mẹ̌tẹ̌tatuhụ, i Yotam, i Ahas dingangu i Hizkia, i Mikha e rimaẹ tatanatang Mawu mạanun Samaria ringangu Yerusalem.

Dal᷊umpasiang baugu Samaria ringangu Yerusalem

2Daringihẹ̌ko, ei manga wansa!

Tatingangko, ei patikụ tumanạ u kasěllahu dunia.

Mawu e Limembong Karangetange riměnta

kere sahidi rumokạ si kamene kěbị!

Daringihẹ̌ baweranʼE

bọu Wal᷊enʼE kụ susi e su sorga.

3I Sie limintụ bọu kal᷊aianengʼE kụ susi

ringangu rụdal᷊eng su wowom manga pusigu wul᷊ude su dunia.

4Manga wul᷊ude natuno su al᷊ungu pal᷊edʼE

kere liling su ral᷊ungu putung kụ dụděllị;

ěntanane natěnehẹ̌ nawunsal᷊ẹ̌ su manga wal᷊ane,

kere akẹ su wowong bul᷊ude lụelehẹ̌ tanaẹ.

5Kěbị ene sarung mariadi ual᷊ingu tau Israel němpẹ̌dosa ringangu nẹ̌pahuwungkadẹ̌ su těngon Duata. Kai i sai tangú nakawodaị Israel nẹ̌baradosa? Kai wal᷊inewe niupunangu soane hala Samaria e tangu? I sai nakawodaị Yehuda e naněmba mahang duata e tangu? Bal᷊inewe Yerusalem hala ngae? 6Ual᷊ingu ene Mawu e něhengetang, ”Iạ e sarung mapakariading Samaria e niěndukang u manga gholange su wal᷊ane, ringangu tampạ u taumata mẹ̌suang anggorẹ̌. Manga opehu soa ene sarung Takụ děmekang sol᷊ong dal᷊ungu wal᷊ane, ringangu manga pinẹ̌bukuange Takụ těnehang. 7Manga tul᷊adane mal᷊aarěga e sarung Takụ goghaheng, dingangu měnsang apạe Takụ gělikang su manga wawine apang mělẹ̌hal᷊ẹ̌ su pangkunange sarung tutungang, dingangu kal᷊awọu tul᷊adane sarung ipakawinasa. Sabarangkewe tamai ene e ute kai letạu pẹ̌kakal᷊iomanengange su mahang duatang tawang ěntana. Kụ orasẹ̌ ini e kěbị e sarung hengketangu manga sědụ e waugu sasěmba tatarimakasẹ su manga mahang duatan sire e.”

8Ual᷊ingu ene iạ, i Mikha e, masusa su naung, dingangu kụkěndung. Iạ e sarung dumal᷊eng těntol᷊e ringangu tawẹ sapatune mělẹ̌lahẹu enẹ e kasusane naungku e. Iạ e sarung huměbu kere asung kěhu ringangu humuang kere manụ onta. 9Batụu manga lesẹ u Samaria e tawe ipakaul᷊e kapia, ringangu Yehuda e sarung kahombangengu kakakoạu pẹ̌bawiahe mẹ̌sul᷊ung. Hombang masaria e seng nịdating sarang Yerusalem, tukadu pasěllangengu wanua pinamitingang puidu wansaku e.

Sekẹ e seng maraning mahumpạ su Yerusalem

10Kumbahang měhabarẹ̌ su manga sekẹ i kitẹ e su Gat mạanung kawawihua si kitẹ e; kumbahangbe ipakawala i sire e makasilo si kamene sumangị. Ei tumanạ u Bet-Le-Afra,#1:10: Bet-Le-Afra: Nabi Mikha mẹ̌bẹ̌bisara mạanung manga soa mạngělikụ Yerusalem (ayetẹ̌ 10-14) kụ nal᷊ahẹ u sarung aloěng kakal᷊imonaěnge kụ sekẹ e ren tawe nẹ̌ngalo Yerusalem. pẹ̌těngkal᷊usị e su awul᷊ẹ̌ tatialang napěndụ. 11I kamene tumanạ u Safir, pẹ̌buạ e sol᷊ong pinamembangeng e těntol᷊e ringangu pěndangu piạ meane! Tau Zaanan tawe wahani suměbang bọu soang sire. Sasiking tumanạ u Bet-Haezel měnẹ̌nodẹ si kamene u paị sene selain tawẹ apa pẹ̌kakěllungang. 12Hombang masaria wọu Mawu e seng nahumpạ su těngon tukadu pasěllangeng u Yerusalem! Ual᷊ingu ene, tawe mariadi tau Marot mělẹ̌harapẹ̌ tul᷊umang. 13I kamene tumanạu Lakhis, pěnakẹkong kawal᷊o su karetan sekẹ! I kamene mẹ̌těno manga rosa kụ nikoạ su Israel hakịu nakariadi Yerusalem mal᷊aing nẹ̌dosa. 14Ini e, ei tau Yehuda i kamene sarung kailangengu soang Moresyet-Gat. Manga ratung Israel sarung tawe makaěbạ lai tatongka wọu soang Akhzib.

15Ei tau Maresya, Mawu e sarung měnarakang i kamene su sědụ kụ sarung měmul᷊aho soanu. Manga těmbonangu Israel kụ kawasa e sarung mẹ̌kěmbuni su ral᷊ungu manga liange su Adulam. 16Ei tau Yehuda, potọko utạu e pakakoạ tatialang mělutu waugu manga anạu kụ ikẹ̌kěndagʼi kamene. Kul᷊ụko těmbọu sarang mal᷊ungguhẹ̌ kere manụ u winalangeng kụkinạ kasuang, u manga anạu e sarung hengketang sol᷊ong piněmembangeng.

Currently Selected:

MIKHA 1: SXN

Highlight

Copy