MATIUS 22
22
Papinintun sal᷊iwang u pẹ̌kakawing
(Luk. 14:15-24)
1Kutẹu Mawu Yesus saụewe něhengetang su taumata l᷊awọ dingangu papinintu, 2angkuěnge, ”Pẹ̌paparenta Mawu Ruata e, kakakoạe kai mẹ̌sul᷊ungu papinintu: Sěngkatau ratu namangung sal᷊iwang u pẹ̌kakawing baugʼu ahuse esẹ. 3Datu ene rimolohen manga ěllange tamai pạněnsomahẹ̌ taumata apan nihabareng su sal᷊iwang ene. Kutẹu apạewen nihabarenge kai něngkadiri riměnta. 4Nẹ̌saụ kapia ratu e rimolohʼu manga ěllange wal᷊ine. Tatanatane si sire: ’Pěmpěhabarẹ̌ko si sai-saing kewe ninotẹ̌ e: Kaěngu sal᷊iwange seng nasadia. Sapi, ringangu manga anạ u sapi ku karal᷊ěnggihange seng pinotọ. Kěbịe seng nauadipẹ̌. Sal᷊amate mahunděnta su sal᷊iwang u kawing!’ 5Kutẹu kal᷊awọu sake apan ninotẹ̌ e tawe němpẹ̌sěmpị. I sire nasịdal᷊engu ral᷊enge sol᷊ong pěmamunaraěnge – sěngkatau sol᷊ong baelẹ̌, sěnggạe wue ute nẹ̌deạ pẹ̌bawal᷊ukange; 6arawe sěnggạete wue kawe němpěhěgo manga ěllang u ratu e, mase němpěndariha ringangu němpamate si sire. 7Sarạeng datu e nakaringihẹ̌ hal᷊ẹ̌ ene, i sie měngkatewe limangehẹ̌. I sie rimoloheng buntuangu mẹ̌sasekẹ e mědeạu pěmate manga tahapate ene, ringangu niapanutung soan sire. 8Bọu e i sie kimui manga ěllange mase něhengetang, ’Sal᷊imbang u kawinge semben sadia, kai apan ninotẹ̌ e tawe hinone nạung. 9Dakọko luhu e apan dal᷊eng gaghaghuwạe kụ notẹ̌ko kal᷊awọewen taumata sol᷊ong sal᷊iwang u kawing ini.’ 10Tangu manga ěllange nahundal᷊engke. I sire nahundal᷊eng suapạewen dal᷊eng gaghaghuwạe kụ němpěnampungu kěbị taumata apạewen kinaẹ̌bakeng i sire sene bae mapapia, bae raral᷊aị. Tangu napenẹ e tampạu pẹ̌sasal᷊imbangenge kahian sake.
11Bọu e ratu ene simuẹ̌ kimakělla manga sake. I sie nakasilo kai piạ sěngkatau su sal᷊imbang ene tawe něluhen pakeangu sal᷊imbang. 12Bọu ene i sie nakiwal᷊o su tau ene, ’Hapị, kawe nakakasuẹ̌ kereapa i kau sarang ini kụ kawe tawe něluhen pakeangu sal᷊imbang e?’ Tau e tawe nakawerang apa-apa. 13#Mat. 8:12, 25:30; Luk. 13:28 Tangu ratu e něhengetangke su manga ěllange, ’Hapusẹ̌ko laede ringangu l᷊imane, kụ bahungko i sie sol᷊ong l᷊ikude su tampạ marěndung. Sene sarung piạ sasangị dingangu kasasigěsạ.’ ”
14Mase Mawu Yesus nangěnsuen papinintu e kere ini, ”Lawọ bue kinakuiange, kai tangu kawe mahal᷊i kinapile.”
Hal᷊ẹ̌ u pěmamaehẹ̌ pajakẹ̌
(Mrk. 12:13-17; Luk. 20:20-26)
15Tangu manga tau Farisi e němpẹ̌sohọe kụ němpẹ̌dal᷊ahintau měnsang kereapa i sire makapěngal᷊ạ bera si Yesus e ringangu manga kakiwal᷊o. 16Tangu i sire rimoloheng manga muritʼi sire sol᷊ong anung Yesus, ringangkewen pirang katau taumatang Herodes. I sire němpẹ̌berạe si Yesus, ”Tuang Guru, i kami masingkạu i Tuang kai matul᷊idẹ̌. I Tuang mạněntirowe su katěngadẹ̌ mạanun kapulun Duata waugʼu taumata, tawe mẹ̌sasasěmpịbe tiněnnan sai-sai. U i Tuang e tawe měmamile ghatin taumata. 17Ual᷊ingu ene ute, kěnang i Tuang pẹ̌bera si kami: Kereu tumuhụ atorangu agamang kitẹ, botonge měmaehẹ̌ pajakẹ̌ su Kaisarẹ̌ arau tawe wotonge?”
18Mawu Yesus masingkạ tiněnnan sire ral᷊akị ene, kụ i Sie něhengetang, ”E, i kamene taumata mẹ̌mělle! Unụe i kamene měmpanal᷊ukạ Siạ? 19Todẹko si Siạ gahịu roitẹ̌ ipẹ̌pakẹ i kamene mědeạu pěmaehẹ̌ pajakẹ̌!”
Mase i sire nangonggọu roitẹ̌ sal᷊aka sěngkal᷊ěpa si Sie. 20Kutẹu Mawu Yesus nakiwal᷊ọe si sire, ”Kai ghahị i sai ringangu areng i sai ini e?”
21”Kaisarẹ̌,” angkuěng i sire.
Tangu Mawu Yesus něhengetangke si sire, ”Kamageng kerene ute, onggọe su Kaisarẹ̌ apan tẹ̌taghuanengʼu Kaisarẹ̌ dingangu su Ruata apan tẹ̌taghuanengʼu Ruata.”
22Sarạeng i sire nakaringihẹ̌ pěndal᷊ahẹ ene, i sire naral᷊ingu. Kụ i sire němpaněntang i Yesus.
Hal᷊ẹ̌ u pẹ̌bawangung bọu papate
(Mrk. 12:18-27; Luk. 20:27-40)
23 #
MMR. 23:8
Su ěllo ene lai, piạ e tau Saduki pirang katau nahunděnta su anung Yesus. I sire kai taumata nạung měmpẹ̌bẹ̌bera u taumata nate e seng tawe sarung mẹ̌bangung kapia. 24#Pang. 25:5 ”Tuang Guru,” angkuěng i sire, ”I Musa e naněntiro kere ini: Kereu sěngkatau esẹ e mate, kụ tạ anạe ute anạ u sěngkataune harusẹ̌ pẹ̌kawing dingangu wal᷊une tadeạu mapal᷊ěton hite waugʼu tau ěndaị seng nate e. 25Nạung piạ i sire pitu tamahuari kụ němpẹ̌tanạ sini. Ene kaiakanenge nẹ̌kawing kụ bọu ene nate tawẹ anạe. Tangu wal᷊une nitěntang baugʼu anạ u sěngkataune. 26Bọu e tuarine mal᷊aing nate tawẹ anạe. Hal᷊ẹ̌ kerene mal᷊aing himombang su tuarine katěllune nakahakịewen lai kapitune. 27Kasamuriange ute wawine ene hala e mal᷊aing nate. 28Kụ su tempon taumata nate e ipẹ̌bangung kapia e ute, kawingken sai tau wawine e? U nạung i sire pitu e seng bọu pinẹ̌kawingange.”
29Mawu Yesus ute simimbangke, ”I kamene mambeng nẹ̌sal᷊a, u i kamene tawe nakaěnna Winohẹ Susi, kerene lai kawasan Duata. 30Batụ u kamạgeng taumata nate e sarung mẹ̌bangung kapia ute i sire semben tawe mẹ̌kawing kaiso i sire sarung mẹ̌biahẹ̌ kere malạekatẹ̌ su sorga e. 31Kai wědang ta nakạbasa i kamene apa hengetangu Mawu Ruata mạanun taumata nate nipẹ̌bangung kapia? Mawu Ruata e něhengetang, 32#Sas. 3:6 ’Iạ e kai Ruatang Abraham, Duatang Ishak dingangu Ruatang Yakub.’ Mawu Ruata e tangu wal᷊inewe Ruatan taumata nate. I Sie kai Ruatan taumata wiahẹ̌!”
33Sarạeng taumata l᷊awọ ene nakaringihẹ̌ tatualagʼi Yesus, i sire měngkatewe němpẹ̌dal᷊inaụ u těntironʼE.
Tita kahumotongang e
(Mrk. 12:28-34; Luk. 10:25-28)
34Ene sarạeng tau Farisi e nakaringihẹ̌ u i Yesus kai seng nakapẹ̌kěmming mohongu tau Saduki e, kụ i sire kai němpẹ̌tampung. 35#Luk. 10:25-28 Sěngkatau wọʼi sire, kai sěngkatau mananěntiro agama, kai měnangkạ si Yesus kụ mangal᷊ạ bera ringangu kakiwal᷊o sěmbua. 36”Tuang Guru,” angkuěnge, ”kai tita sude kahumotongange su ral᷊ungu atorang u agama?”
37 #
Pang. 6:5
Mawu Yesus simimbang, ”Kěndagʼu Mawu Ruatanu ringangu kạguwạu naungu, ringangu kaguwạu himukudʼu, ringangu kạguwạu l᷊aěnnanu. 38Kai ene tita kahumotongange ringangu kạguwakenge! 39#Imng. 19:18 Tita karuane ute mẹ̌sul᷊ung dingangu humotonge ute kai: Kěndagʼu sěndinganengu kerẹewe i kau kuměndagu watangengu. 40Patikụ tita kụ nionggọ i Musa ringangkewen těntiro manga nabi e niapakaiang su tita rarua ene.”
Mạanun Datu Mananal᷊amatẹ̌
(Mrk. 12:35-37; Luk. 20:41-44)
41Kutẹu tau Farisi e nạung deng mạtatampung sene, Mawu Yesus nakiwal᷊ọe si sire, 42”Kerea su tiněnnang kamene mạanun Datu Mananal᷊amatẹ̌? Kai hěnton sai tangu i Sie?”
”Hěnton Daud,” sasimbahʼi sire.
43”Mạeng kerene,” angkuěng i Yesus, ”kawe unụe tangu hakịu Rohkẹ̌ u Ruata e měkẹ̌karadiahang si Daud kụ mẹ̌sẹ̌sěbạu Ratu Mananal᷊amatẹ̌ e ’Mawu’? U i Daud nẹ̌bera,
44 #
Mzm. 110:1
’Mawu e něhengetang su Mawuku:
kaiangko su koaneng-Ku,#22:44: Kaiangko su koaneng-Ku: Tumuhụ tundun tau Yahudi; apang lẹ̌adateng dingangu lẹ̌onggotang u kawasa maiang su sěmběka koaneng.
sarang Iạ mẹ̌koạ manga rumarokạu e sumasuměllung si Kau.’
45Kutẹu kereu i Daud měsěbạu Ratu Mananal᷊amatẹ̌ e kai ’Mawu’, ute kereapa wue i Sie hěnton Daud?”
46Tawẹu sarang sěngkatau nakakasimbahẹ̌ si Yesus. Kụ nanětạ bọu ěllo ene tawẹu wahani makiwal᷊o manga apa l᷊ai si Sie.
Currently Selected:
MATIUS 22: SXN
Highlight
Share
Copy
Want to have your highlights saved across all your devices? Sign up or sign in
