MATIUS 20
20
Papinintu mělahěnsinuangu anggorẹ̌
1”Kamageng u Ruata e mẹ̌parenta ute kakakoạe kai mẹ̌sul᷊ungu papinintu ini: Sěngkatau taghuangu waelʼu anggorẹ̌ e siměbang dokeng mal᷊ukadẹ̌ mědẹ̌deạ taumata waugʼu pěmunara su waelʼu anggorẹ̌ e. 2Sarạeng i sie kimirẹ e měmaehʼu roitẹ̌ sal᷊aka sěngkal᷊ěpa sahěllo si sire, i sie rimolohen sire pěmẹ̌munara su wawaelangu anggorẹ̌ e. 3Pukul᷊ẹ̌ sio mal᷊ukadẹ̌, taghuangu waelẹ̌ e rimal᷊eng kạpia, kụ nakasilọe pirang katau lụl᷊iongahẹ̌ tawẹ hal᷊ẹ̌ e su pasarẹ̌. 4Tangu něbera i sie si sire, ’Dakọe i kamene pěmunara su waelʼu anggorẹ̌ku. Iạ sarungbe mamaehẹ̌ si kamene ringangu wawaehe mẹ̌tatal᷊ahino.’ 5Tangu i sire němpẹ̌tamaịe. Pukul᷊ẹ̌ mapul᷊o dua ěllo mal᷊ětu ringangu pukul᷊ẹ̌ tatěllu wawěllo, taghuangu waelẹ̌ ene saụewe rimal᷊eng, kụ nẹ̌koạ hal᷊ẹ̌ mẹ̌sul᷊ung. 6Kụ mangạe pukul᷊ẹ̌ lima wawěllo, i sie saụewe simẹ̌bang kụ nakasilo lai piạ taumata lụl᷊iongahẹ̌ tawẹ hal᷊ẹ̌ e. Mase i sie nakiwal᷊o si sire, ’Unụe i kamene měngkai mạhundarisị sahěllo tiwatu ěndaị sini kụ tawe němpẹ̌koạ apa-apa?’ 7I sire němpẹ̌simbang, ’Tawẹ taumata mapěhal᷊ẹ̌ i kami.’ Angkuěngu taghuangu waelẹ̌ e, ’Mạeng kerene ute, rakọko i kamene pěmunara su waelʼu anggorẹ̌ku.’
8 #
Imng. 19:13; Pang. 24:15 Nawawěllọe, taghuangu waelʼu anggorẹ̌ e nẹ̌berạe su sawohịe, ’Kuịe manga měmamunara ene kụ baehẹ e sewan sire sěngkatau-sěngkatau, něnětạ bọu i sain simuẹ̌ pěngěnsueěnge sarang i sain simuẹ̌ kahumotongange.’
9Mase nahunděntạe měmpělahal᷊ẹ̌ apan nanětạ bọu pukul᷊ẹ̌ lima wawěllo. I sire němpanarimạ u roitẹ̌ sal᷊aka nahuntiạ u pẹ̌sěngkal᷊ěpa. 10Bọu ene nahunděntạe lai měmamunara apang bẹ̌baehang nanětạ dokeng mal᷊ukadẹ̌. I sire měmpạngěnnau reng makatarimạ nangělembo. Sěmbal᷊iau i sire kětạeng nighělikangu l᷊ai roitẹ̌ sal᷊aka pẹ̌sěngkal᷊ěpa. 11Piạ e měnẹ̌narimạ doitẹ̌ ene, i sire měmpẹ̌sẹ̌simbul᷊ung su taghuangu waelẹ̌ e: 12’Manga apan měmpamunara apang kụ diměnta samuri ene kětạeng nempẹ̌halẹ̌ sěngkaorasẹ̌. Arawe i kami kawe mẹ̌munara ghěnangu pẹ̌sahěllo, su tětị u pědisẹ̌, kaiso i Tuang kawe namaehẹ̌ si sire mẹ̌sul᷊ungu si kami!’ 13Taghuangu waelʼu anggorẹ̌ e simimbahẹ̌ su sěngkatau wọʼi sire, ’E hapị, iạ e tawe něsal᷊a si kau. Bal᷊inewe i kau napulu waehang pẹ̌sěngkal᷊ěpa waugʼu pěmamunaranu sěhěllo? 14Kụ, al᷊ạ e bawaehe dingangu kapul᷊ẹ e. Iạ e mang mapulu měgěllị bawaehe su tau simuẹ̌ samuri mẹ̌sul᷊ung dingangu takụ nighěllikang si kau. 15Kai tawe wotonge iạ mẹ̌batụ kapuluku su rarotongku e? Arau kai sumingking i kau, puhinengu iạ kawe matal᷊ěntụe?’ ”
16 #
Mat. 19:30; Mrk. 10:31; Luk. 13:30 Mase Mawu Yesus nẹ̌berạe lai, ”Mal᷊aing kerene taumata apang kasamuriange sarung makoạ kal᷊ahumotongange, ringangu taumata apang kal᷊ahumotongange sarung makoạ kasamuriange.”
Katěllun sul᷊ene Mawu Yesus mạul᷊ị u kapapohongʼE
(Mrk. 10:32-34; Luk. 18:31-34)
17Piạ e i Yesus makoạ sarang Yerusalem, ene su tal᷊oaran dal᷊eng i Sie kai namaringang muritʼE mapul᷊o dua nẹ̌komol᷊ẹ̌ i sire hala. Bọu e i Sie něhengetang si sire, 18”Pẹ̌daringihẹ̌ko! I kitẹ ini mětẹ̌timona Yerusalem. Pai sene Ahusʼu Taumata e sarung isarakang su manga imang těmbonange ringangu manga mananěntirong agama. Mase i Sie sarung ihukung pateěng, 19bọu e isarakang su wal᷊ine taumatang Yahudi. I sire sarung měmpẹ̌taghunalang i Sie, manigěsạ si Sie, dingangu měnguruisʼi Sie. Kai su katěllu ěllone, i Sie sarung iapẹ̌bangung kapia.”
Dorong i ninang i Yakobus dẹ̌duan Yohanes
(Mrk. 10:35-45)
20Bọu e kawing i Zebedeus diměnta ringangu manga anạe su anung Yesus. Su těngom Mawu Yesus i sie nẹ̌suba waụgu piạ dẹ̌dorongange.
21”I ninang kai mapulung a?” angkuěngu Mawu Yesus.
I ninang ene simimbang, ”Iạ kai mapulu tadeạu anạku rarua ini pakaiang su kaihi ringangu su koaneng i Tuang kereu i Tuang makoạ Datu.”
22”I kamene wẹ̌gaweng apa rẹ̌dorongang i kamene,” angkuěng i Yesus si sire. ”I kamene makainung bue wọu panganginumangu kasasigěsạ-Ku kụ hinon takụ inungang?”
”Botonge,” angkuěng i sire.
23Mawu Yesus něhengetang, ”Těngadẹ̌ i kamene sarungbe manginung lai wọu panganginumang-Ku. Arawe mạanun i sai sarung kumaiang su kaihiʼU ringangu su koaneng-Ku, ene wal᷊inewe Iạ mananilakehe. Manga tampạ ene kai waugʼu taumata apan seng nitilakehʼi Amang-Ku.”
24Tangu sarang i sire manga muritẹ̌ mapul᷊ongkatau wal᷊ine nakaringihẹ̌ hal᷊ẹ̌ ene, i sire kai limangehẹ̌ si rẹ̌dua tahatuari ene. 25#Luk. 22:25-26 Batụ u ene ute Mawu Yesus kimuịe si sire kěbị kụ něhengetang, ”I kamene masingkạu manga těmbonang u bansa kụ tawe makakiral᷊a Ruata e, manigěsạ kawanuane. Dingangu kasasěllaheng i sire měmpanědạ si sire. 26#Mat. 23:11; Mrk. 9:35; Luk. 22:26 Arawe i kamene e tawe wotonge kerene. Su sěmběkane, i saing kụ mapulu mẹ̌těngkasěllahẹ̌ su tal᷊oarang kamene, hinong makoạ mẹ̌tatangkiang si kamene.
27Dingangu i sai mapulu makoạ kahumotongange su tal᷊oarang kamene, hinom makoạ ěllang i kamene. 28Kerẹewe lai Ahusʼu Taumata e; i Sie riměnta wal᷊inewe waugʼu makitangkiang, kaiso kawe mědeạu mẹ̌tangkiang, dingangu mangonggọu niawane mědeạu ipěliwirẹ̌ taumata l᷊awọ.”
Mawu Yesus napakakěllạen taumata wuta ruang katau
(Mrk. 10:46-52; Luk. 18:35-43)
29Tangu piạ i sire nahunsẹ̌bangke wọu Yerikho, lawọ taumata timol᷊e si Yesus. 30Kutẹu kai piạ tau wuta ruang katau mạhungkaiang su wiwihʼu ral᷊eng. Sarang i sire nakaringihẹ̌ u i Yesus kai sụsahe ute i rẹ̌dua němpẹ̌kuịe, ”Ahusʼi Daud, tal᷊ěntụkong kami!”
31Taumata l᷊awọ apang ene sene němpěhěkadẹ̌ si rẹ̌dua e kụ měsẹ̌sěding i rẹ̌dua e apakạděmmasẹ̌. Kaiso i rẹ̌dua e nakapiang pěmamansage něngalembong kaihạe lai, ”Tuang, Ahusʼi Daud, tal᷊ěntụkong kami!”
32Mase Mawu Yesus e timaingke kụ kimui si rẹ̌dua. ”I rua e mapulu takụ kapuraneng?” kakiwal᷊ong Yesus.
33I rẹ̌dua e němpẹ̌simbang, ”Tuang, i kami e mapulu makasilo!”
34Mawu Yesus e timal᷊ěntụen dẹ̌dua e, kụ bọu nanenggehẹ̌ matan dẹ̌dua. Kụ su orasẹ̌ ene lai i sire nakasilo. Bọu e i rẹ̌dua e němpẹ̌tol᷊e si Yesus.
Currently Selected:
MATIUS 20: SXN
Highlight
Share
Copy
Want to have your highlights saved across all your devices? Sign up or sign in
