MATIUS 14

Papateng Yohanes Mananahani

(Mrk. 6:14-29; Luk. 9:7-9)

1Su tempo ene i Herodes datung Galilea e nakaringihẹ̌ teleng u mạanun Mawu Yesus. 2Kụ i Herodes e nẹ̌berạe su manga ěllange, ”Nal᷊ahẹ u ini mang i Yohanes Mananahani e nẹ̌bangung bọu tal᷊oaran taumata nate! Kụ kai ene hakịu i Sie makapẹ̌koạ hal᷊ẹ̌ makạdal᷊inaụ.”

3 # Luk. 3:19-20 Batụ u kal᷊amonang ene i Herodes kai seng bọu nakisamẹ i Yohanes mase nipakihapusẹ̌ bọu e nipakitahungkụ. I Herodes nẹ̌koạ kerene kai ual᷊ingu kakakoạ i Herodias, kawingu tuarine sẹ̌sane i Filipus. 4#Imng. 18:16, 20:21 U nạung i Yohanes kai wọu nẹ̌bera kere ini si Herodes, ”Kumbahang i kau mẹ̌kawing dingang i Herodias!” 5Kutẹu nạung kapulung Herodes e kai měmate si Yohanes, kaiso i sie mạtakụ u taumata l᷊awọe, baugʼu taumata l᷊awọe mạngiral᷊ingu i Yohanes e kai nabi.

6Su tempọeng i Herodes měsẹ̌sal᷊iwangkeng ěllong kinariadiange, anạ i Herodias mahuala e nẹ̌sal᷊ai su těngong l᷊awọ. Pẹ̌sasal᷊aine měngkate makạl᷊uasẹ̌ naung i Herodes, 7hakịu i Herodes nẹ̌kědo si sie ringangu kạsalune balạewe apan dorongange, sarung onggotang si sie.

8Ual᷊ingu niwurungangken ninange ute mahuala ene nẹ̌bera, ”Iạ mẹ̌dorong těmbọ i Yohanes Mananahani e onggọ si siạ orasẹ̌ ini e lai kụ taho su baki!”

9Nakaringihẹ̌ dorong ene, i Herodes e měngkate nasusa-susa naunge. Kai ual᷊ingu i sie seng nẹ̌salu su těngong kal᷊awọu sakene, i sie nẹ̌parenta tadeạu rorongu mahuala ene pakịtuhuke. 10I sie rimolohʼu taumata apakakoạ sarang tahungkụe mědeạu iapamotọ těmbọ i Yohanes. 11Bọu e těmbọ i Yohanes e nisuẹ̌ mạtatal᷊endeng su wowom baki kụ nionggọ su mahuala ene. Mase mahuala ene naněpase lai sarang anun ninange. 12Bọu ene manga muritʼi Yohanes e nahunděntạe němpěngal᷊ạ bạdang i Yohanes kụ nịdal᷊ěbing. Bọu e i sire nahunděntạe němpẹ̌habarʼu ene si Yesus.

Mawu Yesus napakaěngu l᷊ima hiwu su kataune

(Mrk. 6:30-44; Luk. 9:10-17; Yoh. 6:1-14)

13Piạ i Yesus nakaringihẹ̌ habarẹ̌ e, i Sie simake sakaeng sẹ̌sane kụ nangal᷊ing bọu ene nẹ̌těngkahae. Kutẹu hal᷊ẹ̌ ene kinaringihen taumata ute, i sire němpaněntangkeng manga soan sire kụ timol᷊e si Yesus, nahul᷊ěngang. 14Ene Mawu Yesus natumpạe wọu sakaeng kụ nakasilo taumata l᷊awọe, i Sie timal᷊ěntụen sire. Mase i Sie napakapiạen taumata masasakịe su tal᷊oaran sire.

15Sěngkawawěllone, manga muritʼi Yesus e himaungke kụ němpẹ̌bera si Sie, ”Ěndaung seng bawěllo kutẹu tampạ ini e maghea. Mapiawe i Tuang pěndolohen sire ini aparal᷊eng, tadeạu makapamělliwe kaěng su manga apang kampong.”

16”Ta wahal᷊uasu i sire tamai,” ungkuěng i Yesus, ”i kamene e pakaěng i sire.”

17”I kami e kětạewen mạnaghuang borotẹ̌ limambaụ dingangu kinạ duambua!” Ungkuěngu manga muritʼi Yesus e.

18”Ěntude ramahi,” ungkuěng i Yesus. 19Bọu ene i Sie napakaiangu taumata l᷊awọe su rěmpugẹ̌. Bọu e i Sie nangal᷊ạe borotẹ̌ l᷊imam baụ dingangu kinạ duambua, mase rimal᷊ingara sol᷊ong langị, dingangu nakitarimakasẹ su Mawu Ruata. Bọu ene i Sie nangangompeng borotẹ̌ e ringangu l᷊imane kụ něgěllịe su manga muritʼE pakịbal᷊awuhẹ̌ su taumata l᷊awọe. 20I sire kěbịe nahungkaěngke sarang něngkal᷊aedẹ̌. Bọu e manga muritʼE němpangomol᷊ẹ̌ lěmbeng kaěnge, mapul᷊o dua su luwene napenẹ. 21Apan němpẹ̌kaěng su tempo ene ute mangawe lima hiwu su kataune, ta narekeng manga wawine ringangu manga rariọ.

Mawu Yesus dụdal᷊eng su wowong akẹ

(Mrk. 6:45-52; Yoh. 6:16-21)

22Bọu e Mawu Yesus dimolohʼu manga muritʼE nipẹ̌sakaeng kụ piněngal᷊amona si Sie rumakị sarang sěmbẹ̌kan dano, těntal᷊ang i Sie reng mẹ̌děndolohʼu taumata l᷊awọ iapakạpul᷊ẹ e. 23Sarạeng taumata l᷊awọe napul᷊ẹ, Mawu Yesus simakạe su wul᷊ude, i Sie sẹ̌sane nẹ̌kal᷊iomaneng. Ene nahěbịe, kai Mawu Yesus e mang bẹ̌dang sene. 24Kutẹu sakaeng nisakeěngu manga muritʼi Yesus e, seng su l᷊oang u rano. Sakaenge mangkewen ipědẹ̌darerehʼu wělladẹ̌ e, u anginge kai ipẹ̌sẹ̌somahʼu sakaeng. 25Su wěllạ u pukul᷊ẹ̌ tatěllu ringangu pukul᷊ẹ̌ ěnnung mal᷊ukadẹ̌, Mawu Yesus himaung si sire, rụdal᷊engke su wowong akẹ e. 26Sarạeng manga muritẹ̌ nakasilo si Sie rụdal᷊eng su wowong akẹ tangu i sire měngkate apa himěkosẹ̌. ”Himukudẹ̌!” kakiạ i sire něngkatakụ.

27Arawe Mawu Yesus e měngkatewe lighạ simimbahẹ̌ si sire u, ”Pakal᷊enehẹ̌ko! Iạ e kai i Yesus, abe katakụ!”

28Mase i Petrus e nẹ̌berạe, ”Kereu Mawu e kawe i Yesus, ute aparal᷊engko iạ e sol᷊ong anunʼU su wowong akẹ.”

29”Děntạe,” ungkuěng i Yesus. Kụ i Petrus timumpạe wọu sakaeng, kạdal᷊enge su wowong akẹ e kụ makoạ sol᷊ong anung Yesus. 30Kutẹu piạ e i Petrus nakasilou kawe kaihạe anging su rano e, tangu natakụe i sie ringangu nanětạe kakạbul᷊use. ”Mawu ambangeko!” kakiạe.

31Ene i Yesus měngkatewe lighạ nangul᷊uhʼu l᷊imanʼE kụ něhěgo si sie, ringangu něhengetang, ”Petrus, Petrus, i kau e měngkai wědang gụgoẹ̌u Iạ?”

32Mase i rẹ̌dua e simakẹ e su sakaenge, kụ anginge lai nal᷊ědạe. 33Tangu manga muritʼi Yesus apan su sakaenge nasịhaungke kụ němpẹ̌suba si Sie. I sire němpẹ̌berau, ”Mamben těngadẹ̌ u. Mawu e kai Ahusʼu Ruata!”

Mawu Yesus napakapian taumata masasakị su Genesaret

(Mrk. 6:53-56)

34Ene piạ e i sire narakịe su sěmběkan dano, i sire timumpạe su Genesaret. 35Kutẹu sarạeng taumata sene nakasilo u kai i Yesus diměntae, tangu i sire měngkatewe napẹ̌kakekeng habarẹ̌ ene su kaguwạu wanua mạngělikụ soa ene. Mase kakěpal᷊ewem masasakị e niěntuden sire su anung Yesus. 36Kụ i sire němpẹ̌dorong si Sie tadeạu wotongke manenggehẹ̌ lakụe, manịeng kětạeng humbunʼE. Kụ kěbị apan nanenggehẹ̌ e napiạe.

Currently Selected:

MATIUS 14: SXN

Highlight

Copy