LUKAS 17
17
Haghin sạbarang makạkoạ taumata měmpẹ̌dosa
(Mat. 18:6-7, 21-22; Mrk. 9:42)
1Mawu Yesus něhengetang su manga muritʼE, ”Manga haghin sạbarang makoạ katatanggaěngu taumata měmpẹ̌dosa těngadẹ̌ sarung luměto. Arawe kaěngkěhang i sai makakoạ katatanggaěng! 2Mạpiangbe kereu watung gilimang nịlaikị su l᷊ehẹ e, mase i sie niwontol᷊ẹ̌ su l᷊audẹ̌, sul᷊ungu i sie makakariadin sěngkatau wọu manga rariọ tamai měmpẹ̌dosa. 3#Mat. 18:15 Ual᷊ingu ene pakapia wue!
Kereu anạ u sěmbaụ u mẹ̌sal᷊a, ute pẹ̌berai. Kụ kereu i sie mẹ̌sasěsilẹ̌ ute, ampunge wue i sie. 4Kereu i sie nẹ̌sal᷊a si kau pitun sul᷊e sahěllo kụ apan su sul᷊ene ruměnta su anunu kụ mẹ̌bera u, ’Iạ mẹ̌dorong ampung,’ ute ampunge wue i sie.”
Mạanun pangangimang
5Manga rasulẹ̌ němpẹ̌berạ e su Mawu Yesus, ”Mawu, toghaseko pangangimang i kami e.” 6Mawu simimbang, ”Kereu i kamene piạ pangangimang kere kaguwạu wakị u sasawi ute, i kamene makapẹ̌bera su kalu murbei ěndaị, ’Kaẹ̌bụko i kau kụ kasuangko su sasị,’ těngadẹ̌ kalu ene sarung tumuhụ si kamene.”
Hinong koateng sěngkatau ěllang
7”Kereu sěngkatau wọʼi kamene piạ ěllange mạmungkalang ěntana arau mělal᷊ukadẹ̌ domba. Kamageng ěllange masongo kụ i sie makawera wue ngae si sie, ’Mahịe lighạ e kaěng’? 8Mamben tala! Kasuenge i sie sarung mẹ̌bera si sie, ’Pěllọko kaěngku, Pěluhengkon pakeang burẹ̌si ringangu hapaiko iạ, těntal᷊ang deng kạkaěnge ringangu kạpěnginunge; bọu e i kau e wuhude kaěng.’ 9Ěllang ene tawahal᷊uasʼu raloěng ual᷊ingu seng timuhụ parentang mawune wẹ̌gang? 10Kerene lai i kamene. Kereu i kamene seng němpẹ̌koạ kal᷊awọu apạewen ipakịkoạ si kamene e ute, pěmpẹ̌berạe u, ’I kami ěllangbe wiasa; i kami kětạeweng mẹ̌koạ apang hinong koateng i kami.’ ”
Mawu Yesus napakapian mapul᷊ongkatau
11Suraral᷊engang sarang Yerusalem, i Yesus kai rimal᷊eng bọu wěllạ u Samaria ringangu Galilea. 12Piạ e simuẹ̌ su kampong sěmbaụ, i Sie nirěntaěngu mapul᷊ongkatau piạ sakịe su pisị, makạtatakụ.#17:12: Piạ sakịe su pisị, makạtatakụ: Kakělla pasalẹ̌ 5:12. I sire rụdarisị bọu maraune, 13kụ měmpẹ̌kẹ̌kui mal᷊aihạ, ”Mawu Yesus! Tal᷊ěntukong kami e!”
14 #
Imng. 14:1-32
Sarang i Yesus nakasilo si sire, i Sie něhengetang, ”Dakọe pěmpẹ̌těngkatodẹ su manga imang, pẹ̌dorong si sire pamarikẹ̌sa wadang i kamene.”
Kạpahundal᷊engete i sire něngkaul᷊ẹ e wọu sakị i sire.#17:14: Yesus piạ timonane mapakapian sire, ual᷊ingu ene i Sie něngoro si sire kakoạ sarang manga imang pakiparikěsa ringangu nipaul᷊ị u napia wọu sakịe. 15Kutẹu sěngkatau wọi sire nakapěndangu i sie seng napia ute, měngkatewe nẹ̌sul᷊e kapẹ̌daloneng tingihẹ̌ maihạ su Mawu Ruata e. 16Mase su těngon Yesus, i sie nẹ̌těngkasumagẹ̌ kụ makịtarimakasẹ e i Sie. Tau ene tangu kai tau Samaria. 17Bọu e i Yesus něhengetang, ”Karạ kawe mapul᷊ongkatau arau napia? Kụ kawe suapa ho i sire siong katau l᷊ai? 18Unụe kětạen tau raghị ěndai e nẹ̌sul᷊e kapia nakitarimakasẹ su Mawu Ruata?” 19Mase i Yesus něhengetang su tau e, ”Pẹ̌buạ e kụ kapul᷊ẹ e. Ual᷊ingu i kau mangimang si Siạ ute i kau naul᷊e.”
Tempon Mawu Ruata mẹ̌parenta
(Mat. 24:23-28, 37-41)
20Piạ tau Farisi pira-pirang katau nakiwal᷊o si Yesus měnsang angerẹ Mawu Ruata ruměnta mẹ̌parenta. I Yesus simimbang, ”Kararatuangu Mawu Ruata e tawe tẹ̌takengu tatiala ikẹ̌kasilon taumata, 21hakịu taumata makapẹ̌bera, ’Mahịe kakělla, ěndaị i sie!’ arau, ’Paị sene i sie!’ U Mawu Ruata seng manětạ mẹ̌parenta si kamene.”#17:21: Mẹ̌parenta si kamene: arau su tal᷊oarang kamene; arau sěngkělěndị u nẹ̌těngkatodẹ u watangengʼE su tal᷊oarang kamene.
22Bọu ene Mawu Yesus něhengetang su manga muritʼE, ”Sarung duměnta tempone i kamene mapulu reng makasilo ěllo sěmbaụ bọu patikụ ěllong Ahusʼu Taumata, kaiso i kamene mang ta makasilo. 23Sarung piạ taumata mẹ̌bera si kamene, ’Kakělla, pai sene!’ arau, ’Kakělla, ěndaung sini!’ Kai kumbahang i kamene sumẹ̌bang mẹ̌deạ si sie. 24Kerẹewe kakerongu kilạ su l᷊angị kụ mạtuahẹ̌ bọu pondol᷊e sarang pondol᷊e, kerene lai sarung kakakoạ u Ahusʼu Taumata e su ěllonʼE. 25Kai kakal᷊imonaěnge i Sie mang deng harusẹ̌ masunsara kụ ikạdirin taumata orasẹ̌ ini. 26#Pěnd. 6:5-8 Su ěllong Ahusʼu Taumata sarung ilẹ̌lahẹ kakakoạ e mẹ̌sul᷊ungkewen nạung su tempong Noakẹ̌ kal᷊imona e. 27#Pěnd. 7:6-24 I sire nạung nahungkaěng dingangu němpanginung dingangu němpẹ̌kawing; kụ kerene měngkate sarang i Noakẹ̌ e simuẹ̌ su ral᷊ungu kapal᷊ẹ̌ kụ nirěntaěngken dalulung kụ nakawinasạ e kěbị taumata.
28 #
Pěnd. 18:20–19:25
Mẹ̌sul᷊ungkewelain su tempon Lotẹ̌. I sire mạhungkaěng měmpạnginung mẹ̌bẹ̌bawělli, mạhěnsinuang dingangu měmpẹ̌lẹ̌langing bal᷊e. 29Arawe sarạeng i Lotẹ̌ simẹ̌bang bọu Sodom, su ěllo ene putung dingangu malelang ěnnaẹ nẹ̌boang bọu l᷊angị kụ nakawinasạ e si sire kěbị. 30Mal᷊aing kerene sarung su ěllon pẹ̌těngkal᷊ahekangu Ahusʼu Taumata e.
31 #
Mat. 24:17-18; Mrk. 13:15-16 Su ěllo ene i sai su wowong atụ u wal᷊ene, abe lintụ mangal᷊ạ manga apal᷊iwụ e su ral᷊ungu wal᷊e. Mal᷊aing kerene i sain su waelẹ̌, abe pẹ̌sul᷊e sarang bal᷊ene. 32#Pěnd. 19:26 Pěmpẹ̌tahěndung apan seng nariadi su kawing i Lotẹ̌. 33#Mat. 10:39, 16:25; Mrk. 8:35; Luk. 9:24; Yoh. 12:25 I sai mẹ̌těngkasal᷊amatʼu pẹ̌bawiahe sarung kailangengu pẹ̌bawiahe. Arawe i saing kailangengu pẹ̌bawiahe sarung makauntung. 34Pangimangke: Su hẹ̌bi ene, duang katau su pẹ̌tatikilang sěmbaụ, sěngkatau paringaneng dingangu sěngkatau itěntang. 35Duang katau wawine kapẹ̌lutạ e gandung sěngkatau paringaneng, dingangu sěngkatau itěntang. [ 36Duang katau mạmunara su lantang sěngkatau paringaneng, kụ sěngkatau e wue itěntang.]”
37Manga muritʼi Yesus němpẹ̌kiwal᷊ọe, ”Suapa wue ene sarung mariadi Mawu?”
Yesus simimbang, ”Suapan piạ bangke ute, sene piạ manụ mananodọ bangke ene.”
Currently Selected:
LUKAS 17: SXN
Highlight
Share
Copy
Want to have your highlights saved across all your devices? Sign up or sign in
