LUKAS 10

Mawu Yesus něndolohʼu muritʼE pitum pul᷊ong katau

1Bọu ene Mawu e nanẹ̌bọ lai pitum pul᷊o#10:1: Pitum pul᷊o: Winohẹ u nạung pira-pira e: pitum pul᷊o dua. muritʼE wal᷊ine, mase něndolohʼi sire tahạ duang katau niapangal᷊amona si Sie su apan soa ringangu tampạ sarung karěntaěngʼE. 2#Mat. 9:37-38 ”Buane kụ sarung i pěnsạ e mal᷊awọ,” angkuěngʼE si sire, ”arawe mamaměnsạe kětạeng mahal᷊i. Batụu ene pěmpẹ̌dorongke su Taghuange tadeạu i Sie měndolohʼu mělahal᷊ẹ̌ e mẹ̌deạu manipo wuane. 3#Mat. 10:16 Ho! dakọe pěmpahundal᷊engke! kụ ene ěng! Iạ měndolohʼi kamene tabidạu rumba sutal᷊oaran dal᷊ugẹ̌. 4#Mat. 10:7-14; Mrk. 6:8-11; Luk. 9:3-5 Abe pěmpẹ̌bawa kawihu roitẹ̌, arau ponde arau sapatu. Abe pěngẹ̌dung sutal᷊oaran dal᷊eng kụ měmpẹ̌tabeạ su sarang sěngkatau. 5Kamageng i kamene rumangeng su wal᷊e, pěmpẹ̌bera kal᷊imona, ’Karimạko piạ pẹ̌darame su wal᷊e ini.’ 6Kụ kereu sene piạ taumata mapulung pẹ̌darame, ute tạbeạu pẹ̌daramenu e měngkai matanạ si sie. Kereu tala ute, saụewe wal᷊ị kapia tạbeạu pědaramenu ene. 7#1Kor. 9:14; 1Tim. 5:18 Kụ kěngkatanạ su wal᷊e sěmbaụ ene. Pěmpanarimạ apang kụ nisiliwirẹ̌ sene si kau, batụu i sai měmẹ̌munara e hinone wue makahombang bawaehe. Abe pěmpangal᷊ing bọu wal᷊e sěmbaụ sol᷊ong bal᷊e wal᷊ine. 8Kereu i kamene ruměnta su soa sěmbaụ kụ sene i kamene nitarimạ dingangu mapia ute, kaěngke apang nisadia sene si kamene. 9Apakaul᷊eko taumata apang masasakị su soa ene kụ pěmpẹ̌habarẹ̌ko su taumata sene, ’Mawu Ruata e seng masanggidu tempone mẹ̌parenta makoạ Datu su tal᷊oarang kamene.’ 10#MMR. 13:51 Arawe kamagengu i kamene ruměnta su soa sěmbaụ kụ sene tawe nitarimạ ute, pahunsẹ̌bang sol᷊ong dal᷊eng kụ pěmpẹ̌bera, 11’Saral᷊aing awul᷊u soang kamene riměkạ su laedʼi kami e, tontongangbeng kami e makoạ tatiala si kamene. Kụ kěngkasingkạko u kai seng maranin tempone Mawu Kasěllahenge manětạ mẹ̌parenta makoạ Datu su tal᷊oarang kamene!’ 12#Pěnd. 19:24-28; Mat. 10:15, 11:24 Pẹ̌tahěndungko, su Ěllong Kiamatẹ̌, tau Sodom sarungbe limembong kal᷊owokange ampungang u Mawu Ruata sul᷊ungu taumatan soa ene!”

Manga soa tawe měmpangimang

(Mat. 11:20-24)

13 # Yes. 23:1-18; Yeh. 26:1–28:26; Yl. 3:4-8; Ams. 1:9-10; Za. 9:2-4 ”Kaěngkěhang i kamene, Korazim! Dingangu kaěngkěhang i kamene Betsaida! Kereu manga apa makạl᷊aherang kụ seng nikakoạ su tal᷊oarang dua e seng nịkakoạ su soan Tirus dingangu Sidon ěngkudeng manga taumata pai sene seng marěngụ němpẹ̌tobatẹ̌ bọu kal᷊awọu rosan sire, kụ němpěluheng pakeangu lutu ringangu němpěnawuhʼu awul᷊ẹ̌ su wowon těmbo i sire. 14Maěndokangbe tau Tirus dingangu Sidon ampungang u Mawu Ruata sul᷊ungu i kamene, su Ěllong Kiamatẹ̌. 15#Yes. 14:13-15 Dingangu i kamene Kapernaum! I kamene mạngiral᷊ingu i kamene kai sarung masapuạ sol᷊ong sorga? Tala! I kamene sarung irěmmẹ sarang naraka!”

16 # Mat. 10:40; Mrk. 9:37; Luk. 9:48; Yoh. 13:20 Mase Mawu Yesus něhengetang su manga muritʼE, ”I sain dụdaringihẹ̌ si kamene, rudaringihẹ̌ Siạ. I sai mạnuhudʼi kamene, kai manuhudu Iạ, kụ lai mạnuhudʼi Sie rimolohu Iạ e.”

Kawawal᷊ị u manga muritẹ̌ i sire pitum pul᷊o

17I sire pitum pul᷊o#10:17: Pitum pul᷊o: Winohẹ u nạung pira-pira: pitum pul᷊o dua (kakělla ayetẹ̌ 1). muritẹ̌ e něngkawal᷊ịbe ringangu naungi sire maral᷊uasẹ̌ kahěngang. ”Mawu,” angkuěng i sire, ”kal᷊ingung manga rohkẹ̌ daral᷊akị e sụsasuměllung si kami kahiang pěmamarentang kami e si sire su areng u Mawu!”

18Mawu Yesus simimbang, ”Iạ e nakasilo setang ěnnaẹ nanawo wọu l᷊angị kere kilạ. 19#Mzm. 91:13 Kěngkasingkạko! I kamene seng Takụ nionggotangu kawasa tadeạu i kamene makatahịda těmpu ringangu i ninangu l᷊ipang dingangkewe mamẹ̌di kạguwạu wuntuangu rokạ, kụ mambeng ta makapẹ̌kapura si kamene. 20Maning seng kerene, abe pahul᷊uasẹ̌ ual᷊ingu manga rohkẹ̌ daral᷊akị e sụsasuměllung si kamene. Ěndokang i kamene pěmpahul᷊uasu u areng i kamene mạbawohẹ su sorga.”

Mawu Yesus limuasẹ̌

(Mat. 11:25-27, 13:16-17)

21Su orasẹ̌ ene lai i Yesus limuasu Rohkẹ̌ u Ruata e#10:21: Rohkẹ̌ u Ruata e: Winohẹ u nạung pira-pira: kahian Rohkẹ̌; piạ lai: su ral᷊ungu Rohkẹ̌ʼE. nẹ̌karadiahang si Sie. I Yesus něhengetang, ”Amang, Mawu kawasang l᷊angị dingangu dunia! Iạ makịtarimakasẹ si Kau watụ u kěbị ini ipakạpěnisʼu taumata mapapande ringangu matatahuěnna, kaiso kareạu mang nilahẹ u su kal᷊awọu taumata reng ta nạsikol᷊a. Ene e makal᷊uasẹ̌ naung i Amang.

22 # Yoh. 3:35, 10:15 Patikụ sạbarang seng nisarakang i Amang si Siạ. Tawẹu sarang sěngkatau masingkạ u Ahusẹ̌ kětạewen i AmangʼE. Tawẹu l᷊ai masingkạ i Amang mantịewen Ahusẹ̌ e dingangu i saịewen i kapulung Ahusẹ̌ e pělahekangu i AmangʼE.”

23Mase i Yesus nẹ̌bihu su manga muritʼE, bọu ene něhengetang si sire hala, ”Kariangkamang i kamene watụ u seng nakasilo apan nikasilong kamene orasẹ̌ ini. 24Kai pẹ̌tahěndung bue: Lawọ nabi ringangu ratu mapulu makasilo apang kinasilong kamene orasẹ̌ ini, kaiso tawe ikasilon sire. I sire mapulu rumaringihẹ̌ apang kinaringihʼi kamene orasẹ̌ ini, kaiso tawe ikaringihʼi sire.”

Papinintun tau Samaria matal᷊ěntụ

25 # Mat. 22:35-40; Mrk. 12:28-34 Bọu e piạ sěngkatau mananěntiro agama nẹ̌buạ měnangkạ si Yesus. I sie nakiwal᷊o, ”Tuang Guru, kai měkapurạe iạ e tadeạu makahombang pẹ̌bawiahẹ̌ patutune ringangu kakalẹ̌ e?”

26I Yesus simimbang, ”Apa tangu mạbawohẹ su ral᷊ungu Winohẹ Susi? Kerea tiněnnanu su hal᷊ẹ̌ ene?”

27 # Imng. 19:18; Pang. 6:5 Tau ene simimbang, ”Kěndagẹ̌kon Mawu Ruatanu ringangu kạguwạu naungu, ringangu kạguwạu kuatʼu kụ dingangu kaguwạu laěnnanu kụ kěndagẹ̌kong kasanggidangu mẹ̌sul᷊ungu i kau kuměndagu watangengu.”

28 # Imng. 18:5 ”Sasimbangu e nihino,” angkuěng i Yesus. ”Pẹ̌koạko kerene kụ i kau sarung mẹ̌biahẹ̌.”

29Kai mananěntiro agama ene mapulu mẹ̌těngkahinom batangenge. I sie nakiwal᷊o, ”I sai wue kasanggidangku e?”

30Yesus simimbang, ”Piạ sěngkatau esẹ diměsung bọu Yerusalem sol᷊ong Yerikho. Su tal᷊oaran dal᷊eng i sie nihombangengu taha pěngaho, nihampasẹ̌ kal᷊awọu rarotonge, nịbawawẹ̌bahẹ̌ sarang masarạ mate, mase niwala ral᷊imbatange su ral᷊eng dingangu lesẹ e ghẹ̌guwạ. 31Nẹ̌sarětạ u l᷊ai sěngkatau imang narěsungu ral᷊eng ene. Kutẹu i sie nakasilọe tau ene, i sie měngkatewe limihi pai wọu sěmběkane kụ měngkai rimal᷊eng. 32Kerene lai ringangu sěngkatau hiten tau Lewi e rudẹ̌sung sene, suapạewen nikasilone tau ene, nihaungange kapẹ̌pẹ̌patehe si sie. Kaiso i sie nětěngkaghea sarang sěmběkan dal᷊eng, mase měngkate rimal᷊eng. 33#2Kar. 28:15 Arawe wọu ene piạko l᷊ai sěngkatau wọu Samaria nasahe sural᷊eng ene. Sarạeng kinasilone tau ene, ute naunge měngkatewe nẹ̌kakal᷊ẹ̌kaden tatal᷊ěntụ. 34Kụ měngkatewe tamai himaung tau e mase namurěsi manga lesẹ e niuhasu anggorẹ̌ kụ niundangengu lana, bọu e naměkisẹ̌ manga l᷊esẹ ene. Mase i sie něnduịu tau ene su wowong kalidene sẹ̌sane, kụ niẹ̌ntudẹ̌ su wal᷊e kawawunakeng dingangu nipạdul᷊iange. 35Sěngkariọěllone i sie něngukahẹ̌ doitẹ̌ sal᷊aka ruang kal᷊ěpa kụ nitẹ̌gone su taghuangu wal᷊e e apidu nẹ̌bera, ’Padul᷊ie wue i sie kụ apạeweng manga wawaehẹ̌ bal᷊ine ute, sarung takụ baehang kereu iạ mawal᷊ị kapia sini.’ ”

36Bọu e i Yesus něngěnsuẹeng běkene ringangu kakiwal᷊o ini, ”Bọu i sire těllu ene i saị e su ěnnanu nakoạ kere tau kasanggidange wọu tau nihampasẹ̌ e?”

37Mananěntiro agama e nikiwal᷊ongu ene simimbang, ”Tau kụ seng timal᷊ěntụ u tau ene!”

”Ho, dakọe kụ pěkoạ e kerene lai!” angkuěng i Yesus.

Yesus nẹ̌tiwo si Marta ringangi Maria

38 # Yoh. 11:1 Bọu e i Yesus dingangu manga muritʼE nẹ̌saụewe rimal᷊eng kụ narěntạ e su kampong sěmbaụ. Sene piạ sěngkatau wawine arenge i Marta, nighausang i Sie sol᷊ong bal᷊ene. 39I Marta piạ tuarine arenge i Maria. I Maria e kimaiangke maraning Mawu Yesus dụdaringihẹ̌ manga těntironʼE. 40Arawe i Marta e měngkatewe matasibung hal᷊ẹ̌ u wal᷊e. I sie himaung si Yesus kụ nẹ̌bera, ”Mawu, apa Mawu ta mẹ̌sasěmpị si Maria naněntangu hal᷊ẹ̌ pinakihal᷊ẹ̌ si siạ sẹ̌saku? Dolohẹ̌ko i sie pẹ̌tul᷊ungu iạ!”

41”Marta, Marta!” angkuěngu Mawu. ”I kau měngkatewe ghụgěnggang dingangu tasibu mẹ̌tẹ̌tiněnnan hal᷊ẹ̌ lawọ; 42sěmbal᷊iau hal᷊ẹ̌ kahumotongange mang sěmbaụ. Kụ i Maria seng namile apang kapiaěnge, kụ tawe sarung ikaal᷊ạ wọʼi sie.”

Currently Selected:

LUKAS 10: SXN

Highlight

Copy