YOHANES 6

Mawu Yesus napakaěngu lima hiwu su kataune

(Mat. 14:13-21; Mrk. 6:30-44; Luk. 9:10-17)

1Nararěnnạ samurin ene Mawu Yesus dimakị sol᷊ong paị sěmběkan Danong Galilea, kụ isẹ̌sẹ̌bạ lai Danon Tiberias. 2Narěntạe sene, tangu kai piạ gapaěngu taumata mal᷊awọ timol᷊e si Sie, u i sire nạung seng bọu makạsilo hal᷊ẹ̌ makạdal᷊inaụ kẹ̌koatengʼE makạpia masasakị. 3Mawu Yesus simakạe sol᷊ong bul᷊ude, mase naiangke ringangu manga muritʼE. 4Su tempo ene kai maraning Ěllon Sal᷊imbangu Paskang Yahudi e. 5Piạ e Mawu Yesus mạmanda kaihi-koaneng mạngělikụe, i Sie nakasilọ e si sire měgẹ̌gapaěng nahunděnta su anunʼE. Ene i Sie nẹ̌berạ e si Filipus, ”Suapa ngae i kitẹ makapamělli kaěng, tadeạu i sire kěbị e makakaěng?” (6Mawu Yesus seng masingkạ apa sarung koatengʼE, kai i Sie něhengetang kerene, ute kai manal᷊ukạ si Filipus.)

7I Filipusẹ̌ e simimbang, ”Borotẹ̌ arẹ̌gang dua hasụ su kal᷊ěpane roitẹ̌ sal᷊aka#6:7: Doitẹ̌ sal᷊aka: Doitẹ̌ sal᷊aka sěngkal᷊ěpa e kai ghajin sěhěllo waugu sěngkatau mělahal᷊ẹ̌ biasa (kakělla Mat. 20:2). e tawe makakaěng baugʼi sire ini, manilaing i sire kětạeng mahiạu pẹ̌kadodọ.”

8Sěngkatau wọu tal᷊oaran muritʼu Mawu Yesus wal᷊ine kụ arenge i Andreas, anạ u sěmbaụ i Simon Petrus nẹ̌bera, 9”Ěndaung piạ dariọ esẹ sěngkatau, sinasạe borotẹ̌ limambaụ dingangu kinạ duambua. Kai apa wue něnggạe waugu taumata kakěpal᷊e kere ini?”

10”Apakaiangko i sire,” ungkuěngu Mawu Yesus. Su tampạ ene piạ děmpugẹ̌ masuwenehẹ̌, kụ i sire naiangke su rěmpugẹ̌ ene – kal᷊awọe piạ u manga l᷊ima hiwu su kataune esẹ. 11Bọu ene Mawu Yesus něngal᷊ạe borotẹ̌ ene mase nakitarimakasẹ su Mawu Ruata. Bọu e i Sie nẹ̌papahiạen borotẹ̌ ene su taumata l᷊awọ. Mase i Sie nẹ̌papahiạen kinạ ene, kụ i sire nahungkaěngke nẹ̌batụ lehẹ i sire. 12Sarạeng seng něngkal᷊aedẹ̌, Mawu Yesus něhengetang su manga muritʼE, ”Komol᷊ẹ̌ko manga lěmbeng kaěng ene; kumbahangbe piạ u magholọ.” 13Mase i sire něngomol᷊ẹ̌ mapul᷊o dua su patangane napenẹ kal᷊awọe lěmbeng kaěng bọu borotẹ̌ limambaụ kụ nịkakaěngu taumata l᷊awọ e.

14Sarạeng i sire nakasilo hal᷊ẹ̌ makạdal᷊inaụ nikoạ u Mawu Yesus, i sire nẹ̌bera, ”Těngadẹ̌, ini e kai nabi#6:14: Nabi: Kakělla pasalẹ̌ 1:21. lẹ̌harapeng duměnta su dunia!” 15Mawu Yesus e masingkạ u i sire riměnta tadeạu manihasan Sie makoạ datun sire. Batụu ene natamaị e i Sie něnggeang sol᷊ong tampạ bawul᷊urange.

Mawu Yesus dimal᷊eng su wowong akẹ

(Mat. 14:22-33; Mrk. 6:45-52)

16Sarạeng seng kakạhěbine, manga muritʼu Mawu Yesus e němpẹ̌děsungke sol᷊ong dano e. 17Mase i sire němpẹ̌sake sakaeng kụ němpẹ̌lẹ̌bạ dano ene, nětimona Kapernaum. Ěllo e seng marěndung kai Mawu Yesus wẹ̌dang tawe nạděnta su anung sire. 18Kutẹu rano e nanětạ e nẹ̌kal᷊itota kahiạen kaihạ u anging. 19Sarạeng nẹ̌sakaeng mangạe lima arau ěnnungu kilo meterẹ̌ kal᷊aude, i sire nakasilọ e Mawu Yesus kạdal᷊enge su wowong akẹ, lụhaung sakaeng i sire. I sire něngkatakụe. 20Arawe Mawu Yesus e kawe něhengetang si sire, ”Abe kěngkatakụ, kai Iạ ěndaunge!” 21Mase ringangben naung mal᷊uasẹ̌ i sire něnarimạ i Sie simake su sakaeng, kụ su tempo ene lai sakaeng i sire nahumpạ u tẹ̌timonaěng.

I sire měmpẹ̌dědeạ Mawu Yesus

22Sěngkariọěllone taumata l᷊awọ kụ bẹ̌dang ene su sěmběkang dano e, nakahěngangu wuhu-wuhu e kětạeng sěnggẹ̌sa sakaeng sene. I sire masingkạ u manga muritʼu Mawu Yesus e seng nẹ̌buạ su sakaeng ene, arawe Mawu Yesus e tawe natol᷊e. 23Samuring ene piạ e sakaeng pirang gẹ̌sa wọu Tiberias natul᷊i kụ němal᷊ango marěduhu tampạ kụ piạ taumata l᷊awọ e mạhungkaěng borotẹ̌ bọu nịal᷊amateng u Mawu. 24Piạ e taumata l᷊awọ nakasilọ e u Mawu Yesus dingangu manga muritʼE tawẹ dise sene, tangu i sire němpẹ̌sakẹ e manga sakaeng ene kụ něngkakoạ sol᷊ong Kapernaum němpẹ̌deạ Mawu Yesus.

Mawu Yesus e kai borotẹ̌ makạděntang pẹ̌bawiahẹ̌

25Piạ e manga taumata ene nẹ̌sombangu Mawu Yesus su sěmběkang dano e, i sire nakiwal᷊o si Sie, ”Tuang Guru, kạnge i Tuang nahumpạ sini?”

26Mawu Yesus simimbang, ”Mambeng kahěngang i kamene mědẹ̌deạ si Siạ bal᷊inewe ual᷊ingu i kamene seng nakaěnna timonan manga hal᷊ẹ̌ makạdal᷊inaụ Takụ nikoạ, kaiso ual᷊ingu i kamene seng bọu němpẹ̌kaěng borotẹ̌ sarang něngkal᷊aedẹ̌. 27Abe pěmpamunara waụgu makaěbạ kaěng kụ mạsue ringangu mạbuhụ. Pěmpamunarako waụgu makahombang kaěng ta mawawuhụ dingangu makarěntang pẹ̌bawiahẹ̌ tutune ringangu kakalẹ̌. Kaěng ene e sarungbe ionggọ u Ahusʼu Taumata si kamene, batụu i Sie seng niakun Duata Amang.”

28Mase i sire nakiwal᷊o si Sie, ”Kai apa harusẹ̌ koateng i kami tadeạu mẹ̌tatahino su kapulun Duata e?”

29Mawu Yesus e simimbang, ”Kai ini e ikěkapulun Duata wọu i kamene: pangimangke si Sie kụ seng nirolohʼu Ruata.”

30”Kamageng kerene,” ungkuěng i sire, ”apa wue tatialane ikaonggọ i Tuang tadeạu i kami makasilo ringangu mangimang si Tuang? Apa wue kụ sarung koateng i Tuang? 31#Sas. 16:4, 15; Mzm. 78:24 Manga i upung i kami#6:31: Kami: arau i kitẹ. e němpẹ̌kaěng manna su wanua tạ taune, kere mạbawohẹ su ral᷊ungu Winohẹ Susi, ’I Sie napakaěng i sire borotẹ̌ bọu sorga.’ ”

32Mase Mawu Yesus e něhengetang si sire, ”Pěmpangimangke: Bal᷊inewe i Musa, kaiso kawe i Amang-Ku e nangonggọu borotẹ̌ tutune wọu sorga si kamene.#6:32: Bal᷊inewe i Musa ... si kamene: arau Apang kụ nionggọ i Musa si kamene wal᷊ine. 33Batụu borotẹ̌ kụ nionggọ u Ruata e ute kai i Sie kụ seng limintụ bọu sorga kụ mangonggọ u pẹ̌bawiahẹ̌ baụgu taumata su dunia.”

34”Tuang,” ungkuěng i sire, ”onggol᷊eko i kami borotẹ̌ ene sěntiniạ.”

35”Kai Iạ e borotẹ̌ makarěntang pẹ̌bawiahẹ̌,” ungkuěng u Mawu Yesus si sire. ”I sain duměnta su anu-Ku mang seng ta mahutung sarang karěngụe. Dingangu i sai kụ mangimang si Siạ e semben tawe marou sarang marěngụ-děngụ.

36Kai kerẹewe seng Takụ nipẹ̌bera si kamene, maningbe i kamene seng bọu nakasilo si Siạ, kai i kamene mang tawe mangimang. 37Kal᷊awọu taumata seng nionggọ i Amang si Siạ sarung mahunděnta su anu-Ku. Iạ e tawe mẹ̌binsị i sai-sai ruměnta su anu-Ku. 38Batụu Iạ e limintụ bọu sorga e, wal᷊inewe waụgu mẹ̌koạ kapulu-Ku sẹ̌saku, kaiso kawe kapulun Sie něndolohʼu Iạ. 39Kụ kai ini kapulun Sie něndolohʼu Iạ e: Tadeạu wọu kěbị taumata kụ seng nisarakang si Siạ, tawẹu sarang sěngkatau mailang; kaiso kawe tadeạu Iạ mapẹ̌bangung i sire su Ěllong Kiamatẹ̌. 40Kụ ini e mambeng kapulun Amangku kahěngang: Tadeạu kěbị apan seng nakasilo Ahusẹ̌ kụ mangimang si Sie, mạnaghuang pẹ̌bawiahẹ̌ tutune ringangu kakalẹ̌, kụ Takụ ipẹ̌biahẹ̌ kapia su Ěllong Kiamatẹ̌.”

41Apạewen tau Yahudi nanětạ e němpẹ̌galundung su Mawu Yesus, batụu i Sie nẹ̌bera u: ”Kai Iạ e borotẹ̌ natěntung bọu sorga.” 42I sire němpẹ̌bera, ”Karạ i Yesus ini e kawe anạ i Yusup? I kami masingkạu inang-iamangʼE! Kereapa wue i Sie wahani nẹ̌bera u i Sie natěntung bọu sorga?”

43Mase Mawu Yesus něhengetang si sire, ”Abe pěmpẹ̌galundung. 44Tawẹu sarang sěngkatau makakarěnta su anu-Ku, kereu i Amang něndolohʼu Iạ e tawe mẹ̌bawa si sie su anu-Ku, dingangu i sain duměnta, sarung takụ ipẹ̌bangung su Ěllong Kiamatẹ̌. 45#Yes. 54:13 Su ral᷊ungu bukẹ̌ u manga nabi kạbawohẹ kere ini: ’Kěbị taumata e sarung těntiroěngu Mawu Ruata.’ Kụ kěbị taumata apang dụdaringihẹ̌ si Amang dingangu mạngěndung bọʼi Sie, ruměnta su anu-Ku. 46Kụ ene wal᷊inewe mạul᷊ịu mangal᷊ene seng piạu wọu nakasilo si Amang. Kětạeng i Sie riměnta wọu anun Duata e seng nakasilo si Amang.

47Kěngkasingkạko: Taumata maimange kai mạnaghuang pẹ̌bawiahẹ̌ tutune ringangu kakalẹ̌. 48Kai Iạ e borotẹ̌ makạděntang pẹ̌bawiahẹ̌. 49I upung i kamene kimaěng manna su wanua l᷊inggi, kai i sire mal᷊aing nate. 50Kai wal᷊ine kerene su borotẹ̌ kụ natěntung bọu sorga; i saing kumaěng borotẹ̌ ene semben tawe mate. 51Kai Iạ e borotẹ̌ natěntung bọu sorga – borotẹ̌ kụ makạděntang pẹ̌bawiahẹ̌. I saing kumaěng borotẹ̌ ini sarung mẹ̌biahẹ̌ sarang karěngụe. Borotẹ̌ kụ sarung Takụ ionggọ baụgu pẹ̌bawiahʼu taumata su dunia e ute kai ghẹ̌si-Ku.”

52Sarang nakaringihẹ̌ ene tau Yahudi němpẹ̌darendehẹ̌ lawọ i sire, ”Kereapa wue tau ini mangonggọu ghẹ̌sinʼE si kitẹ ipakikinạ?” angkuěng i sire.

53Mase Mawu Yesus něhengetang si sire, ”Pangimangke: Kereu i kamene tawe kuminạ gẹ̌sin Ahusʼu Taumata e ringangu tawe manginung dahanʼE, i kamene mambeng kahěnga-hěngang tawe makaěbạ pẹ̌bawiahẹ̌. 54I saing kuminạ gẹ̌si-Ku ringangu manginung daha-Ku e managhuang pẹ̌bawiahẹ̌ tutune ringangu kakalẹ̌, dingangu Takụ ipẹ̌bangung su Ěllong Kiamatẹ̌. 55U ghẹ̌si-Ku e mamben kaěng kahěngang, dingangu raha-Ku e mambeng inumang kahěngang. 56I saing kụkinạ gẹ̌si-Ku ringangu mạnginung daha-Ku, mang tatapẹ̌ masěmbaụ dingang-Ku, kụ Iạ e masěmbau dingange. 57I Amang kụ biahẹ̌ ene, něndolohʼu Iạ dingangu Iạ mal᷊aing nẹ̌biahẹ̌ bọʼi Amang. Kerene lai i saing kuminạ gẹ̌si-Ku sarung mẹ̌biahẹ̌ bọu Iạ. 58Kai ini e borotẹ̌ natěntung bọu sorga: bal᷊inewe borotẹ̌ kere nikaěng i upung i kamene. Kai sarạeng kimaěng borotẹ̌ ene, i sire e mal᷊aing nate. Arawe i saing kimaěng borotẹ̌ ini sarung mẹ̌biahẹ̌ sarang karěngụ e.”

59Kěbị ene piněhengetang u Mawu Yesus piạ i Sie mạněntiro su wal᷊em pẹ̌kakal᷊iomanengang su Kapernaum.

Manga wawera makạděntang pẹ̌bawiahẹ̌ tutune ringangu kakalẹ̌

60Sarạeng bọu nakaringihẹ̌ apang hengetangu Mawu Yesus e, lawọ bọu tal᷊oarang manga muritʼE němpẹ̌bera u, ”Těntiro ini tumanịu mawěhạ. I sai wue makatarimạ!”

61Mawu Yesus sẹ̌sane masingkạ u manga muritʼE měmpẹ̌sẹ̌singuhutangu hal᷊ẹ̌ ene. Tangu i Sie nẹ̌berạ e, ”Apa i kamene kawe niměnggạ u manga wawera ene? 62Kai makoạ kereapa mạeng i kamene makasilo Ahusʼu Taumata e mahengkẹ kapia sol᷊ong tampạ e nạung kal᷊amona? 63Kụ makạbiahẹ̌ taumata kai Rohkẹ̌ u Ruata. Katatoghasʼu taumata e mambeng tawẹ gunane. Manga wawera kụ Takụ pinẹ̌bera si kamene kanini ute kai manga wawerang Rohkẹ̌ u Ruata kụ kai manga wawera makạděntang pẹ̌bawiahẹ̌. 64Kaiso mal᷊aing piạ sutal᷊oarang kamene kụ tawe mangimang.” (Mawu Yesus e seng masingkạ dokeng bọu tětạe kai i sai-sai tawe mapulu mangimang, dingangu i sai kụ sarung mẹ̌sunial᷊ʼi Sie.) 65Mase Mawu Yesus něhengetang kapia, ”Kai ual᷊ingu ene hakịu Iạ mělẹ̌habarẹ̌ si kamene u tawẹu sarang sěngkatau makakarěnta su anu-Ku, kereu i Amang e tawe mapakawala.”

66Nanětạ bọu orasẹ̌ ene mal᷊awọ bọu manga muritʼE němpaněntang i Sie, kụ seng tawe lai mapulu tumol᷊e si Sie. 67Mase Mawu Yesus e nakiwal᷊ọe su manga muritʼE si sire mapul᷊o dua e, ”Apa i kamene mal᷊aing mapulu měmpaněntangu Iạ e?”

68 # Mat. 16:16; Mrk. 8:29; Luk. 9:20 ”Mawu,” ungkuěng i Simon Petrus si Sie, ”kụ kai sol᷊ong anung i sai tangu i kami e? Hengetangu Mawu e kai makạděntang pẹ̌bawiahẹ̌ tutune ringangu kakalẹ̌. 69I kami e seng nangimang dingangu nangiaking u kai i Kau Mawu e rarolohang susi wọu anun Duata.”

70Mawu Yesus simimbang, ”Karạ kawe Iạ namile si kamene mapul᷊o dua ini e? Sěmbal᷊iau sěngkatau wọu tal᷊oarang kamene kai setang!” 71Kụ itẹ̌timonang Mawu Yesus e ute kai i Yudas anạ i Simon Iskariot. Batụu manilaing i Yudas sěngkatau wọʼi sire mapul᷊o dua muritʼu Mawu Yesus e, i sie sarung mẹ̌sunial᷊ʼu Mawu Yesus.

Currently Selected:

YOHANES 6: SXN

Highlight

Copy